¹ Sady Yaveh nisafa tamy Mosesy sady hoy gnataony: ² " Amy andro voalohany gny vola voalohany gny tao vaovao la tsy maintsy hatsanganao gny tabernakely,gny lay fihaogna. ³ Apetraho ao amizay gny fiarany gny vavolombelo,sady ajarinao amy gny siky gny fiara. ⁴ Andeso eo amy gny latabo sady alaharo reo raha ze tokony ho amizay. La andeso gny fanovan-jiro sady apetraho reo jiro. ⁵ Apetraho magnatriky gny fiarany gny vavolombelo gny alitara volamena zay misy gny ditin-kazo magnitsy,sady apetraho gny siky eoamin'gny filiran'ny tabernakely. ⁶ Apetraho eo agnilany gny filira magnagny amy gny tabernakely,ilay lay fihaogna,gny alitarany gny fagnatitsy oroa. ⁷ Apetraho eo agnelagnelan'gny lay fihaogna voho gny alitara gny koveta bevata sady asio rano ao agnatiny. ⁸ Antsangano magnodidy any zay gny kianja,sady ahantogno eo amin'gny filirany gny kianja gny siky. ⁹ Ka alao gny dililo fagnosora sady aosoro gny tabernakely voho gny raha iaby ao agnatiny. Atokano ho Gnahy zay voho gny enta iaby,ka la ho masy. ¹⁰ Hosoro gny alitarany gny fagnatitsy oroa voho entany iaby. Atokagno Gnahy gny alitara sady tena ho masy Gnahy. ¹¹ Hosoro gny koveta varahina voho faladiany sady atokano ho Gnahy. ¹² Handesinao i Arona voho anakilahiny reo ho eo amy gny filirany gny lay fihaogna sady sasao amy gny rano rozy. ¹³ Hampisikininao amin'reo ankanjony zay natoka ho Gnahy i Arona,Hosoro ie sady atokano mba hanompo ho mpisoro. ¹⁴ Nandesinao anakilahiny reo sady ampisikino akanjo lava rozy. ¹⁵ Hosoro manahaky nagnosoranao gny rainy rozy mba hanompo Gnahy ho mpisoro. Gny fagnosora an-drozy la hahatongan-drozy ho fisorogna maharitsy hatramin'reo avorohotany afara." ¹⁶ Reo gny raha nataon'iMosesy;narahiny aby gny raha fa nandidian'i Yaveh gnazy. Nataony raha iaby zay. ¹⁷ Sady la voatsanga tamy gny andro voalohany vola voalohany tamy gny tao faharoe gny tabernakely. ¹⁸ Nananga gny tabernakely Mosesy,nametraky gny tombon'io tamy gny fipetrahany,nananga gny lafin'io,nampitambatsy gny barany,sady nananga reo andry voho reo tsangatsangan'io. ¹⁹ Naparitany manera gny tabernakely gny fandrakofa sady napetrany magnodidy azy lay,araky zay fa nandidian'i Yaveh. ²⁰ Nalany gny didiny gny fagnenkea sady napetrany tao agnatiny gny fiara reo. Nametraky bao teo amy gny fiara avao koa ie,sady mbo nametraky gny sarom-pagnavota tamin'io. ²¹ Nananga siky ho gnan'io mba hiaro gny fiarany gny vavolombelo,araky gny nandidian'i Yaveh gnazy. ²² Napetrany tao agnatiny lay fihaogna gny latabo,la teo amy gny ilany avaratsy gny tabernakely,ambohony gny siky. ²³ Nalahatsiny tagnabo latabo teo agnatrehan'i Yaveh gny mofo,araky gny fa nandidian'i Yaveh gnazy. ²⁴ Napetrany tagnaty lay fihaogna gny fanovan-jiro,tandrify gny latabo,teo antimony gny tabernakely. ²⁵ Namelo jiro tagnatrehan'i Yaveh ie,araky gny fa nandidian'i Yaveh gnazy . ²⁶ Napetrany tao amy gny lay fihaognamanoloa gny sikiny gny alitara volamena misy didin-kazo magnitsy. ²⁷ Nagnoro ditin-kazo magnitsy taminy zay ie,araky fa nandidian'i Yaveh gnazy. ²⁸ Nahantony teo amin'gny filira teo amin'gny tabernakely gny siky. ²⁹ Napetrany teo amin'gny filira gny tabernakely,ilay lay fihaognagny alitarany gny rakitsy oroa. Nanolotsy rakitsy oroa voho vary ho fagnatitsy tamy zay ie,araky gny fa nandidian'i Yaveh gnazy. ³⁰ Napetrany teo agnelagnelany gny lay fihaogna voho gny alitara gny kovety bevata,sady nasiany rano tagnatiny ao mba hisasa. ³¹ Mosesy,Arona voho reo anakilahiny nanasa gny tagnany voho gny tombon-drozy tao amy gny koveta bevata ³² na mbia mbia handehanan-drozy ao amy gny lay fihaogna,sady na mbia mbia hiakaran-drozy egny amy gny alitara. Nanasa gny vatany rozy,araky gny fa nandidian'i Yaveh gnan'i Mosesy. ³³ Nananga gny kianja nagnodidy gny tabernakely voho gny alitara mosesy. Nananga gny siky teo amy gny filiran'ny kianja ie. Izay gny fomba nahavitan'i Mosesy gny asa. ³⁴ La gny hiboky nandrakotry gny lay fihaogna,sady gny voninahitr'i Yaveh nagneniky gny tabernakely. ³⁵ Tsy afaky nitsofoky tao amy gny lay fihaogna Mosesy fotony fa nipetraky tamy zay gny hiboky,sady fa nagneniky gny tabernakely gny voninahitr'i Yaveh. ³⁶ Na mbia mbia ro niarehany gny hiboky bakao amy tabernakely,gny fokonolon' Israely la nandeha tamy gny lian-drozy. ³⁷ Fa laha tsy niakatsy bakamy gny tabernakely gny hiboky,la tsy nandeha gny fokonolo. Nijano teo rozy hatramy gny andro zay niakarany zay. ³⁸ Fa gny hibok'i Yaveh la teo agnabony gny tabernakely gny andro,sady gny bolo teo amy zay tamy gnaly,teo nagnatsiky gny fokonolon' Israely iaby nandritra gny lian-drozy.