¹ Nanomboky najaka i Hezekia tami-gny roapolo limy amby taony; nanjaka tagnatiny roapolo sivy amby tao ta Jerosalema tao ie. Gn'agnaran-dreniny la Abia, gnanaky ampilan'i Zakaria. ² Nanao gny to tamason'i Yaveh teo ie, manahaky gny fa nataon'i Davida rainy. ³ Tami-gny tao voalohany nanjakany, tami-gny vola voalohany, la namoha gny reo varavarany gny tragnon'i Yaveh i Hezakia voho nagnambotsy gnany reo. ⁴ Nampilitsy gnany reo mpisoro ndraiky gny reo Levita ie, voho namory gnan-drozy niaraky tami-gny kianja ami-gny an-tignana ao. ⁵ Hoy ie tamin-drozy hoe: " Mijanjigna gnahy nareo Levita! Amasigno gny vatanareo, voho amasigno gny tragnon'i Yaveh, Ndranagnahary gny razambenareo, voho alao hiala ami-gny fipetraha masy gny fahalotoa. ⁶ Fa nanota gny reo razambentsika voho nanao raty tamason'i Yaveh Ndranagnaharintsika teo; nahafoy Gnazy rozy, nagnoliky gny tarehin-drozy miala tami-gny toera hipetrahan'i Yaveh, voho nampitoliky gny lambosin-drozy ho agnaminy zay. ⁷ Nihinilin-drozy avao koa gny reo varavarany gny lavaranga voho nivinonony gny jiro; tsy nagnoro ditin-kazo magnitsy rozy na fagnatitsy oroa tami-gny toera masy tao ho gnan-Dranagnaharin'Israely. ⁸ Nohony zay la milatsaky tamin'i Joda ndraiky Jerosalema teo gny siakin'i Yaveh, voho nataony manahaky gny raha fampiarohoroa, fampitahora, ndraiky fangalam-baraka rozy, araky gny hitanareo ami-gny masonareo. ⁹ Zay ro antony nahatonta gnany reo raintsika tami-gny maso, ndraiky nahababo gnany reo gnantsika lahy ndraky gny reo gnanantsika ampela, voho gny reo valintsika. ¹⁰ Androany la am-poko ato gny hanao fagnenkea amin'i Yaveh, Ndranagnaharin'Israely, mba hialany gny siakiny mirehitsy agnamin'tsika. ¹¹ Ry gnanako, ka malay zao, fotony Yaveh fa nifily gnanareo mba hitsanga agnatrehana eo, mba hanompo Gnazy, voho mba ho mpanompony ndraiky ho emboky magnitsy." ¹² Bakeo la nitsanga gny reo Levita: la Mahata gnanaky lahin'i Amasay, ndraiky Joela gnanaky lahin'i Azaria, baka ami-gny olony reo Kohalita; voho gny reo olon'i Merary, Kisy gnanaky lahin'i Abdia, ndraiky Azaria gnanaky lahin'i Jehalalila, voho gny reo Gersonita, Joa gnanaky lahin'i Zima, voho Edena gnanaky lahin'i Joa, ¹³ baka ami-gny reo gnanaky lahin'i Elizofana, Simry ndraiky Jeiela, voho baka agnaminy reo gnanaky lahin'i Zakaria voho Matania; ¹⁴ baka ami-gny gnanaky lahin'i Hemana, Johiela voho Simei; voho baka ami-gny gn'anaky lahin'i Jedotona, Semaia voho Oziela. ¹⁵ Namory gnany reo rahalahiny rozy, voho nagnamasy gny vatany, ka nilitsy, araky gny nibaikoany gny mpanjaka, tami-gny fagnaraha gny reo safan'i Yaveh, mba hagnalio gny tragnon'i Yaveh. ¹⁶ Nilitsy tao ami-gny efitsy agnatin'ny tragnon'i Yaveh reo mpisoro mba hagnalio gnany zay, nandesin-drozy niboaky gny loto iaby hitany tam-tempolin'i Yaveh tan-kianjany gny tragno tao. Nalany reo Levita gny zay mba hangala gnany zay an-dohasahan-driakin'i Kidrona ao. ¹⁷ Voho natombokin-drozy gny fagamasigna tami-gn'andro voalohany gny vola voalohany. Voho tami-gn'andro fahavalony gny vola la nihazo tami-gny lavarangan'i Yaveh teo rozy. Voho tagnatiny valo andro hafa avao koa la nagnamasy gny tragnon'i Yaveh rozy. Tami-gn'andro faha folo enin-amby gny vola voalohany la vitan-drozy zay. ¹⁸ Bakeo rozy nandeha tamin'i Hezekia tagny, mpanjaka, tami-gny lapa tao voho nisafa hoe: " Fa nagnalio gny tragnon'i Yaveh iabiaby rahay, gny alitara ho gnany reo fagnatitsy oroa maraky ami-gny fampiharany iaby, ndraiky gny labony gny mafony gny fagnatreha, miaraky ami-gny fampiharany iaby. ¹⁹ Ka fa nioma rahay voho fa nihamasigninay gny reo fitaova iaby nalan'i Ahaza mpanjaka fony niasa tsy am-patokia tagnatiny fanjakany ie Ingo, eo agnatrehany gny alitaran'i Yaveh eo gny reo." ²⁰ Bakeo Hezekia mpanjaka nifoha maray voho namory gnany reo mpitariky gny tana; nandeha miakatsy tami-gny tragnon'i Yaveh tagny ie. ²¹ Nanday aomby lahy fito, aondrilahy fito, gnanak'aondry, fito, voho aosy lahy fito ho fagnatitsy nohony gny ota ho gnany gny fanjaka, ho gnany gny fitoera masy, voho ho gnan'i Joda rozy. Nibaiko gnany reo mpisoro, gny reo gnanaky lahin'i Arona ie, mba hagnatitsy gnany reo ami-gny alitaran'i Yaveh eo. ²² Ka la nivinonon-drozy gny aomby, voho nirinasany gny reo mpisoro gny lio ka nafendrakiny tami-gny alitara teo. Nivinonon-drozy gn'aondry lahy voho nafendrakiny tami-gny alitara teo gny lio. ²³ Nandesin-drozy agnatrehany gny mpanjaka ndraiky gny fivondrogna teo gny reo aosilahy ho fagnatitsy nohony gny ota; napetrakin-drozy tami-zay teo gny tagnany. ²⁴ Nivinonony gny reo mpisoro zay, voho nanao fagnatitsy nohony gny ota tami-gny liony reo tami-gny alitara teo mba hanova fagnavota ho gnan'Israely rozy, fotony nibaiko gny mpanjaka fa tokony hisy fagnatitsy oroa ndraiky fagnatitsy nohony gny ota hatao ho gnan'Israely iabiaby. ²⁵ Napetrak'i Hezekia tami-gny tragnon'i Yaveh tao niaraky tami-gny kipantso, harpa, voho lokanga gny reo Levita, nalahatsiny araky gny baikon'i Davida, Gada, mpahitany gny mpanjaka, ndraiky Natana, mpagnambara hafatsy, fotony baka amin'i Yaveh tami-gny alalany reo mpagnambara hafatsiny gny baiko. ²⁶ Nijoro miaraky tagnamin'ny reo raha magnenon'i Davida gny reo Levita, voho gny reo mpisoro miaraky tagnami-reo trompetra. ²⁷ Nibaiko gnan-drozy mba hagnomea fagnatitsy oroa ho ami-gny alitara eo i Hezekia. Lafa manomboky gny fagnatitsy oroa, la nanomboky avao koa gny hiran'i Yaveh, miaraky tagnami-reo trompetra, mbami-reo raha magnenon'i Davida mpanjakan'Israely. ²⁸ Nandrengy iaby gny fiangona iaby, nihira gny reo mpihira, voho nitsoky gny reo mpagneno trompetra; Nitohy avao gny reo iaby reo zisiky ahavita gny fagnatitsy oroa. ²⁹ Lafa vitan-drozy gny fagnatitsy, la niankohoky ndraiky nitsaoky gny mpanjaka ndraiky gny reo iaby nagnatriky miaraky tagnaminy. ³⁰ Ankoatsiny zay, Hezekia, mpanjaka, ndraiky gny reo mpitariky la mibaiko gnany reo Levita mba ihira fandrengea ho gnan'i Yaveh tami-gny safan'i Davida ndraiky Asafa mpahita. Nihira fandrengea tan-kafalia rozy, voho miankohoky ndraiky mandrengy. ³¹ La hoy Hezekia hoe: " Androany la nagnamasy gny vatanareo ho gnan'i Yaveh. Avia eto ka andeso ho an-tragnon'i Yaveh ao gny soro ndraiky gny reo fagnati-pisaora." Nandesiny gny fiangona gny reo soro ndraiky gny reo fagnati-pisaora, voho gny reo iaby nana fo atsiky finiava la nanday fagatitsy oroa. ³² Aombilahy fitopolo, aondrilahy zato, voho gnanak'aondry lahy roanjato ro isaky fagnatitsy oroa nandesiny gny fiangona. Ho fagnatitsy oroa ho gnan'i Yaveh iaby gny reo iaby reo. ³³ Aomby enin-jato ndraiky aondry telo arivo gny reo fagnatitsy voahasy. ³⁴ Fa tsy ampy loatsy gny mpisoro laha hagnendaky gny holitsy reo fagnatitsy oroa, ka la nagnampy gnan-drozy gny rahalahiny, Levita reo, zisiky ahavita gn'asa, voho zisiky ahafaky gnany reo mpisoro nagnamasy gny vatan-drozy, fa nitandry gny hagnamasy gny vatan-drozy mare nohony reo mpisoro gny Levita reo. ³⁵ Fagnampiny zay, la nisy fagnatitsy inomy ho gnany gny fagnatitsy oroa maro; nampiaraky tami-gny saborany gny fagnati-pihombona reo, voho nisy fagnatitsy inomy ho gnany gny fagnatitsy oroa iaby. Ka lasa nilamy soa gny fanompoa tan-tragnon'i Yaveh tao. ³⁶ Niravoravo Hezekia, voho gny vahoaky iaby avao koa, nohony zay fa nomanin-Dranagnahary ho gnany gny olo, fotony tselatsela gn'asa.