¹ Avy tan-tondako tao iaho,ry longoko, ry asondrotsiko; fa namory gny miorako mbaminy gny raha magnitsiko iaho. Fa nihina gny rononoko iaho. Hoy gny nama misafa ami-gny reo malala Mihinana; ry nama, minoma voho ao ho mamony gny hatea. Hoy gny Somonjara misafa ami-gny vatany. ² Nandry iaho, nefa gny foko la nifoha tagnainy nofy tao.Kay gny feoni-gny malalako mandondo voho nanao hoe: "vahao iaho, ry longoko, ry pizoko, ry malioko, fa hotsaky gny ando gny lohako, antsiky andoni-gny haly gny voloko." ³ "Fa namotaky gny akanjolavako iaho; la tsy maintsy hanao gnany zay indraiky va? Fa nisinasko gny tomboko; la tsy maintsy ho lotoako va? ⁴ Nampilitsy gny tagnany tami-gny fisokafany gny hilim-baravara eo gny malalako, voho nientanenta ho gn'azy gny foko. ⁵ Nitsanga iaho mba hamoha gny varavara ho gnany gny malalako; nitete miora gny tagnako, nisy ranony miora gny ratsan-tagnako, tami-gny famoham-baravara eo. ⁶ Nanokatsy gny varavara ho gnany malalako iaho, nefa nihodiky gny malalako ka nandeha.Tofotsy gny foko; nanjary kivy iaho. Nila gn'azy iaho, nefa tsy jeriko ie; nikaiky gn'azy iaho, nefa tsy namaly gn'ahy ie. ⁷ Gny mpiamby nandeha tami-gny tana nahita gn'ahy; nivinangon-drozy iaho voho nifineriny; gny mpiamby tami-gny manda tegny nangalaky gny sikiko tagnamiko. Hoy gnasany somonjara nisafa tami-gn'ampela tan-tana tao ⁸ Teako hampagnantegna nareo, ry gnanak'ampelan'i Jerosalema, fa laha jerinareo gny malalako, la volagno gn'azy fa marary nohony gny hateako gn'azy iaho.Hoy gn'ampela tan-tana tao niresaky tami-gny somonjara ⁹ Nagnino gny malalanao ro soa tozay gny malalany hafa, ro la mangataky gnanay hanao hajohajo manahaky gnany zao iha? Hoy gny somonjara nisafa tami-gn'ampelany gny tana. ¹⁰ Gny malalako la mamiratsy sady mena, tsy manam-paharoa ami-gny reo agn'aliny. ¹¹ Gny lohany la volamena soa mare, gny volony la olioly sady mainty manahaky gny gagnaky. ¹² Gny masony la manahaky gny pizo agnilany gny rian-drano, nisinasa tami-gny ronono, nitinohitohy manahaky gny ravaky. ¹³ Gny fifiny la manahaky gny fandrian-draha magnitsy, mamokatsy hagnitsy mamerover. Gny sogniny la lilia, mitete miora. ¹⁴ Gny sandriny la voahodidy volamena natao ravaky, gny sarotrony la ivory voasaro safira. ¹⁵ Gny tombony la andry vita ami-gny marba, mifototsy ami-gny volamena tsy miharo; gny endrikiny la manahaky gnan'i Libanona, tsiriry manahaky gny sedera. ¹⁶ Gny vavany la mamy mare; maha te ho tea fatratry ie.Zay gny malalako, voho zay gny sakaizako, ry anak'ampelan'i Jerosalema.