¹ Solomona gnanaky lahin'i Davida, la nitombo hery hery tami-gny fanjakany, ndraiky Yaveh Ndranagnahary la nitahy gnazy ndraiky nahalasa gnazy ho tena mahery. ² Solomona nisafa tamin'Israely iaby, tagnaminy reo mpifehy gny arivolahy ndraiky gny zato lahy, ndraiky taminy reo mpitsara, voho tami-gny mpanjaka johary iaby tagny Israely iaby, reo mpitariky gny tragnon-drazambe. ³ Ka la nandeha ami-gny fipetraha agnabo tany Gibeona tegny i Solomona ndraiky gny mpivory iaby niaraky tagnaminy, fotony tagny ro nisy gny tragnolay fihaogna amin-Dranagnahary, namboarian'i Mosesy mpanompon'i Yaveh, tagn'efitsy tagny. ⁴ Fa nandesin'i Davida baka Kiriatan Jearima ho agny am-gny toera nomagniny ho ami-gny zay gny tobilin-Dranagnahary, fotony fa namboatsy lay ho gnany zay tagny Jerosalema tao ie. ⁵ Fagnampiny zay, gny alitara saba nataon'i Bezalila gnanaky lahin'i Ori gnanaky lahin'i Hora lafa tany nagnavaha gny tabernakelin'i Yaveh; nandeha nagnany i Solomonandraiky gny piangona . ⁶ Niakatsy ami-gny alitara saba agnatrehan'i Yaveh tagny i Solomona, tami-gny tragno lay fihaogna tao, voho nagnomea fagnatitsy oroa arivo taminy zay. ⁷ Ndranagnahary niseho tamin'i Solomona tami-gny haly io voho nisafa tagnaminy hoe: " Angataho! Ino ro tokony ameako gnanao?" ⁸ Hoy Solomona tamin-Dranagnahary hoe: " Iha la fa nampiseho famalozam-po bavata tamin'i Davida raiko, voho nanao gnaly ho mpanjaka ami-gny polasiny eo. ⁹ Androany, ry Yaveh Ndranagnahary, ao mba ho tanteraky gny fampagnatena natanao tamin'i Davida raiko fotony nataonao mpanjaka gnolo maro agn'isaky manahaky gny lemboky gny tany zaho. ¹⁰ Ka ameo fahendrea ndraiky fahaiza zaho, mba ahafaky gn'ahy mitariky gny vahoaky toa, fotony io ro afaky hitsara gny vahoakao, vatany la maro agn'isaky?" ¹¹ Hoy Ndranagnahary tamin'i Solomona hoe: " Fotony tam-ponao tao zay, voho fotony tsy nangataky drala voho hanagna iha, na voninahitsy, na gn'ainy reo malay gn'anao, na mba ho ela velo iha, fa fandrea ndraiky fahaiza ho gnany gny vatanao ro nangatahanao, mba ahafaky gn'anao manjaka ami-gny vahoakiko, ami-gny reo nanovako gn'anao ho mpanjaka, voho zao ro ataoko. ¹² Hameako fahendrea ndraiky fahaiza iha androany. Hameako drala voho hanagna, ndraiky voninahitsy avao koa, ze tsy nanagnany reo mpanjaka talohanao teo, voho tsy hisy afaranao hana." ¹³ Ka avy tagny Jerosalema baka ami-gny fitoera agnabo tagny Gibeona tagny i Solomona, baka agnatrehany gny tragno lay fihaogna teo; nanjaka nanera gnan'Israely ie. ¹⁴ Namory reo kalesy mpitikitsy sovaly i Solomona, voho nana kalesy 1.400 ndraqiky mpitikitsy sovaly roa arivo ndraiky ray aly ie napetrakiny taqmi-gny tana mpisy gnany reo kalesy, voho miaraky tagnaminy gny mpanjaka tagny Jerosalema tao. ¹⁵ Nataony gny mpanjaka nimaro tagny Jerosalema manahaky gny vato kelikely gny volafoty ndraiky volamena, voho nataony nimaro manahaky gny aviavy ze egny ami-gny reo tany ambany gny hazo seder. ¹⁶ Manahaky gny fagnafara gnany reo sovaly baka Egypta tagny ndraiky kiho ho gnan'i Solomona, la niviliny reo mpandratony baka kiho agny tami-gny viliny toka reo. ¹⁷ Nagnafatsy kalesy baka Egypta agny tami-gny sekely volafoty enin-jato rozy, voho sovaly tami-gny sarany sekely 150. Rozy avao koa la nagnondra reo tany ami-gny reo mpanjakan'i Hetita ndraiky reo Syriana.