¹ Sady laha niala tao an-kianjan'ny tempoly Jesosy, la niresaky taminy gny raiky tamin'ireo mpianany hoe:" Mpampianatsa o, Jereo gny hasoan'ny vato voho gny hasoan'ny rafitsy!" ² Hoy ie taminy hoe:" Hitanao va reto rafitsy bevata reto? Tsy henga hisy vato raiky hifanongoa eo ka tsy harava." ³ Sady laha nipetraky teo an-tendrombohits'Oliva tandrifin'ny tempoly Ie, la nagnontany Gnazy mangingina Petera, Jakoba, Jaona voho Andrea hoe:" ⁴ Lazao aminay, mbia ro hitranga io raha iaby io? Ino ro famantara lafa hitranga reo raha reo?" ⁵ Sady Jesosy nanomboky niresaky tamin-drozy hoe:" Mitandrema mba tsy hisy olo hampivily lala gnanareo. ⁶ Fa maro ro ho avy amin'ny agnarako voho hilaza hoe:" Zaho ro Ie, voho maro ro voafitany. ⁷ Lafa mahare aly voho resabe momban'y aly nareo, la ka manahy ; tsy maintsy hitranga reo, fa mbo tsy zay gny farany. ⁸ Fa hisy firenena hitsanga hamely firenena, voho hisy fanjakana hamely fanjakana. Voho hisy horohoron-tany amin'ny toerana maro, sady hisy mosary. Io ro fiandohan'ny fahorian'ny fiteraha. ⁹ Mitandrema nareo . Hatolon-drozy amin'ny Synedriona nareo, ka hovangoa ao amin'ny Synagoga. Hitsanga magnatriky re mpanapaky voho reo mpanjaka noho gny Amiko nareo, ho vavolombelo amin-drozy. ¹⁰ Fa gny Fialazantsara la tsy maintsy hotory agny amin'ny firenena iaby aloha. ¹¹ Lafa manambotsy voho manolotsy gnanareo rozy, la ka manahy gny amin'izay tokony ho resahinareo. Fa amin'igny ora igny, la hamea gnanareo zay tokony ho resahinareo; tsy nareo akory ro hiresaky, fa gny Fagnahy Masina. ¹² Gny rahalahy hanolotsy gny rahalahiny ho maty, voho gny babany hanolotsy gnanany. Gny anaky hitsanga hanohitsy gnan-drozy. ¹³ Ho halan'ny olo iaby nareo noho gny Agnarako. Fa ndra ia ia maharitsy hatramin'ny farany, la ho voavonjy io olo io. ¹⁴ Fa laha hitanareo mitsanga eo amin'ny tsy tokony hitsanganany gny fahavetavetan'ny fandrava( ao hisaina zay mamaky) , la ao zay bakagny Jodia iaby handositsy egny an-tendrombohitsy, ¹⁵ zay ao an-tampon-tragno ao tsy hizotso ao an-tragno na hamoaky raha bakao amin'io, ¹⁶ voho zay agny an-tsaha ao tsy himpoly hangalaky gny sikiny. ¹⁷ Lozan'ireo ampela bevoka voho mampinono amin'io andro io! ¹⁸ Mivavaha nareo mba tsy ho amin'ny ririnina ro hitrangan'io. ¹⁹ Fa hisy fahoria bevata, zay mbo tsy nisy hatramin'ny voalohany, lafa namoro gnan'izao tontolo zao Ndranagnahary, ka mandrak'ankehitsiny, tsia , voho mandrakizay tsy hisy sasy io. ²⁰ Sady laha tsy hoe nohafehezin'ny Tompo io andro io, la tsy hisy nofo ho voavonjy. Fa nohon'ny olom-boafily, zay nifiliny, la nafohezin'ny isan'io andro io. ²¹ Sady laha misy olo miresaky aminao hoe:" Jereo , atoy Gny Kristy!" na koa hoe:' Jereo , egny Ie!" la ka mino gnan'io. ²² Fa hisy Kristy sandoky voho mpaminany sandoky hiseho ka haneho famantara voho fahagaga , mba hamitaha , ndra la gny olom-boafily aza, laha azo atao. ²³ Miambena! Fa voalazako taminareo mialoha gny fotoan'ireo raha iaby reo. ²⁴ Kanefa afaran'ny fahorian'ireo andro reo, la hihamahiky gny masoandro, gny vola tsy hagnome gny hazavany, ²⁵ reo kintana hiraraky bakegny amin'ny lanitsa voho reo hery zay ao an-dagnitsy ho hozongozonina. ²⁶ Ka ho jerin-drozy gny anakOlo bakegny amin'ny rahona amin'ny hery bevata voho voninahitsy. ²⁷ Sady hagniraky gny anjeliny Ie ka hamory miaraky reo olom-boafily bakagny amin'ny vazan-tany efatsy, bakagny amin'ny faran'ny tany ka hatragny amin'ny faran'ny lanitsa. ²⁸ Mangala lesona bakamin'ny hazon'aviavy. Laha vao magnaroky voho mandry gny rantsany, la hainareo fa mariniky gny lohatao. ²⁹ Manahaky gnan'io koa, laha vao hitanareo mitranga io raha iaby io, la hainareo fa fa mariniky Ie, magnariniky gny vavahady. ³⁰ Resahiko aminareo, marina tokoa, toy avorohota toy la tsy ho lany ritsy mandra-pitrangan'io raha iaby io. ³¹ Ho levona gny lanitsa voho tany, fa gny safako koa tsy mba ho rava mandrakizay. ³² Fa gny mahakasiky gnan'io andro na ora io, la tsy misy mahay, ndra la anjely agny an-dagnitsy aza, na gny Anaky , fa gny Ray avao. ³³ Mitandrema! Miambena, fotony tsy hainareo gny ora.( Fanamariha: Reo fahefa taloha la hoe: Mitandrema! Miambena voho mivavaha, fotony....) ³⁴ Io la manahaky gny johary raiky handeha lavitsy _nagnenga gny tragnony ie ka reo mpanompony ro nataony niandraikitsy gny tragnony, samby amin'ny raharahany aby, sady nandidy gny mpiamby Ie mba tsy hatory. ³⁵ Koa miambena, fotony tsy hainareo hoe mbia ro ho avy gny tompon-tragno; mety ho amin'ny hariva io, na amin'ny sasak'aly, na magneno akoho, na maray. ³⁶ Fa laha avy tampoky ie, la ka enga hahita gnanareo miroroie. ³⁷ Zay lazaiko aminareo la resahiko amin'ny olo iaby koa: Miambena!"