¹ Maro gny niezaky nanoratsy tantara mahakasiky gny raha niseho ze tanteraky tagnamintsika teto, ² araky gny fomba fanomean-drozy gnazy tagnamintsika,ze fa vavolombelo fa nagnatry maso voho gny mpanompo gny teny bakam-boalohany. ³ Laha gnagnamiko avao koa magnaly mety - laha nagnadihady soa gny fandehan-draha iaby bakam-boalohany-gny hanoratsy tatitsy araky gny filaharany ho gnanao , ry Teofilo mendriky mare. ⁴ Izay la mba hahaizanao gny to mikasiky gny raha nampianary gnanao. ⁵ Tamign'andron' i Heroda, mpanjakan'ny Jodia, la nisy gny raiky tami-pisoro atao hoe Zakaria, avy mbakami'ny antokon' i Abia. Gny valiny bakamin'ny gn'anak' ampelan' i Arona, gn'agnarany la Elizabeta. ⁶ Samby to tagnatrehan-Dragnahary rozy, sady nagnaja gny lily iaby voho reo fitsipiky ny tompo. ⁷ Fe tsy mba nanagnanaky rozy, fotone tsy teraky Elizabeta, sady tena fa antitry koa rozy roa tamin'izay andro zay. ⁸ Ary zay la mahakasiky gnan' i zakaria teo amin'ny fagnatrehan-Dranagnahary, nagnantanteraky reo asa fisorogna araky gny fisolosoloan'ny isan-tokogna. ⁹ Araky gny fomba fataon-drozy gny amin'ny fifilia mpisoro zay tokony hanompo, la voafilin'ny Kodia kely hilitsy hagnoro gny emboky magnitry tao antranoben-Dranagnahary ie. ¹⁰ Tamin'ny fotoa nagnoroa gny emboky magnitry la nivavaky mbamonto begny gn' olo maro iaby. ¹¹ La nisy anjelin-Dragnahary niseho tagnaminy la nitsanga tankavanan'ny alitara nisy gny emboky magnitsy. ¹² lafa nahita gn'azy Zakaria la nanjary natahotry sady la feno tahotry ie. ¹³ Ka hoy gny anjely tagnaminy:"Ka matahotsy, ry Zakaria, fa nireko gny vavakao. Hivesatsy aja johary agnaminao Elizabeta valinao.Jaona ro hataonareo gnagnarany. ¹⁴ Hanam-pifalia voho haravoa iha, sady ho maro koa gny ho faly ami-gny hiterahany. ¹⁵ Fotony ho valagnatoky ie agnatrehan'ny Tompo. Tsy hino divay na raha finomy mahery koa ie, sady ho feno gny fanahy masy mbakagny an-kibon-dreniny ie. ¹⁶ Maro amign'ny vahoakin'Israely ro nitoliky amin'ny tompo Drahagnaharin-drozy. ¹⁷ Handeha eo alohan'ny Tompo amin'ny gny fanahy voho gny herin'Elia ie. Zay ro nataony mba hitolihan' ny gny fon'ny gny baba amin'ny gn'anaky, mba handenan-drozy ze tsy mankasitraky ami-gny lalan'ny fahendren'ny gny to mba hihetsegnan'ny gn'olo zay fa nioma ho gnan'ny Tompo zay fa niomany ho Azy. ¹⁸ Ka zakaria nivola tami-gny Anjely hoe:"ka manao akory gny hahaizako zay? zaho fa lahilahy antitry toy sady gny valiko koa lafa tena antitry." ¹⁹ ka hoy gn' Anjely namaly sady nivola tagnaminy:" Zaho ro Gabriela, zay mitsanga teo agnatrehan' Agnahary. Sady nirahy zaho mba hagnambara agnaminao,handay zao vaovao soa zao agnaminao. ²⁰ Ka ingo! Fa ho moa iha, ka tsy hoafaky hivola, mandra-pihavian' ny gn'andro hisehoan'i reo raha reo. Satria tsy nino gny volako iha, zay tsimaintsy ho tanteraky amign' andro voatendry. ²¹ ka gn' olo maro sahira nandigny an' i Zakaria . tseriky gnohon'ny fitsanganany ela tao an-tempoly rozy . ²² Lafa niboaky ie, la tsy niafaky nivola tagnaminy rozy. sady haindrozy fa nahita fahitana ie tao an-tempoly .Nanao baiko moa tamin-drozy ie sady nijano ho moa. ²³ Ka lafa niavy gn'andro hifaragnan'ny fanompoa, lasa noly tagny an-tragnony ie. ²⁴ Tafaran'ny gn' andro reo, la nivesatsy Elizabeta ka nietaky nandritsy gny dimy vola.Ka hoy ie hoe: ²⁵ " Zao gny nataon'ny Tompo lafa nahajilo ahy Ie mba hangala hegnatry ahy teo agnatrehan'ny gn'olo." ²⁶ Tamign' ny faha enim-bola, la nirahin-Dragnahary gny anjely Gabriela nandeha tagny amin'ny tana raiky tao Galilia atao hoe nazareta, ²⁷ ho agny aminy Virjiny raiky zay fofom-baly johary natao hoe Josefa. Agnisany taranak' i davida ie, sady gnagnaran' ny Virjiny Maria. ²⁸ Nandeha teo agnilany Ie sady nivola hoe:" Akory, lahy nihasoavy mare! Gny Tompo ho ao agnaminao." ²⁹ Fa la tena very hevitry tamin'ny gny volany Ie nanontany vata hoe fa fiaraba manao akory va zao. ³⁰ Ka hoy gny anjely tagnaminy:" ka matahotry, Maria, fa nahita fankasitraha tamin' Andriamanitry iha. ³¹ Ingo, fa hovesatry iha ka hiteraky zaza johary. Ka gnagnarany ho kaihanao hoe'Jesosy'. ³² Ho valagnatoky Ie ka hokaihy hoe anaky gny Avo. Gny Tompo Ndragnahary hanome azy gny seza fiandrianan'i Davida razambeny. ³³ ka hanjaka hatraminy farany amin'ny taranak'i Jakoba Ie, ka tsy hana fitampera gny fanjakany. ³⁴ Ka hoy Maria tamin' Anjely: Ka manao akory gny hofandehan' izay, fa mbo tsy nandry tambohon- johary zaho? " ³⁵ Gn' anjely namaly ka nivola tagnaminy hoe:"Hilatsaky agnaminao gny Fanahy masy, sady gny herinign' i Avo ro ho avy agnaminao. Ka lay masy hateraky la hokaihy hoe Anakin-Dranagnahaary ³⁶ Ingo, Elizabeta Ragninao hivesatsy johary koa dra fa antitry aza. Fa enim-bola gn'azy amizao, Ie ro nikaihy hoe tsiteraky. ³⁷ Fa satria tsy misy raha tsy ho tanteraky gny ami-Ndranagnahary. " ³⁸ Ka hoy Maria;" Ingo, fa zaho ro mpanompovavign'ny tompo. Mba ho tanteraky agnamiko zay hafatrinao zay." Ka niala tagnaminy teo gn' Anjely. ³⁹ Ka tamin'ny zay andro zay i maria niala ka nandeha mare tagny amin'ny gny tany abo, agny amin'ny tanan' i Jodia. ⁴⁰ nandeha tagny antragnon' izakaria Ie sady niarahaba an' i Elizabeta. ⁴¹ Sady lafa nahare gny fiaraban' i Maria Elizabeta, la nihetsiketsiky gn' aja tan-kibony tao, sady feno gny Fanahy masy Elizabeta. ⁴² nampiakatsy gny feony sy nivola mare ie hoe:"Nohasoavy noho gny ampela iaby iha, ka nohasoaviny gny hateraky gny kibonao. ⁴³ fa nagnino ro miseho agnamiko fa gny renin'i Ndranagnahary ro avy hamonjy gn'ahy? ⁴⁴ Fa ingo, lafa nireko gny fiarabanao, la nifalifaly gn' Aja agnaty kiboko ato. ⁴⁵ Sambatra zay nino fa hotanteraky gny raha nivolagnin'nyTompo tagnaminy." ⁴⁶ Hoy Maria:" Midera gn'any Tompo gny fagnahiko, ⁴⁷ Sady gny fagnahiko nifaly tao agnamin' Andriamanitra Mpamonjiko. ⁴⁸ Fa nagnety gny fahantran'ny gny mpanompo vaviny Ie. sady Ingo, manomboky androany gny taranaky iaby hikaiky ahy hoe sambatsy. ⁴⁹ Satria nanao raha bevata tagnamiko lay mahay gny raha iaby, sady Masy gnagnarany. ⁵⁰ Fa maharitry ho gnan'ny taranaky faramandimby zay matahotsy gn' Azy gny famindram-pony. ⁵¹ Nampiseho gny heriny tamin'ny gny sandriny Ie; Sady nagnaparitaky reo zay nibohaboha tagnamin'ny vetsivetsy gny fony rozy. ⁵² Nalany tamin'ny gny seza fiandriana gn' anakilahin'ny mpanjaka sady gny tam-bany nasondrony. ⁵³ Nataony vintsy raha soa reo mosary, fa gny nanam-panagna nampoliny tsy nana dra ino dra ino. ⁵⁴ Nagnomea fagnampea an' i Israely mpanompony Ie, mba hahatiarovany haneho famindram-po ⁵⁵ (laha gny nivolany tamin'ireo raintsika) tagnamin'i Abrahama voho gny avorohotany mandrakizay." ⁵⁶ Nijano nipetraky tao agnamin'i Elizabeta tokony ho telo vola i Maria bakeo nimpoly noly tagny an-tragnony. ⁵⁷ La niavy gn' andro hiterahan' i Elizabeta gnanany ka niteraky zaza johary Ie. ⁵⁸ Nahare gny famindram-po valagnatoky nataon'ny Tompo tagnaminy reo mpiharo tana agnaminy.voho reo longony, ka niaraky hafalia tagnaminy rozy. ⁵⁹ Tamign' ny andro faha folo la niavy gn' andro hisavara gn' aja reo. Fa ho nikaihin-drozy hoe "zakaria," manahaky gnagnaran'ny Babany Ie. ⁶⁰ Fa gny reniny koa namaly ka nivola hoe:" Aha! Jaona ro ikaiha gn'Azy." ⁶¹ Ka hoy rozy tagnaminy: " Tsy misy ami-gny longonao ro nikaihy tamin'ny agnara zay." ⁶² Nanao baiko moa tagnamin' ny baba-drozy rozy gny ho fikaiha gnazy. ⁶³ Nangataky solaitry fanorata babany sady nanoratry hoe:"Jaona ro hatao gnagnarany." La nitseriky tamizay rozy iaby. ⁶⁴ Ka niatomboky tamizay la nisokatsy gny vavany sady nafaha gny lelany. Nirehaky ie sady nidera Andranagnarary. ⁶⁵ La niavy tagnamindrozy vory iaby teo gny tahotry. Ka niely manera gny tana abon'i Jodia gny raha niseho iaby. ⁶⁶ Ka gny nahare iaby teo la nandray am-po iaby, ka nivola hoe:" ho lasa ino roahy zaza toy io?" Fa mandrakotry azy gny tagnan'ny Tompo. ⁶⁷ La nifeno gny fagnahy masy i Zakaria babany sady naminany, ka nivola hoe: ⁶⁸ "Deraina anie ny tompo, Andriamagnitr' Israely, Fa niavy nagnampy voho nagnatanteraky gny fagnafaha tagn'aminy gn' olony Ie. ⁶⁹ Nanondrotry avo gny tandrom-pagnavota ho gnantsika tao an-tragnon'i Davida mpanompony Ie, ⁷⁰ tahaky gny raha nivolaniny tagnamin'ny gny vavan' ireo mpaminany masy tamin' ny gn' andro taloha tagny. ⁷¹ Handay famonjea ami-gny fahavalontsika voho gnagnamin'ny tanan' ireo iaby tsy teagn' antsika Ie. ⁷² Izay ro hataony la gny mba hampisehoa gny famindram-po amin'ireo babantsika voho hampatiarova gny fanekem-pilongoany Masy, ⁷³ la gny fiaigna nivolagniny tamin'i Abrahama babatsika. ⁷⁴ Niania gny hahazoantsika, lafa afaky tamin'ny tanan'ny fahavalontsika, manompo Gnazy tsy amin-tahotsy, ⁷⁵ am-pahamasina voho am-paharigna eo agnatrehany amin'ny androntsika iaby. ⁷⁶ Eka, sady iha, ry aja, la ho kaihy hoe mpaminan'ny Abo mare, fa handeha hialoha gny tavan'ny Tompo iha sady hagnamboatsy gny lalany, mba hanoma gn'olo gny ami-gny hiaviany, ⁷⁷ mba hagnome fahalalam-pamonjea ho gnan'ny olony amin'ny alalan'ny famela gny helon-drozy. ⁷⁸ Izay ro hiseho la nohon'ny famindram-po masin'ny Ndranagnaharintsika, nohon'ny amin'izay ro hiposahan'ny masoandro baka amin'ny abo mba ho ho avy hagnampy gnantsika, ⁷⁹ hanagnazava gnan'ireo zay mipetraky ao agnatin'ny maiky voho reo ao agnatin'ny aloky gny fahafatesa. Hataony zay mba hitariha gny tombontsika amin'ny lalam-piadagna." ⁸⁰ Sady gny aja la nitombo sady lasa nahery amin'ny fagnahy, sady tagny agn'efitsy ie mandra-piavian'ny andro hiseahoany ankarihary amin'Israely.