¹ Lafa niala teo amin-drozy rahay la niantsambo, sady niary lala-mahity nagnagny amin'ny tanan'i Kosy, nagnagny amin'ny tanan'i Rody gny andro magnaraky, sady bakeo la nagnagny amin'ny tanan'i Patara. ² Lafa nahajery sambo niampita nagnagny Foinika rahay, la nilitsy tao rahay ka niantsambo. ³ Lafa baka nahajery gnan'i Kyprosy, la nagnenga izay safa ampitan'ny sambo, niantsambo ho agny Syria rahay sady nikaiky tao Tyro, toera zay namoahan'ireo tantsambo gny enta tao agnaty sambo. ⁴ Laha vo nahajery gna'ireo mpianatsy rahay, la nijano tagny tagnatiny gny fito andro. Tamin'ny alalan'ny Fagnahy la nandresy lahatsy gnan'i Paoly hatrany rozy mba tsy handeha ho agny Jerosalema. ⁵ Lafa tapitsy gny andronay tegny, la niala tao rahay ka nandeha tamin'ny lalanay, sady rozy iaby, niaraky tamin'ireo valy aman-janany, nagnaraky niboaky tao amin'ny tana. Sady nandohaliky tegny amoron-dranomasy la nivavaky ⁶ sady nifanao veloma. La nilitsy tao an-tsambo rahay, sady rozy nimpoly tagny an-tranony. ⁷ Lafa vitanay gny lia tagny Tyro, la avy tagny Ptolemaisy rahay. Tagny la nifanonjy tamin'ireo rhalahy sady nijano ndraiky andro niaraky tamin-drozy. ⁸ Gny hamaray la niala tao rahay sady nandeha tagny Sezarea. Nilitsy gny tragnon'i Filipo tsika, evanjelista, zay raiky tamin'ireo fito, sady nijano niaraky taminy rahay. ⁹ Henanizao io johary io la nanan'anaky ampela virijiny efatsy zay naminany. ¹⁰ Lafa nijano tao tagnaty gny andro maromaro rahay, la nisy mpaminany raiky nizotso bakagny Jodia kinaiky hoe Agabo. ¹¹ Namonjy gnanay sady nangalaky gny fehikibon'i Paoly ie. Tamin'igny ro namehezany gny tombony voho gny tagnany sady nivola hoe: " Hoy gny Fagnahy Masy, 'la manahaky zao ro hamehezan'ireo Jiosy agny Jerosalema gny johary zay tompony toy fehin-kibo, sady hanolotsy gnazy eo an-tagnan'ireo Jentilisa." ¹² Lafa nahanjanjy izay raha izay rahay, la rahay voho reo olo mipetraky tao amin'io toera io la niangavy tamin'i Paoly tsy hiakatsy ho agny Jerosalema. ¹³ Sady namaly i Paoly nanao hoe: " Ino ro ataonareo, mitomany voho mandratra gny foko? Zaho fa vonona, tsy hoe hofehezy avao , fa ho maty agny Jerosalema avao koa amin'ny agnaran'i Tompo Jesosy." ¹⁴ Fotony, la nijano nanandra rahay sady nivola hoe: " Ao ho tanteraky gny sitra-pon'ny Tompo." ¹⁵ Tao afaran'ireo andro reo, la nanday gny kitaponay rahay ka niakatsy nagnagny Jerosalema. ¹⁶ La nisy reo mpianatsy sasany avao koa bakagny Sezarea nagnaraky gnanay. Nanday johary raiky niaraky tamin-drozy zay kinaiky hoe Menasona mainty molaly, zay tokony hiarahanay mipetraky. ¹⁷ Lafa avy tagny Jerosalema rahay, la nandramby gnanay am-pifalia reo rahalahy. ¹⁸ Gny hamaray la nagnaraky gnanay i Paoly ho agny amin'i Jakoba, sady teo iaby reo loholona iaby. ¹⁹ Lafa avy niarahaba gnan-drozy ie, la nitatitsy kiraidraiky reo raha iaby zay fa nataon-Dranagnahary tamin'ireo Jentilisa tamin'ny alalan'ny asa fanompoany. ²⁰ Lafa nahajanjy izay rozy, la nidera an-Dranagnahary, sady nivola taminy hoe: " Jerinao, ry rahalahy, an'arivony firy ro nino tamin'ireo Jiosy. Tapa-kevitsy rozy iaby hitandry gny lalagna. ²¹ Fa nambaran-drozy gny mikasiky gnanao, fa iha la mampianatsy reo Jiosy iaby zay mipetraky eo amin'ireo Jentilisa hahafoy gnan'i Mosesy, sady iha magnambara agnan-drozy tsy hagnaraky gny fomba taloha ²² Ino ro tokony ho hataontsika? Ho njanjin-drozy vatany fa avy iha. ²³ Ka atavo zay ambaranay gnanao. Mana johary efatsy zay nanao voady rahay. ²⁴ Andeso reo johary reo sady liovo miaraky amin-drozy gny vatanareo, sady haloavy reo fandanian-drozy, mba hagnaratsy gny lohany rozy. Ka ho hainy gny olo iaby fa reo laha zay ambarany mikasiky gnanareo la diso. Ho hain-drozy fa iha magnaraky lalana avao koa. ²⁵ Fa mikasiky reo Jentilisa zay nino, rahay la nanoratsy voho nagnome torolala fa tokony hitandry gny vatany amin'ny raha vita soro ho an'ny sampy rozy, baka amin'ny lio, bakamin'izay nikendaina, voho baka amin'ny finjanganjanga. ²⁶ Bakeo la nalain'i Paoly reo johary, sady gny hamay, ie nagnalio gny vatany niaraky tamin-drozy, nizotso tao an-tragnobe Ndranagnahary, nagnambara gny vanim-potoanan'ny andron'ny fanaliova, mandra-panatitsy gny fagnatitsy ho an'ny olo kiraidraiky tamin-drozy. ²⁷ Lafa ho tapitsy reo andro fito, reo Jiosy sasantsasany bakagny Asia, nahajery gnan'i Paoly tao an-tempoly, nampikoronta reo vahoaky iaby, sady nisambotsy gnazy. ²⁸ Nitabataba rozy hoe: " Ry olon'Israely, ampio rahay." Io gny johary zay mampianatsy gny olo iaby hatraia hatraia reo raha zay manohitsy gny olo, gny lalagna, sady toy toera toy. Fagnampin'izay, nanday Grika tao an-tempoly avao koa ie sady nandoto any toy toera masy toy. ²⁹ "Fa rozy teo aloha nahajery gnan;i Trofima zay Efezianina niaraky taminy tao an-tana, sady nieritreritsy rozy fa i Paoly ro nanday gnazy tao an-tragno be Ndranagnahary. ³⁰ Nifanaritaky gny tana iaby, sady niaraky nilay voho nismbotsy gnan'i Paoly gny olo. Nisinto gnazy hiboaky ao amin'ny tragnobe Ndranagnahary rozy, la narindry teo noho eo gny varavara. ³¹ Laha teo am-pamonoa gnazy rozy, la nisy vaovao avy tagny amin'ny kapitenin'ny mpiamby fa mikoronta iaby Jerosalema raiky iaby. ³² La avy nangalaky miaramila voho kapiteny ie sady nilay nizotso nagnagny amin'ireo vahoaky. Lafa nahajery gny kapiteny voho reo miaramila gny vahoaky, la nijano namango gnan'i Paoly rozy. ³³ La namonjy gny kapiteny sady nisambotsy gnan'i Paoly, voho nasainy nifehezy tamin'ny rojo vy roe ie. La nagnontany ie hoe ia ie sady ino ro nataony. ³⁴ Gny sasany tamibn'ireo vahoaky nitabataba raha raiky sady reo hafa raha hafa. Fotony tsy afaky nivola na ino na ino gny kapiteny oho gny tabataba iaby, la nampandehaniny ho agny amin'ny rova i Paoly. ³⁵ Lafa bakeo amin'ny tohatsy ie, la nandesin'ireo miaramila ie noho gny herisetran'ny vahoaky. ³⁶ Fa nagnaraky tao afara gny vahoaky maro sady nanohy nikorakoraky hoe: " Vono ie" ³⁷ Laha ho nandesy tao an-drova igny i Paoly, la hoy ie tamin'ny kapiteny: " Afaky mivola raha agnaminao va aho?" Hoy gny Kapiteny hoe: " Mivola Grika va iha? ³⁸ Tsy iha va gny Egyptiana, zay nitariky fikomia tany aloha sady nitariky reo efatsy arivo lahy an'ny 'mpamono olo' niboaky bakagny agn'efitsy?" ³⁹ I paoly la nivola hoe: " Zaho la Jiosy, bakagny amin'ny tanan'i Tarsosy agny Kiliaka. Zaho la olom-pirenen'ny tana manan-danja. Mangataky agnaminao aho, engeo aho hivola amin'ny gn'olo." ⁴⁰ Lafa nagnenga gnazy hivola gny kapiteny, la nitsanga teo amin'ny tohatsy i Paoly sady nanao fihetsiky tamin'ny tagnany tamin'ny vahoaky. Lafa nisy fitsigna mare, la niresaky tamin-drozy tamin'ny fivolagna Hebreo ie. Hoy ie: