¹ La nihira zao hira zao ho gnan'i Yaveh i Mosesy vo gny vahoakan'Israely. Nihira rozy hoe: " Hihira ho gnan'i Yaveh zaho, fa nandresy tamim-boninahitsy Ie; gny soavaly vo gny mpitaingina zay la natsipiny tao agnaty ranomasy. ² Yaveh ro tanjako no hirako, sady fa nanjary famonjena gnahy Ie. Zay ro Ndranagnahariko, sady hidera Gnazy zaho, Ndranagnaharin-drozy razako, sady hanondrotry Gnazy zaho. ³ Yaveh la mpialy; Yaveh ro agnarany. ⁴ Nanimpy gny kalesin'i Farao vo gny tafiky tao agnaty ranomasy Ie. Reo manam-boninahitsy voafilin'i Farao la nilentiky tao agnatin'ny ranomasy Mena. ⁵ Gny laliky nanaro gnazy reo; la nilentiky tany amin'ny laliky manahaky gny vato rozy. ⁶ Gny tagnanao ankavana, ry Yaveh, la manam-boninahitsy amin'ny hery; gny tagnanao ankavana, ry Yaveh, la nanorotoro gny fahavalo. ⁷ Tamin'ny voninahitsy bevata ro nanjeranao reo zay nitsanga hanohitsy Gnanao. Nalefanao gny fahatezeranao; nandevo gnazy reo manahaky gny mololo zay. ⁸ Tamin'ny fofognain'ny vavoronao ro nampiango reo rano mikoria nijoro mahitsy manahaky gny antontan-javatsy; gny rano laliky la nivaingana tagny amin'ny fanambanin'ny ranomasy. ⁹ Hoy gny fahavalo: ' Hanenjika zaho, hisambotsy zaho, hizara zay babo zaho; gny faniriako la ho tanteraky amin-drozy hamoaky gny sabatro zaho; hamotiky gnan-drozy gny tagnako.' ¹⁰ Nitsoky tamin'ny rivotrao iha, ka nandrakotry rozy gny ranomasy; nilentiky manahaky gny firaky agnatin'ny rano mahery rozy. ¹¹ Ia ro manahaky Gnanao, ry Yaveh, eo amin-drozy Ndranagnahary? Ia ro manahaky Gnanao, manam-boninahitsy amin'ny fahamasina, omem-boninahitsy amin'ny dera, manao fahagaga? ¹² Nanijintra gny tagnanao ankavana Iha, la nitely gnazy gny tany. ¹³ Tao amin'ny fanekenao tsy mivadiky ro nitarihinao gny vahoaky zay navotanao. Tamin'ny tanjakao ro nitarihinao gnazy reo tany amin'ny toera masy zay nitoeranao. ¹⁴ Hahare reo vahoaky, sady hangovitsy rozy reo; hisambotsy reo mponin'i Filistina gny horohoro. ¹⁵ La hahatahotsy reo lehiben'i Edoma; reo miaramilan'i Moaba la hihozongozo; gny mponin'i Kanana iaby la ho ketraky. ¹⁶ Gny horohoro vo gny tahotsy la hiantonta amin-drozy. Noho gny herin'ny sandrinao, la ho hanjary hijanona manahaka gny vato mandra-pandalon'ny vahoakanao rozy, ry Yaveh__mandra-pandalon'ireo vahoaky navotanao. ¹⁷ Handay an-drozy sady hametraky an-drozy egny an-tendrombohitsy gny lovanao Iha, lay toera, ry Yaveh, zay fa nataonao hipetraha, gny fitoera masy, ry Tomponay, zay fa namboarin'ny tagnanao. ¹⁸ Hanjaka la traky farany Yaveh". ¹⁹ Fa reo soavalin'i Farao la nandeha nisondry tamin'ireo kalesiny vo reo mpitaingin-tsoavaliny tany agnaty ranomasy tamin-drozy i Yaveh. Nefa reo Israelita nandeha tamin'ny tany maima teo agnelagnelan'ny ranomasy. ²⁰ Miriama lay mpaminany ampela, anambavin'i Arona, nangalaky ampongatapaky, sady reo ampela iaby niboaky niaraky tamin'ny ampongatapaky, nandihy nagnaraky gnazy. ²¹ Nihira tamin-drozy Miriama hoe: " Mihira ho gnan'i Yaveh, fa nandresy am-boninahitsy Ie. Gny soavaly vo gny mpitaingy zay la natsipiny tao agnatiny ranomasy." ²² La nitariky gny Israely nanomboky teo amin'ny ranomasy Mena i Mosesy. Niboaky bakagny efitr'i Sora ie rozy. Nandeha hateloa tagny an'efitsy sady tsy nahajery rano rozy. ²³ La avy tagny Mara rozy, nefa tsy afaky nisotro gny rano tao fotony nangily zay. La nikaihin-drozy hoe Mara zay toera zay. ²⁴ La nitaray tamin'i Mosesy reo vahoaky sady nisafa hoe: Ino ro azonay inomy?" ²⁵ Nikaiky mare gnan'i Yaveh i Mosesy, sady nampiseho gnazy hazo raiky i Yaveh. Nanipy zay tao agnatin'ny rano Mosesy, ka lasa azo inomy gny rano. Teo ro nagnomezan'i Yaveh lalagna hentitsy an-drozy, sady teo ro nitsapany an-drozy. ²⁶ Hoy Ie: " Laha mijanjy soa gny feon'i Yaveh Ndranagnaharinareo nareo, sady manao zay to eo imasony, sady laha magnongalin-tsofy amin-drea liliny ka mankatoa reo lalagna iaby nareo__ la tsy ataoko aminareo reo arety zay nataoko tamin-drozy Egyptiana, fa Zaho ro Yaveh zay magnasitra gnanareo." ²⁷ Bakeo vahoaky avy Elima, zay nisy loharano roa ambin'ny folo vo hazon-drofia fitopolo. Nivory tagny teo agnilan'ny rano rozy.