¹ Nisy fahavalo raiky nitsanga nanohitsy an'Israely sady nandrisiky an'i Davida mba hanisaky ty Israely. ² Hoasa Davida tamy i Joaba noho mpifehy ty tafiky rey hozao: "Mandehana, hisaho ty olo lakon'Israely baka Beri-sheba ao ka le zisiky Dana any sady tatero amiko, mba hahaizako ty hisan-drozy." ³ Le hoasa Joaba hozao: "Hampitombo abo zato mandilatsy ty tafikiny lahy Yaveh. Moa tsy manompo ty tompoko ie iaby? Nanino ro mila zay ty tompoko? Nanino ro manday heloky amin'Israely? " ⁴ Kanefa tampitsy ty safa ty mpanjaka amy i Joaba. ka le lasa Joaba sady nandeha nameno an'Israely iaby. Bakeo le nimpoly ta Jerosalema ao ie. ⁵ Sady le nitatery i Joaba tamy i Davida ty fiharoa ty hisa lahilahy mpialy rey. Nisy lahilahy 1. 100. 000 mitandraky meso-bevata ta Israely ao. Joaba raiky ro nana maramila 470. 000. ⁶ Fa Levy noho Benjamina ro tsy voahisaky amin-drozy, safe mampangoritsy ahy an'i Joaba beko ty mpanjaka. ⁷ Nahameloky an-Janahary ty raha hanoviny, ka le nanafiky an'Israely Ie. ⁸ Hoasa Davida tamin-Janahary hozao; "Nanota bey zaho tamy ty fananova zay. Ka le alao ty heloky ty mpiasanao, safe nanao hadala Bey zaho."? ⁹ Hoasa Yaveh tamy i Gada, mpaminany i Davida hozao: ¹⁰ "Mandehana volano amy i Davida hozao: 'Zao ro ambara Yaveh: Ameako fitijgina telo iha. Mitingina raiky amy rey." ¹¹ Laha zay Gada le nana amy i Davida any sady nivola taminy hozao: "Zao ro ambara Yaveh: 'Mitingina raiky amy ndreto: ¹² mosary telo tao, sa telo vola hialona fahavalo rey noho tsatsa ty meso-bevatan-drozy, sa telo andro amy ty meso-bevata i Yaveh, zay hoe, arety-mandrava amy ty tany ao, miaraky amy ty anjely Yaveh manrrava mameno ty tanin'Israely iaby.' Ka le amy zao, tapaho ze valin-tsafa vatany ho andesiko amy azy naniraky ahy iny." ¹³ Le hoasa Davida tamy i Gada hozao: "Malahelo maré zaho. Engaho zaho holavo an-tana Yaveh eo manahaky ze an-tana ty olo eo, safe tena bevata ty famalozam-pony." ¹⁴ Laha zay le nandefa loza tamin'Israely i Yaveh, sady olo fito aly ro maty. ¹⁵ Nandefa anjely ta Jerosalema any i Yaveh mba handrava zay. Laha ie saiky handrava azy iny, le nanenty Yaveh sady nanova ty fisainany tamy azy raty iny. Hoy Ie tamy azy anjely mpandrava iny hozao: "Ampy zay! Ajanono ty tananao." Tamy fotoa zay le nitsanga tamy ty faloza i Araona azy eo Jebosita iny ty anjely i Yaveh. ¹⁶ Nanenty anabo Davida sady nahita azy anjelybiny Yaveh nitsanga tanila ty tany eo noho ty lanitsy, nisy meso bevata voatsoaky nanondro an'i Jerosalema tan-tanany eny. Bakeo Davida noho olo bey rey, nisiky akanjo fisaona, nampandohaliky ty tarehin-drozy tamy ty tany. ¹⁷ Le hoasa Davida tamy Njanahary hozao: Moa tsy zaho ro nibeko ty hanisaky tafiky rey? Nanao raha raty zay zaho. Fa aondry rey, ino ro nanovin-drozy? Yaveh Njanahary! Engaho ty tananao hamango ahy noho ty longoko, fa mba ka enga hipetsaky amy ty olo lakonao ty loza." ¹⁸ Le nibeko an'i Gada ty anjely Yaveh mba hivola amy i Davida, fa tokony hiakatsy noho hanory alitara ho an'Yaveh amy ty famaloza i Arona eo azy Jebosita iny i Davida. ¹⁹ Laha zay le lasa niakatsy Davida manahaky ty torohevitsy nanovy i Gada nanoviny amy ty anara i Yaveh. ²⁰ Laha mbo nandisa vary i Araona, le nitoliky ie sady nahita anjely iny. Le nivony ndrozy noho anakilahiny efatsy rey. ²¹ Lafa avy tamy i Araona any i Davida, le nanenty Araona ka le nahita an'i Davida. Niala ty famaloza ie sady nampandohaliky ty tarehiny tamy ty tany tamy i Davida eo. ²² Le hoasa Davida tamy i Araona hozao: "Avilio amiko ty famaloza toy, mba hafahako manamboatsy alitara ho an'Yaveh. Haloako ty viliny atsiky, mba hiala amy ty olo lako ty loza." ²³ Hoasa Araona tamy Davida hozao: "Alao ho ahy nao zay, tompoko azy mpanjaka iny. Anovo aminy ze hitanao fa soa amasonao eo. Ingo, hanome aomby ho ahy nao ho fanomeza oroa zaho, ty famangoam-bary ho kata, sady ty vary ho fanomeza voa; Hameako anao iaby zay." ²⁴ Le hoasa Davida mpanjaka tamy i Araona hozao: "Aha, tsivitavita hivily zay amy ty viliny atsiky zaho. Tsy hangalaky ze anao noho hanome zay ho fanomeza oroa amy i Yaveh zaho laha amea ahy avao zay." ²⁵ Laha zay le nandoa enin-jato sekely volamena ho ahy azy toera iny i Davida. ²⁶ Namboatsy alitara ho an'Yaveh eo Davida sady nanome fanomeza oroa noho fanomezam-pilongoa tamy zay eo. Nikaiky an'Yaveh ie, namaly azy tamy ty afo baka an-danitsy any ho amy ty alitara fandoroa eo ty fanomeza oroa. ²⁷ Bakeo Yaveh nanome beko an'i azy anjely iny, sady nampimpoly ty sabany tamy ty fipetsaha ao anjely iny. ²⁸ Lafa hita i Davida fa namaly azy tamy famaloza iny eo Jebosita i Yaveh, le nanao ty soro teo ie tamy fotoa io avao. ²⁹ Sady tamy fotoa zay, ty tabernakely i Yaveh, ze nanovy i Mosesy tan'efitsy any, noho ty alitara ho ahy ty fanomeza oroa, le tamy tany abo rey ta Gibeona any. ³⁰ Kanefa, tsy afaky nandeha tany mba hangataky ty tari-dalan'Janahary i Davida, safe natahotsy ty meso-bevata ty anjely i Yaveh ie.