¹ Sady Hirama mpanjaka i Tyro nandefa mpanday hafatsy tamy i Davida any, noho hazo sedera, mpadrafitsy, sady mpamboatsy tsano. Namboatsy tsano ho azy ndrozy. ² Davida ro nahay fa Yaveh ro fa nampipetsaky azy ho mpanjaka tamy Israely eo, sady ty fanjakany ro nasondrotsy anabo noho ty amy olony Israely. ³ Ta Jerosalema ao, le nangala-baly lako Davida, sady niteraky anakilahy noho anak'ampela lako ie. ⁴ Ndreto iaby ty anara anaky naterakiny ta Jerosalema any: Samoa, Sobaba, Natana, Solomona, ⁵ Jibara, Elisoa, Elioeleta, ⁶ Noga, Nafega, Jafia, ⁷ Elisama, Beliada sady Elifeleta. ⁸ Sady lafa re Filistina rey fa nihosora ho moanjakan'Israely iaby Davida, le niboaky nila azy ndrozy iaby. Nefa re i Davida zay ka le niboaky hanohitsy androzy ie. ⁹ Sady avy Filistina rey ka le nanao fanagiha tamy ty Loham-baibo ty Refaïta eny. ¹⁰ Bakeo Davida nangataky fanampea tamin-Janahary. Hoy ie hozao: "Tokony hiakatsy hanafiky Filistina rey va zaho? Hanome fandresea amin-drozy eo va iha?" Le hoasa Yaveh taminy hozao: "Ampisikino, fa tena hanome androzy ho ahy nao Zaho." ¹¹ Le niakatsy nana Bala-perazima ao ndrozy, sady tao ro nandreseany androzy. Nampitoro hevitsy ie hozao: "Ty tanako ro namakia Yaveh ty fahavaloko hiparitaky manahaky ty tondra-drano." Ka le lasa Bala-perazima ro anara toera zay. ¹² Nenga Filistina rey teo njanahariny rey, sady nanome lily Davida fa tokony oroa rey. ¹³ Sady nanafaky ty loham-baibo ndraiky ty Filistina. ¹⁴ Le nangataky fanampea tamin-Janahary any ndraiky Davida. Hoasa Njanahary taminy hozao: "Tsy tokony hanafiky androzy aloha eo iha, fa koa hiodiky afaran-drozy ao sady ho avy amin-drozy eo iaby amy hazo balsam rey eo. ¹⁵ Lafa renao ty feo ty lia-bey amy ty fitsioky ty tsioky baka amy vohitsy ty hazo balsama eo, le manafiha amy ty hery. Mananova zay safe Njanahary fa hoaloha lala anao hanafiky ty tafiky Filistina rey." ¹⁶ Ka le nanovy i Davida ze nibekoan-Janahary azy. Nandesy ty tafiky Filistina rey ta Gibeona any zisiky a-Gazera any ie. ¹⁷ Sady ty laza i Davida ro niparitaky tamy ty tany iaby eo, sady nahavy ty firenea iaby hatahotsy azy Yaveh.