1 Bakeo Davida nivola hozao: "Eto ro hisy ty tsano Yaveh Njanahary, miaraky amy ty alitara ho ahy ty fanomeza oroa Israely. " 2 Ka le nibeko mpiasany rey i Davida mba hamory miaraky rey vahiny ze mipetsaky amy ty tanin'Israely rey. Nitondrony ndrozy mba ho mpamaky vato, mba hamaky vato karanga rey, mba hanamboarany ty tsanon-Janahary. 3 Nanome vy lako maré ho fantsiky ty varavara mba ho amy ty vavahady eo, sady amy vy fanitia i Davida rey. Nanome saba lako noho ze azo lanja avao koa ie, 4 sady hazo sedera lako tsy hay hisahy. (Nanday hazo sedera lako maré ho an'i Davida mba hisahy Sidoniana noho Tyriana rey.) 5 Hoasa Davida hozao: "Solomona anakilahiko ro tanora sady tsy manam-pahaiza, sady azy tsano ze tokony hamboary iny ho an'Yaveh le tsy maintsy majilo, mba halaza noho bey voninahitsy amy tany hafa iaby rey eo. Ka le hikarakara ty fanamboara zay zaho." Laha zay le nanao fanomana bevata i Davida taloha ty nahafaty azy. 6 Bakeo le nikaiky an'i Solomona anany ie sady nibeko azy hanamboatsy tsano ho an'i Yaveh, azy Njanaharin'Israely iny. 7 Hoasa Davida tamy Solomona hoe: "Anako, Fikasako ty hanamboarako tsano, ho ahy ty anara Yaveh Njanaharinariko. 8 Nefa Yaveh namonjy ahy sady nivola hoe: 'Fa nandatsaky lio lako sady fa nialy aly lako iha. Tsy hamboatsy tsano ho ahy ty anarako iha, safe fa nandatsaky lio lako tan-tany teo tamasoko eo iha. 9 Ndra le zay aza, hana anakilahy raiky tea filongoa iha. Hanome azy tsiotsioky amy fahavalony rey iaby amy ty lafiny iaby Zaho. Fa ty anarany ro ho anovy hoe Solomona, sady hanome azy fiadana noho filamina ho an'Israely amy androny Zaho. 10 Hamboatsy tsano ho ahy ty anarako ie. Ho anako ie, sady ho babany Zaho. Hampipetsaky ty seza fipetraha ty fanjakany Amin'Israely eo mandrakizay Zaho.' 11 Amy zay, anako e, hitahy anao lahy Yaveh sady hampety anao. 12 Hamboatsy ty tsano Yaveh Njanaharinao lahy iha, manahaky ty nivolaniny fa hanovinao. Hanome anao say noho fahazavan-tsay avao koa lahy Yaveh, mba hankatoavy ty lalà Yaveh Njanaharinao, lafa mampipetsaky anao hiasa amin'Israely eo Ie. 13 Le homety iha, laha mankato soa lalà noho lily ze namea Yaveh tamy i Mosesy mikasiky ty Israely rey. Mahereza sady mana herim-po. Mba matahotsy na laginy. 14 Sady, Ingo, ty fihezaha bevata ze fa nihomaniko ho ahy ty tsano Yaveh ze talenta volamena 100. 000, talenta volafoty ray tapitsisa, sady saba noho vy lako maré. Fa nanome hazo noho vato avao koa zaho. Tsy maintsy hanampy bevata maré an'i iaby rey iha. 15 Mana mpiasa lako miaraky aminao iha: mpamaky vato, mpanao tsano, mpandrafitsy, sady mpanao asa-tana mahay lako isan-karazany rey, 16 ze afaky miasa amy ty volamena, volafoty, saba, sady vy. Ka atomboho ty asa, sdy hitahy anao lahy Yaveh. " 17 Nibeko mpitariky ty Israely iaby rey avao koa Davida mba hanampy an'i Solomona anakilahiny, manao hozao: 18 "Mitahy anareo Yaveh Njanaharinareo sady fa nanome fiadana anareo tamy ty lafiny iaby. Fa nanome mpipetsaky ty faritsy tam-pelantanako teto Ie. Mofona anila Yaveh eo noho ty olony ty faritsy. 19 Amy zao milà an'Yaveh Njanaharinareo amy ty fonareo iaby noho ty fanahinareo iaby. Mitsangana sady amboaro ty toera masy Yaveh Njanahary. Ka le afaky manday ty fiondrana ty fanenkea Yaveh noho raha ze ahy Njanahary rey an-tsano ze namboatsy ho ahy ty anara i Yaveh ao nareo."