Reto gny safa tagnatin'ny taratasy ze nalefan'i Jeremia mpaminany baka Jerosalema agny igny ho gnan'ireo loholona sisa tavela tamin'ireo babo voho tamin'ireo mpisoro,reo mpaminany,voho reo vahoaky ze nataon'i Nebokadnezara sesin-tany baka Jeresalema agny nagnagny Babylona. ² Zay la tafaran'ny nandefasa gnan'i Jekonia mpanjaka,voho gny regny mpanjaka ampela,voho reo manam-pahefa ambony,gny mpitariky gnan'i Joda voho Jerosalema,voho reo mpanao asan-tagna tagny Jerosalema. ³ Nampandesiny gnan'i Elesa anakin'i Safana voho Gemaria anakin'i Hilkia ze nirahin'i Zedekia mpanjakan'i Joda,tagny amin'i Nabokadnezara mpanjakan'i Babylona,gny taratasy. ⁴ Zao ro volagnin'ny taratasy igny:"Yaveh tompon'ny gny maro,Andrianagnarin'Israely,mivola gnan'injao amin'ireo babo iaby ze nataoko sesi-tany baka Jerosalema ho agny Egypta agny: ⁵ Magnamboara tragno voho mifitara ao.Mambolea zariday voho hano gny voany. ⁶ Mangala valy ka miteraha anakilahy voho anakampela agnaminy.La angalao valy gn'anakilahinareo ,voho ameo valy gnanakareo ampela.Aoky rozy hiteraky anakilahy voho anak'ampela ka ampitombo reo tsy noho tsy ampy mare nareo. ⁷ Ilao gny fiadagnan'ny gny tana ze nagnanovako gnanareo Sesi-tany,voho mivavaha agnamiko ho gnan'izay fotony hisy fiadagna ho gnanao ao laha ao gny fiadagna. ⁸ Fa Yaveh tompon'ny gny maro,Andrianagnaharin'Israely,la nivola zao:"Ka magnenga gnan'ireo mpaminany ze agnivonareo voho gny mpisikily hamitaky gnanareo,voho ka minjanjy gny nofy ze nofisinareo. ⁹ Fa rozy la maminany fitaky agnaminareo amin'ny agnarako.Tsy nandefa gnan-drozy Zaho,zay ro fagnambaran'i Yaveh." ¹⁰ Fa zao ro volan'i Yaveh:"Lafa nanapaky gnanareo tagnatin'ny fitopolo tao Babylona,la hagnampy gnanareo Zaho ka hagnatanteraky gny safa soako ho gnanareo mba hampimpolia gnanareo amin'itoy toera toy. ¹¹ Fa Zaho vatako ro mahay gny fagniriako ho gnanareo,zay ro fagnambaran'i Yaveh,fagniria fiadana fa tsy loza,mba hagnome fanantena gnanareo ho amin'ny gny hoavy. ¹² La hikaiky Gnahy nareo,voho handeha hivavaky Agnamiko,la hinjanjy gnanareo Zaho. ¹³ Fa hila Gnahy nareo ka hahita Gnahy,fotony hila Gnahy amin'ny fonareo iaby nareo. ¹⁴ Ka la hohitanareo Zaho,zay ro fagnambaran'i Yaveh,la hampoliko gny hanagnanareo;havoriko bakamin'ny tana voho toera iaby nagnelezako nanareo nareo,zay ro fagnambaran'i Yaveh,fa hampimpoly gnanareo agny amin'ny toera ze nagnanovako gnanareo sesitany Zaho. ¹⁵ Fotony nareo nivola faa Yaveh la nanandratsy mpaminany ho gnanay agny Babylona, ¹⁶ la zao ro nivolagnin'i Yaveh amin'ny mpanjaka ze mifitaky amin'ny seza fiandrianan'i Davida voho amin'ireo olo iaby ze mifitaky amin'izay tana zay,gny rahalahinareo ze mbo tsy niboaky ho babo nisondry tagnaminareo ¹⁷ Zao ro volanin'i Yaveh tompon'ny gny maro:"Ingo,handefa meso,mosary,voho arety amin-drozy Zaho.Fa hataoko manahaky gny aviavy lo ze vatany raty laha hohany rozy. ¹⁸ La hagnia gnan-drozy amin'ny gny meso,mosary,voho gn'arety mandrava Zaho voho hanao gnan-drozy ho mahamontsa amason'ny gny fanjakan'ny tany iaby,gny horohoro,fitaova fagnozona voho mampifiopioky,voho raha mahamegnatsy amin'ny tana iaby ze nagnelezako gnazy. ¹⁹ Zay la fotony tsy ninjanjy gny safako rozy,zay ro fagnambaran'i Yaveh,ze nalefako tamin-drozy tamin'ny alalan'ireo mpaminany manompoko.Nandefa gnan-drozy begnibegny Zaho,fe tsy ninjanjy nareo,zay ro fagnambaran'i Yaveh. ²⁰ Ka janjigno gny safan'i Yaveh,nareo natao sesitany iaby ze nalefany baka Jerosalema agny ka ho agny Babylona: ²¹ Yaveh tompon'ny maro,Andrianagnaharin'i Israely,la nivola gnan'izao mikasiky gnan'i Ahaba anakin'i Kolaia voho Zedekia anakin'i Mahaseia,ze maminany vandy tagnaminareo amin'ny agnarako:"Ingo ,hametraky gnan-droozy an-tagnan'i Nebokadnezara mpanjakan'i Babylona Zaho.Hamono gnan-drozy amasonareo Ie. ²² La hisy ozo ho volagnin'ireo babon'i Joda iaby agny Babylona mikasiky reo olo reo.gny ozo la manao hoe:Hataon'i Yaveh manahaky gnan'i Zadekia voho Ahaba lahy nareo,ze natonon'ny mpanjakan'ny Babylona tamin'ny bolo. ²³ Hiseho zay noho reo raha mahamegnatsy ze nataon-drozy tagny Israely lafa nijangajanga tamin'ny valin'ny gny namany voho nivola safa vandy tamin'ny gn'agnarako,raha ze mbo nandidiako gnan-drozy ho volagny mihintsy.Fa Zaho azy mahay;Zaho ro vavolombelo,zay ro fagnambaran'i Yaveh." ²⁴ "Laha gny amin'i Semaia Nehelamita,la zao volagno: ²⁵ Zao ro volagnin'i Yaveh tompon'ny gny maro,Andrianagnaharin'Israely:Fotony iha nandefa taratasy tamin'ny gn'agnaranao avao tamin'ny gn'olo iaby tagny Jerosalema,tamin'i Zefania anakin'i Masaia mpisoro,voho tamin'ny mpisoro iaby,ka nivola hoe: ²⁶ "Yaveh nanao gnanareo ho mpisoro fa tsy Joiada mpisoro,mba hiandraiketanareo gny tragnon'i Yaveh.Iha ro mifehy gn'olo iaby ze trobo say voho manao gny vatan-drozy ho mpaminany.Tokony ho gadra voho hofatora amin'ny seny vy rozy. ²⁷ Ka henan'izao,nagnino nareo ro tsy nivola mare gnan'i Jeremia gny amin'i Anatota,ze manao gny vatany ho mpaminany manohitsy gnanareo? ²⁸ Fa nagniraky ho gnanzy tagny Babylona ie ka nivola hoe:"Mbo ho ela zay.Magnoregna tragno voho mifitara ao,mamboea zariday ka hano gny vaoany." ²⁹ Namaky toy taratasy toy Zefania mpaminany tan-tsofin'i Jeremia mpaminany. ³⁰ La niavy tamin'i Jeremia gny safan'i Yaveh,manao hoe: ³¹ "Mandefasa safa amin'ireo sesitany iaby ka volagno hoe:"Zao ro volan'i Yaveh mikasiky gnan'i Semaia Nehelamita:Fotony fa naminany taminareo Semaia lafa tsy nandefa gnazy Zaho,ka nitariky gnanareo hagneky vandy, ³² noho zay la zao ro volagnin'i Yaveh:Ingo,fa hagnasazy gnan'i Semaia Nahalemita voho reo havorohotany amin'ny gn'oloko ,zay ro fagnambaran'i Yaveh,fa nagnely fanohera hanohitsy gnan'i Yaveh ie."