¹ Nandefa iraky tamin'Israely ndraiky a Joda iaby i Hezekia, voho koa nanoratsy taratasy ho gnan'i Efraima ndraiky Manase, fa tokony ho avy an-tragnon'i Yaveh a Jerosalema agny rozy, mba hagnalaza gny Paska ho gnan'i Yaveh, Ndranagnaharin'Israely. ² Fa gny mpanjaka, gny reo mpitariky, ndraiky gny fiangona iaby ta Jerosalema tagny la niaraky nametsivetsy, manapa-kevitsy gny hagnalaza gny Paska ami-gny vola faharoa. ³ Tsy afaky nagnalaza gnany zay teo no eo anefa rozy, fotony tsy ampy gny reo mpisoro nagnamasy gny vatan-drozy, na gny olo niaraky nivary ta Jerosalema tagny. ⁴ To tamasony gny mpanjaka ndraiky gny fiangona iaby zay tolo-kevitsy zay. ⁵ Ka nagnenky gny hanao fagnambara manera gnan'Israely iabiaby rozy, zisiky Beriseba ka la zisiky a Dana agny, fa gny vahoaky la tokony ho avy hagnalaza gny Paska ho gnan'i Yaveh, Ndranagnaharin'Israely, ta Jerosalema tao. Fa rozy la tsy nitandry gnany zay niaraky tami-gny vahoaky maro agn'isaky, araky gny voasoratsy. ⁶ Noho izay reo iraky la nandeha nanday gny taratasy bakamin'ny mpanjaka voho reo mpitariny nanera gnan'Israely voho Joda iaby, araky gny baikon'ny mpanjaka. Hoy rozy hoe: " Nareo vahoakan'Israely, mimpolia amin'i Yaveh, lay Ndranagnaharin'i Abrahama, Isaka voho Israely, mba himpoly amin'ny sisa tavela agnaminareo zay tafaboaky avy teo an-tanan'ireo mpanjakan'i Asyria. ⁷ Ao nareo tsy hitovy ami-gny razambenareo na gny rahalahinareo, nanota tamin'i Yaveh, Ndranagnahariny gny razamben-drozy, ka nandravany gnan-drozy, araky gny hitanareo. ⁸ Voho ka mahery loha, manahaky gnany reo razambenareo; fa koa, magnomeza vata ho gnan'i Yaveh nareo voho milira ami-gny fipetrahany masy ao, fa nihamasigniny zisiky amparany, voho manompoa gnan'i Yaveh Ndranagnaharinareo mba hiala agnaminareo gny fihetany gny nakiny. ⁹ Fa laha mimpoly amin'i Yaveh nareo, la ahita fagnaraham-po magnitriky gnany reo nanday gnan-drozy ho gadra gny rahalahinareo ndraiky gn'anakareo, ka himpoly ami-toy tany toy rozy. Fa Yaveh Ndranagnaharinareo, la mahari-po ndraiky mpamalo fo, voho tsy hagnetaky gny tarehiny agnaminareo, laha mimpoly agn'Aminy nareo." ¹⁰ Ka la roso gny reo iraky nandeha isan-tana nanera gny farits'i Efraima ndraiky Manase, gny lala iaby magna Zebolona, fa nihehy ndraiky nandatsa gnan-drozy gn'olo. ¹¹ Ndra zay aza, gny sasany tami-gny joharin'i Aseraha ndraiky Manase voho Zebolona la manendry vata ka niavy ta Jerosalema tagny. ¹² Niavy tamin'i Joda avao koa gny tagnan-Dranagnahary, mba hagnomea fo raiky gnan-drozy, mba hagnantanteraky gny liliny gny mpanjaka ndraiky gny reo mpitariky tami-gny alalany gny safan'i Yaveh. ¹³ Vahoaky maro, fiangona bevata vatany, ro tafavory ta Jerosalema tagny mba hagnalaza gny firavoravoa ami-gny Mofo tsy misy Masirasira tami-gny vola faharoa. ¹⁴ La nitsanga rozy voho nangalaky gnany reo alitara ta Jerosalema tagny, ndraiky gny reo alitara iaby ho gnany gny ditin-kazo magnitsy, natoran-drozy tami-gny lohasahan-driaky a Kidrona agny zay. ¹⁵ Bakeo la namono gny anak'aondriny gny Paska rozy tamin-gn'andro faha folo efatsy-amby gny vola faharoa. Megnatsy gny reo Levita, ka nagnamasy gny vatany ndraiky nanday fagnatitsy oroa tan-tragnon'i Yaveh tao rozy. ¹⁶ Nijoro tami-gny toerany tegny iaby araky gny fizarany rozy, magnaraky gnany reo torolala namea tami-gny lalan'i Mosesy tao, joharin-Dranagnahary. Nafendraky reo mpisoro gny lio nirinambiny baka ami-gny tagnany reo Levita. ¹⁷ Fotony nisy maro tami-gny fiangona ro tsy magnamasy gny vatany. Nohony zay la namono gny anak'aondry gny Paska ho gnany gn'olo iaby tsy voalio ndraiky tsy afaky nagnamasy gny soron-drozy ho gnan'i Yaveh gny reo Levita. ¹⁸ Fa vahoaky maro, maro tamin-drozy baka Efraima ndraiky Manase agny, Isakara ndraiky Zebolona, ro tsy nagnalio gny vatany ie, fe nihina gny haniny gny Paska avao rozy, tsy araky ze fampianara voasoratsy. La nivavaky ho gnan-drozy i Hezekia, nanao hoe: " Lonoky Yaveh soa hamalo fo gn'olo iaby. ¹⁹ Manefy gny fony hiala gnan-Dranagnagnahary, Yaveh, Ndranagnahariny reo razambeny, na la tsy voalio tami-gny fahaliova araky gny fenitry gny fitoera masy aza ie." ²⁰ Ka la ninjanjy gnan'i Hezekiah i Yaveh voho nagnanjanga gny vahoaky. ²¹ Gny vahoakan'Israely ta Jerosalema tagny la nitandry tan-kafaliam-bevata gny firavoravoa ami-gny Mofo tsy misy Masirasira tagnatiny gny hafitoa. Reo Levita ndraiky gny reo mpisoro la nandrengy gnan'i Yaveh isan'andro san'andro, mihira miaraky tami-gny raha-magneno mare ho gnan'i Yaveh. ²² Voho Hezekiah nampahery gnany reo Levita iaby nahatakatsy gny fanompoa gnan'i Yaveh. Ka la nihina tam-piravoravoa tagnatiny hafitoa rozy, nagnomea gnany reo soro ho fagnati-pihombogna, voho nibebaky tamin'i Yaveh, Ndranagnahariny gny razam-ben-drozy. ²³ Voho gny fiangona iabiaby nanapa-kevitsy gny hagnalaza hafitoa hafa, ka nanao gnany zay tan-kafalia rozy. ²⁴ Voho Hezakia mpanjakan'i Joda nagnomea aombilahy arivo ndraiky aondry fito arivo ho gnany gny fiangona ho fagnatitsy; voho gny reo mpitariky nagnomea aombilahy arivo ndraiky aondry voho aosy ray aly ho gnany gny fiangona. Mpisoro maro agn'isa ro nagnamasy gny vatany. ²⁵ Gny fiangonan'i Joda iaby, miaraky ami-gny reo mpisoro ndraiky gny reo Levita, voho gny vahoaky iaby niaraky niavy baka Israely tagny, voho gny reo vahiny avy baka ami-gny tamin'Israely tagny ndraiky gny reo nipetraky ta Joda tagny la nifalifaly iaby. ²⁶ Ka la nisy hafaliam-be ta Jerosalema tao, fa zisiky ami-gny fotoan'i Solomona gnanak'i Davida, mpanjakan'Israely, la mbo tsy nahita manahaky gnany zay ta Jerosalema tao, ²⁷ Voho nitsanga ndraiky nitsipi-rano gny vahoaky gny reo mpisoro, ndraiky gny reo Levita. Re gny feon-drozy, voho gny vavakin-drozy niakatry tan-dagnitsy fitoera masy ipetrahan-Dranagnahary.