¹ Fa iha koa, miresaky zay mifagnaraky amin'ny fampianara marina. ² Reo johary fa nahazo tao la tsy maintsy mahay mitondra tena , maotina, mahanon-tena, matanjaky amin'ny finoa, amin'ny hatea, voho amin'ny fahareta. ³ Manahaky gnan'io koa reo ampela fa nahazo tao la tokony hampiseho hatragny gny vatan-drozy ho soa fitondran-tena, fa tsy mpifosa. Tsy tokony ho andevozin'ny divay be rozy. Tokony hampianatra zay soa rozy ⁴ mba hampiofa reo ampela tanora ho tena tea gny valy aman-janany manoka. ⁵ Tokony hampianatsy gnan-drozy hahonon-tena, halio, hikarakara tokantrano soa, voho hankato gny valiny rozy. Tokony hanao gnan'io raha iaby io rozy mba tsy ho voaheso gny Safan-Dranagnahary. ⁶ Manahaky gnan'io, ampaherezo reo johary mbo tanora mba hahonon-tena. ⁷ Amin'ny fomba iaby la asehoy gny vatanao ho modelin'ireo asa soa; voho lafa mampianatra iha, la manehoa fahitia voho fahamendrea. ⁸ Milaza hafatsy salama voho tsy misy tsiny, mba ho megnatsy zay manohitsy na ia ia, fotony tsy mana na ino ino raty ho resahy mikasiky gnantsika ie. ⁹ Reo mpanompo la tokony hankato gny tompony amin'ny raha iaby. Hanao zay sitrapony fa tsy hifamaly aminy. ¹⁰ Tsy tokony hangalangalatsy rozy. Fa koa, tokony haneho gny finoa soa iaby rozy, mba hampahamendriky gny fampianarantsika mikasiky gnan-Dranagnahary mpamonjy gnantsika amin'ny lafiny iaby. ¹¹ Fa fa niseho tamin'ny olo iaby gny fahasoavan-Dranagnahary. ¹² Mampinatsy gnantsika handa gny toetra tsy araky gnan-Dranagnahary voho gny filan'izao tontolo zao io. Mampianatsy gnantsika hiay am-pihonona, am-pahamarigna, voho araky gny lalan-Dranagnahary amin'izao vanim-potoa zao zay handrambesantsika gny fanantena mahafinaritsy, gny fisehoan'ny voninahitsy gny Ndranagnaharintsika bevata voho Mpamonjy Jesosy Kristy. ¹⁴ Jesosy la nanolotsy gny vatany ho gnantsika mba hagnavotsy gnantsika hiala amin'ny tsy fagnarahan-dalagna iaby voho hagnadiova, ho gnan'ny vatany, olo raiky manoka zay tena mazoto hanao asa soa. ¹⁵ Ambarao voho andeso ampahereza reo raha reo. Magnomeza fagnitsia amin'ny fahefa iaby. Ka enga hisy olo hanao tsinontsino gnanao.