1 Davida ro niresaky tamy mpifehy ty arivo raiky noho zato, niaraky tamy ty mpitariky iaby. 2 Hoasa Davida tamy ty goropy tafiky Israely iaby hozao: "Laha soa aminareo, sady laha baka amy i Yaveh Njanaharintsika zay, le engao tsika handefa mpanday hafatsy iaby eny amy rahalahintsika ze mipetsaky any amy faritsy Israely iaby any, sady amy mpisoro rey any noho Levita ze amy tanàn-drozy rey ao any. Engaho ndrozy ho volany mba hiaraky amintsika. 3 Ndao tsika hampimpoly amintsika ty fiondrana ty Njanaharintsika, safe tsy nila ty sitsapony tsika tamy andro ty fanjaka i Saoly." 4 Ty goropy tafiky iaby ro nanenky hanao raha rey, safe hoy raha marina tamaso ty olo iaby eo rey. 5 Ka le navory i Davida hiaraky ty Israely iaby, zisiky amy i Ony i Sihora a-Egypta any ka le zisiky Lebo Hamata any, mba handay ty fiondran-Janahary baka Kiriata Jearima any. 6 Niakatsy nana Bala i Davida any noho ty Israely iaby, zay hoe, Kiriata Jearima, ze ahy i Joda, mba handay ty fiondranan-Janahary baka any, ze nikaiha tamy ty anara Yaveh, le Yaveh, ze mipetsaky amy ty seza fipetraha eo amy ty Kerobima eo. 7 Laha zay le napetsakin-drozy tanabo sarety vaovao eo azy fiondranan-Janahary iny. Naboakin-drozy baka amy ty tsano i Abinada ao zay. Oza noho Ahio ro nanday sarety iny. 8 Davida noho ty Israely iaby nankalaza tanilan-Janahary eo tamy ty herin-drozy iaby. Nihira niaraky tamy ty lokanga, ampongatapaky, kimpantso, sady trompetra ndrozy. 9 Lafa avy tamy ty tany fandamina i Kidona eo ndrozy, le nanampatsy ty tanany hitanjaky an'i azy fiondra i Oza iny, safe nilavo ty aomby. 10 Le nasiaky tamy i Oza ty heloky Yaveh, sady nivonoa Yaveh ie safe nanampatsy ty tanany tamy fiondrana i Oza iny. Maty tanilan-Janahary eo ie. 11 Meloky Davida safe namango an'i Oza i Yaveh. Nikaihy hoe Pereza Oza toera zay zisiky androany. 12 Natahotsy an-Janahary i Davida tamy andro zay. Hoy ie hozao: "Manao akory ro fomba handaisako ty fiondranan-Janahary amiko ato?" 13 Ka tsy nanetsiky ty fiondrana ho amy ty tanà i Davida any i Davida, fa nametsaky zay tanila ty tsano i Obeda Edoma eo azy Getita iny. 14 Le nijano tamy ty tokatsano i Obeda Edoma ao anay ty telo vola azy fiondranan-Janahary iny. Laha zay le nitahy ty longony noho ze iaby nananany i Yaveh.