¹ Tamy gny volon'aomby manga,volomparasy,sady jaky mena,la nagnamboatsy akanjo rary matify ho gnan'ny fanompoa ao amy gny tana masy rozy. Nagnamboatsy akanjo ho gnan'i Arona rozy ho gnan'ny tana masy,araky zay nandidian'i Yaveh gnan'i Mosesy. ² Bezalila nagnamboatsy gny salampy vita amy gny volamena,manga,volomparasy,voho volon'aondry mena matroky,sady tamy gny hasim-bazaha foty maliniky. Nopotehin-drozy gny volamena sady ³ Notapahin-drozy ho foly,mba hampiasa gnazy reo amy gny siky manga,volomparasy,volon'aondry mena matroka,sady hasim-bazaha foty maliniky,zay asany gny mpiasa mahay raha. ⁴ Nagnamboatsy saron-tsoroky ho gnan'ny salampy volamena rozy,la nampiarahin-drozy teo amin'reo zorony roe agnabo zany. ⁵ Sasy reo fehy troky voataly maliniky la mitovy amy gny salampy,zay la vita bakamy gny hasin-bazaha voatenona maliniky zay volamena,manga,volomparasy,sady jaky mena,araky zay nandidian'i Yaveh gnan'i Mosesy. ⁶ Namboarin-drozy gny vato berila,la nofognosin-drozy tamy gny randram-bolamena,la nosoraty manahaky gny fitombokase,sady nosoraty niaraky tamy gny agnaran'ireo foloroamby lahy anak'Israely zany. ⁷ Sady la napetrak'i Bezalila teo amy gny saron-tsoroky gny salampy reo mba ho vato fampahatiarova gnan'i Yaveh gny amin'reo anak'Israely folo roamby lahy,araky gny nandidian'i Yaveh gnan'i Mosesy. ⁸ Nanao saron-tratra ie,manahaky gny nagnamboara gny salampy,zay asany mpiasa mahay raha. La nataony tamy gny volamena,manga,volomparasy voho volon'aondry jaky,sady hasim-bazaha foty maliniky. ⁹ Joro efatsy io. Sady naforotsin-drozy roe gny saron-tratra. La felatagna raiky gny halavan'io sady felatagna raiky gny velarany. ¹⁰ Nataon-drozy tamy gny andala efatry reo vato soa. Gny andala voalohany la robia,topazy,sady garnety. ¹¹ Gny andala faharoe la nisy emeralda,safira,sady diamondra. ¹² Gny andala fahatelo la nisy jasinta,agaty,sady ametista. ¹³ Gny andala faha efatry la nisy berila,oniksa,sady jaspera. La nasia tsangam-bolamena reo vato reo. ¹⁴ Nalany tamy gny agnaran'ireo anak'Israely folo roamby lahy reo vato,la nalahatsy araky gny agnarany,iaby zay. Manahaky gny tombokase reo,sady gny agnara kiraikiraiky aby la nagnambara gny raiky amin'ireo foko foloroamby. ¹⁵ Nagnamboatsy rojo manahaky gny foly teo amy gny saron-tratra rozy,zay nagnandra tamy gny volamena tsy mifangaro. ¹⁶ Nagnamboatsy mason-drojo volamena roe voho tsangam-bolamena roe rozy,sady nampetran-drozy teo amy gny zoron'ny saron-tratra roe reo mason-drojo roe. ¹⁷ Napetran-drozy reo tamy gny mason-drojo roe gny tsangam-bolamena roe teo an-joron'ireo saron-tratra. ¹⁸ Napetran-drozy teo amy gny tsangam-bolamena gny rojo roe voataly. La napetran-drozy teo amy gny saron-tsoroky gny salampy bakeo agnilany io. ¹⁹ Nagnamboatsy mason-drojo volamena roe rozy sady napetrany tamy gny zorony gny saron-tratra hafa anakiroe zay,teo amy gny sisiny agnilan'ny zorony agnatiny. ²⁰ Nagnamboatsy mason-drojo volamena roe hafa avao koa rozy sady nataon-drozy teo amy gny amoron'ny saron-tsoroky anakiroe bakeo agnilan'gny salampy,teo agnilan'gny trebiky agnabony gny troky voanony gny salampy. ²¹ Nafehin-drozy niaraky tamy gny foly manga tamy gn'alalany gny mason-drojony teo amy gny mason-drojony gny salampy gny saron-tratra. Natao zay mba tsy hampiombotsy amy gny salampy gny saron-tratra.Araky gny nandidian'i Yaveh gnan'i Mosesy. ²² Namboarin'i Bezalila tamy gny siky volomparasy tanteraky gny akanjo,zay asany gny mpagnenogneno. ²³ Sady nisy fitsofa rano agnivony. Nisy tenona teo amy gny magnodidy gny fisokafany mba tsy tataky. ²⁴ Namboarin-drozy apongaben-dagnitsy vita amy gny foly manga,volomparasy,jaky mena,sady hasin-bazaha foty maliniky,teo amy gny moron-tombony. ²⁵ Nagnamboatsy lakolosy volamena tsy miharo rozy,sady napetran-drozy teo agnelagnelan'ny apongaben-dagnitsy magnodidy gny sisiny gny moron-tombon'akanjo,mifagnelagnela amin'ireo apongaben-dagnitsy__ ²⁶ Lakolosy la apongaben-dagnitsy,lakolosy la apongaben-dagnitsy__ teo amy gny sisiny gny akanjo ho gnan'i Arona mba hanompoany ao. Zay araky gny nandidian'i Yaveh gnan'i Mosesy. ²⁷ Namboarin-drozy ho gnan'i Arona voho reo gnanany lay akanjo hasin-bazaha foty malinily. ²⁸ Nanao gny hasin'bazaha foty maliniky,gny fehy loha hasim-bazaha foty maliniky,gny agnatin'akanjo hasim-bazaha foty maliniky,voho gny satroky vita amy gny hasim-bazaha foty maliniky ²⁹ sady jaky mena,ho asany gny mpanao peta-kofehy rozy zay la araky gny nandidian'iYaveh gnan'i Mosesy. ³⁰ La nagnamboatsy gny takelam-bolamena tsy mifangarony gny satro-boninahitsy masy rozy;la nosoratin-drozy taminy zay manahaky gny soratry eo amy gny fitombokase hoe: " Masigna ho gnan'i Yaveh." ³¹ La nopotehin-drozy reo foly manga teo amy gny tompon'ilay hamama. La araky gny nandidian'i Yaveh gnan'i Mosesy. ³² Ka la vita gny asa fanova tabernakely,lay tragno lay fihaogna. Nataony gny fokonolol'Israely gny raha iaby. Narahin-drozy gny torolala iaby ze namean'i Yaveh gnan'i Mosesy. ³³ Nandesin-drozy tamin'i Mosesy gny tabernakely__gny lay voho reo fitaova iaby,gny jiangrafiny,gny rafiny,gny barany,gny tsangatsangany,gny faladiany, ³⁴ gny fagnarogna vita amy gny holitr'aondry lahy mena loko,gny fandrakofa vita amy gny holitsy lambondriaky,voho gny siky agnajaria, ³⁵ gny saronam-pamonjena. ³⁶ Nandesin-drozy gny latabo,gny enta iaby,voho gny mofony gny fagnatreha; ³⁷ gny fanovan-jiro volamena tsy miharo voho reo jiro tao amy gny tana,miaraky amin'ireo fitaova voho reo soliky fatao amy jiro; ³⁸ gny alitara volamena,gny dililo fagnosora voho gny ditin-kazo manam-pofo,gny fefy sikiny gny filira ao amy gny tabernakely; ³⁹ gny alitara varahina miaraky amy gny varahina makarakara voho gny baony sady gny fanaka voho gny koveta miaraky amy gny faladiany. ⁴⁰ Nandesin-drozy gny fefy siky ho gnan'ny kianja miaraky amy gny tsangatsangany voho gny faladiany;sady gny siky ho gnan'ny filira eo an-kianja;reo taly voho gny fihatognany gny lay;voho gny fitaovam-piasa iaby andesy hanompoa gny tabernakely,gny tragno lay fihaogna. ⁴¹ Nandesin-drozy gny akanjo voatenona mba hanompoa ao amy gny tana masy,gny akanjo masy ho gnan'i Arona mpisoro,voho reo anakilahiny,mba hanompoan-drozy ho mpisoro ⁴² La nataon-drozy fokonolon'Israely gny asa iaby araky ze nandidian'i Yaveh gnan'i Mosesy. ⁴³ Nandiniky reo asa iaby Mosesy,sady ingo,vitan-drozy. Araky zay nandidian'i Yaveh,la manahaky an'izay gny fomba nanovan-drozy azy. Sady nitson-drano an-drozy mosesy.