¹ De nifô tampôlakeka i Jerobala (Gibeoa zany), sy ny vahôka daôly ze niaraka taminazy, ary nitoby takeo agnilan'ny lôranon'i Haroda zareo. Ny tobin'ny Midiana de tavaratr'zareo takao an-dôsaha nagnankeky ny tanetin'i More. ² De ozy Yaveh tam'Gideona hoe: "Betsaka lôtra reo maramila, mba hagonomezako fandresena ho an'nao akeo am'reo Midianita, mbô tsy hirehareha aminà ny Israely, ka hagnano hoe: 'Ny herinay no namonjy an'nay.' ³ Ary am'zao fotôna zao, ambarao akeo an-tsofin'ny vahôka ka lazao hoe: 'Na iza na iza matàtra, na iza na iza magovitra, de ôka izy hiverigna ka hiala ankaigny an-tendrombotran'i Gileada.'" De lasana ny ôla roa arivo sy roalina noho zany, ary ny iray alina kosa nijanona. ⁴ De ozy Yaveh tamin'i Gideona hoe: "Mbôla betsaka lôtra ihany ny ôlà. Ndeso midigna aigny amin'ny rano zareo, ary hifantenako ny isan'reo ze hiaraka aminao akaigny. Raha ozy Zà aminao hoe: 'Ty raika ty no hiaraka minao,' de hiaraka aminao izy, fa raha hozy Zà hoe: 'Ty raika ty tsy hiaraka aminao', de tsy hiaraka aminao izy." ⁵ De nindesin'i Gideona nidigna taigny am'rano ny ôlà, ary ozy Yaveh taminazy hoe: "Atokano ze daôly milelaka ny rano, sala ny filelaky ny ambô, am'reo ze miandongalitra ambany mbô hisotro." ⁶ Leilà telonjato no nilalaka. Ny sisa tavela tam'reo leilà kosa nandohalika mba hisotro rano. ⁷ De ozy Yaveh tamin'i Gideona hoe: "Amin'ny alalan'reo telonjato lahy ze nilelaka ny rano, no hagnavotako anareo, sy hagnomezako anareo ny fandresena akeo am'reo Midianita. Ôka ny leilà hafa daôly hiverigna akaigny an-tanànany avy." ⁸ Ka de nialaka an'reo vatsiny sy reo trompetrany reo ze vôfidy. Nampodian'i Gideona ny leilàn'Israely daôly, ny leilà daôly mba samy hody akaigny an-dragnony, fa nitanany kosa reo telonjato lahy. Ary ny tobin'ny Midiana de takao ampidigna agnaty lôsaha. ⁹ Tamin'io alina io ihany de ozy Yaveh taminazy hoe: "Mifohaza! Tafio ny toby, fa hameko an'nao ny fandresena. ¹⁰ Fa raha matàtra ny hidigna kosa anao, de midigna akao an-toby miaraka am'Pora mpanomoponao, ¹¹ ary tainô ze lazainjareo, de hatanjaka ny herim-ponao am'fanafihana ny toby." Ary de nidigna niaraka tam'Pora mpanompony, takao am'reo tôrana fembesana ny toby i Gideona. ¹² Ny Midianita, ny Amalekita, sy ny ôlà daôly avy aigny ambony de niara-nipetraka takao an-dôsaha, betsaka de betsaka ny andiam-balala. Tsy tambo isaina ny ramevanjareo; betsaka noho ny fasika akaigny amoron-dranomasina zareo. ¹³ Rafa tonga takao i Gideona, de nisy leilà raika nitantara nofy tam'namany. De ozy raleilà hoe: "Indro! Nagnofy za, ary nahita mofo hordea boribory nikodede takao an-tobin'i Midiana. De tonga takao an-day zany, sady nandona an'azy mafy de mafy ary lavo ka nitsimbadika ambony ambany, ka de fisaka ny farany." ¹⁴ De ozy le leilà raika hoe: "Tsisy dikany zany raha mihôtra ny sabatr'i Gideona (zanaka lahin'i Joasy), le Israelita. Efa nagnome an'azy fandresena takeo am'reo Midiana, sy ny maramilany daôly Andriamanitra." ¹⁵ Rafa regnin'i Gideona ndre ny fitantarana ny nofy sy ny fandikana an'zany, de nenkohoka nivavaka izy. De niverigna takao an-tobin'i Israely izy ka nagnano hoe: "Mifohaza! Efa namen'i Yaveh anareo ny fandresena ny maramila Midiana." ¹⁶ De nozarainy ho toko telo ny telonjato lahy, nameny trompetra sy siny fôgna izy daôy, miaraka am'reo jiro agnatin'ny siny isanisany. ¹⁷ De ozy izy taminjareo hoe: "Mizahava anà ka atôvo ze ataoko. Zahao! rafa tonga akeo amin'ny sisin'ny toby za, de tsy maintsy hataonareo ze hataoko. ¹⁸ Rafa mitsoka ny trompetra za, de za sy ze daôly miaraka aminà, de tsofo magnodidigna ny toby daôly ihany kô ny trompetranareo ka mihorakorà hoe: 'Ho an'i Yaveh sy Gideona!'" ¹⁹ De tonga takeo an-tsisin'ny toby i Gideona sy ny zato lahy ze niaraka taminazy, tam'fantomboan'ny antegnantegnam-potôna indrindra. Raha igny teo am-panolôna mpiambina igny indrindra reo Midianita, de notsofinjareo ny trompetra ary novakinjareo ny siny ze tan-tagnanjareo. ²⁰ Notsofin'reo toko telo reo ny trompetra ary novakin'reo ny siny. Notananjareo tam'tagnana ankave reo jiro ary tam'tagnana ankavanana kosa reo trompetra mbô hitsofana an'zany. De nioraka mafy zareo hoe: "Ny sabatr'i Yaveh sy i Gideona." ²¹ Nitsangana nagnodidigna ny toby tam'fitôrany avy ny leilà daôly ary nilefa ny maramila Midiana daôly. De nagnantsoantso zareo sady vakilefa. ²² Rafa notsofinjareo ny trompetra telonjato, de nataon'i Yaveh nifamely tam'sabatra reo Midianita sy ny namany ary ny maramilany daôly. De nilefa hatraigny Beti-Sita hatraigny Zereraha ny maramila, hatraigny am'faritanin'i Abela-mehola, ankekin'i Tabata. ²³ Nantsovina mafy reo leilàn'i Israely avy aigny Naftaly, Asera, ary Manase daôly, ary nagnenjika ny Midiana zareo. ²⁴ De nagniraka mpitondra hafatra nagnerana ny tany antanetin'i Efraima daôly Godeona, nagnano hoe: "Mandiana midigna hanohitra ny Midiana ka araho maso ny ognin'i Jordana, hatraigny Beti-bara mba hampijanonana an'azy reo." De niara-nivory ny leilàn'i Efraima daôly ka nagnara-maso an'reo rano, hatraigny Beti-bara sy ny reniranon'i Jordana. ²⁵ Vôsambotr'zareo ny andrian'ny Midiana rôy, Oreba sy Zeba. Novonònjareo taigny am'vatoben'i Oreba i Oreba, ary novonònjareo taigny am'famiazam-bôlobok'i Zeba i Zeba. De nagnenjika ny Midiana zareo, ary nindesinjareo takeo amin'i Gideona ny lôn'i Oreba sy i Zeba, ze taigny am'lafiny raika ambadik'i Jordana.