¹ Sady tamin'izay andro izay, la nandefa lily mibaiko zay mibaiko gny hanisa gny olo iaby miay eto amin'izao tontolo zao Aogosto Kaisara. ² Izay ro fanisam-bahoaky natao voalohany tamin'i Kyrenio ro mpanapaky tagny Syria. ³ Noho izay gny olon-drehetra la nagnagny amin'ny tana niaviany avy mba hisoratsy agnarana ho gnan'ny fanisam-bahoaky. ⁴ La nandeha niakatsy bakagny Galilia koa Josefa, bakagny an-tananan'ny Nazareta, ho agny Jodia, tanan'i Davida zay kinaiky hoe Betlehema, fotony ie baka amin'ny tragno voho fianakavian'i Davida. ⁵ Nandeha tagny ie mba hisoratsy agnara niaraky tamin'i Maria, zay fofom-baliny sady nitoe-jaza. ⁶ Sady laha mbo tagny rozy, la avy gny fotoa hiterahany gny anany. ⁷ Niteraky aja johary ie, anany voalohany, sady ie nandrakotsy lamban-jaza Gnazy voho nampandry Gnazy teo amin'ny fihinanam-bilo, fotony tsy nisy toera ho gnan-drozy tao amin'ny hotely. ⁸ Nisy mpiamby aondry tamin'izay faritsy izay zay nijano tagny am-baibo, niamby gny andian'andry tamin'ny haliky. ⁹ Nisy anjelin'ny tompo niseho tamin-drozy, sady gny voninahitsy gny Tompo namirapiratsy manodidy gnazy, sady feno tahotsy bevata rozy. ¹⁰ La nivola tamin-drozy gny anjely nanao hoe: " Ka matahotsy, fa handay vaovao soa zay handay hafalia bevata ho gnan'ny olo iaby aho. ¹¹ Androany la nisy mpanavotsy zay teraky ho gnanareo agny an-tanan'i Davida! Ie ro Kristy Tompo! ¹² Zao ro famantara zay homea gnanareo: Hahajery aja kelikely mirakotsy lamban-jaza sady mandry eo amin'ny fihinanam-bilo nareo." ¹³ Tampoky teo niaraky tamin'ny anjely, la nisy tafiky gny lagnitsy bevata nandrengy an-Dranagnahary nanao hoe: ¹⁴ " Voninahitsy ho an-Dranagnahary agny amin'ny abo mare, sady hisy fiadagna anie eto an-tany eo amin'ny olo zay ankasitrahany." ¹⁵ Sady lafa niala teo amin-drozy nagnagny an-dagnitsy reo anjely, gny mpiamby aondry nifampivola hoe: " Handeha tsika zao ho agny Betlehema, sady hijery zay raha-nitranga izay, zay nampahafantarin'ny Tompo antsika izay." ¹⁶ Nandeha malaky tagny rozy sady nahajery gnan'i Maria voho Josefa, sady nahajery gny aja kelikely nandry teo amin'ny tranon'aomby. ¹⁷ Tafaran'ny nahitan-drozy Gnazy, la nampahafantarin-drozy gny raha iaby nivolagniny rozy mikasiky io aja io. ¹⁸ Zay iaby nahaja zay la treriky gny amin'ny nambaran'ny mpiamby aondry tamin-drozy. ¹⁹ Fa Maria kosa nanohy nieritreritsy mikasiky gny raha iaby zay reny, sady nitahiry regny tao am-pony. ²⁰ Nimpoly reo mpiamby aondry, nagnome voninahitsy voho nankalaza an-Dranagnahary noho gny raha iaby zay njanjin-drozy voho hitan'ireo, araky zay nambarany tamin-drozy. ²¹ Lafa tapitsy gny andro fahavalo, lafa nitapahy Ie, la nomea agnara hoe Jesosy, gny agnara nomen'ny anjely Gnazy talohan'ny nametraha Gnazy tao an-kibo. ²² Sady lafa dila gny isan'ny andro nitakia hiliovany, araky gny lalan'i Mosesy, la ninday Gnazy niakatsy ho agny an-tempoly tao Jerosalema i Maria voho Josefa mba hanolotsy Gnazy eo amin'ny Tompo. ²³ Araky zay voasoratsy ao amin'ny lalan'ny Tompo hoe: " Gny johary iaby zay voaloha-teraky la hatoka ho gnan'ny Tompo." ²⁴ Noho izay la nanolotsy soro araky zay voalaza ao amin'ny lalan'ny Tompo rozy, " domohina roe na anaky voromailala roe." ²⁵ Sady ingo, nisy johary tagny Jerosalema, Simona ro agnarany, sady izay johary izay to voho mafana fo. Nila gny fampionogna an'Israely ie, sady tao aminy gny Fagnahy Masy. ²⁶ Nambaran'ny Fagnahy Masy taminy fa tsy hahajery fahafatesa mialohan'ny ahitany gny Kristin'ny Tompo ie. ²⁷ Nitarihin'ny Fagnahy , nagnagny an-tempoly Simona. Lafa nanday gnan'i Jesosy zazakely nilitsy gny ray aman-dreniny, mba hanao Gnazy araky gny fomba ao amin'ny lalagna, ²⁸ la nirambesiny ho egny an-tsandriny Ie sady nandrengy an-Dranagnahary voho nanao hoe: ²⁹ " Henanizao engao handeha am-piadagna gny mpanomponao, ry Tompo, araky gny safanao. ³⁰ Fa gny masoko nahajery gny famonjenao, ³¹ zay nomaninao teo amin'ny fanatrehan'ny olo iaby: ³² La fahazava ho fagnambara ho gnan'ny Jentilisa sady voninahitsy ho gnan'Israely olonao." ³³ Gny babany voho renin'ny aja la treriky tamin'ny raha nivolagniny mahakasiky Gnazy. ³⁴ Nitso-drano gnan-drozy Simona sady nivola tamin'i Maria reniny hoe: " Ingo, toy aja toy la voatendry ho amin'ny fandavoa voho fanandrata gny olon'Israely maro sady ho famantara zay niliery. ³⁵ Sady hisy meso handoaky gny fanahinao - mba ho voambara gny hevitsy gny fo maro." ³⁶ Nisy mpaminany ampela raiky kinaiky hoe Ana teo. Anak'ampelan'i Fanoela bak'amin'ny foko Asera ie. Tena antitsy ie. Nipetraky niaraky tamin'ny valiny fito tao tafaran'ny nahavirijiny gnazy ie, ³⁷ sady mpinday vata tagnatiny gny efatsy amby valopolo tao. Tsy nagnenga gny tempoly mihitsy ie fa nanompo tamin'ny fifalian-kany voho vavaky, andro aman'aly. ³⁸ Tamin'izay fotoa izay indrindra la namonjy mariniky gnan-drozy ie sady nanomboky nagnome fisaora an-Dranagnahary voho nivola gny mikasikin'ny aja tamin'ny olo iaby zay niamby gny fanavota gnan'i Jerosalema. ³⁹ Lafa nahavita gny raha iaby nasainy nataony araky gny lalan'ny Tompo rozy, la nimpoly tagny Galilia, agny amin'ny tanan-drozy agny Nazareta. ⁴⁰ Nihalehibe gny aja sady nihanatanjaky, nitombo fahendrea, sady gny fahasoavan-Dranagnahary la tao aminy. ⁴¹ Gny ray aman-dreniny la nagnagny Jerosalema isan-tao hamonjy gny Firavoravoan'ny Paska. ⁴² Lafa roe ambin'ny folo tao Ie, la nandeha nagnagny araky gny fomba fatao amin'ny fety ndraiky rozy. ⁴³ Sady lafa baka nipetraky tagny tagnatiny gny andron'ny fety iaby rozy, la nanomboky nimpoly noly rozy. Fa Jesosy aja johary nijano tagny Jerosalema nefa tsy hainy gny ray aman-dreniny izay. ⁴⁴ Nataon-drozy fa niaraky tamin'ny olo niaraky lia tamin-drozy Ie, la nandeha tagnatiny gny andro raiky manontolo rozy. Sady bakeo la nanomboky nila Gnazy tagny amin'ireo longony voho reo namany rozy. ⁴⁵ Lafa tsy jerin-drozy Ie, la nimpoly tagny Jerosalema rozy ka nanomboky nila Gnazy tagny. ⁴⁶ Lafa afaky telo andro, la jerin-drozy tao an-tempoly Ie, nipetraky teo agnivon'ireo mpampianatsy, ninjanjy gnan-drozy voho nametraky fanontania tamin-drozy. ⁴⁷ Zay iaby nahaja gnazy la treriky tamin'ny fahalalany voho reo valinteniny. ⁴⁸ Lafa nahajery Gnazy rozy, la talanjona. Gny reniny nivola taminy hoe: " Anaky, nagnino iha ro nanao manahaky zao gnanay? Njanjigno, zaho voho gny babanao nila gnanao tamin-tebiteby." ⁴⁹ Ie nivola tamin-drozy hoe: " Nagnino nareo ro mila Gnahy? Tsy hainareo va fa tsy maintsy ho ao an-tragnon'ny Babako Aho?" ⁵⁰ Fa tsy azon-drozy zay teany hambarany tamin'izay safa zay. ⁵¹ La noly niaraky tamin-drozy tagny Nazareta Ie sady nankato gnan-drozy. Gny reniny la nitahiry izay raha iaby izay tao am-pony. ⁵² Fa Jesosy nihanitombo fahendrea voho nitombo tena, sady nitombo fitea tamin-Dranagnahary voho gny olo.