¹ Voho Solomona ro nibaiko gny fagnamboara tragny ho ami-gny gnagnaran'i Yaveh ndraiky gny fagnamboara lapa ho gnany gny fankany. ² Nanondro johary fito aly i Solomona mba handay gny reo enta, ndraiky johary valo aly mba ho mpanampaky hazo tam-bohitsy tagny, voho johary 3.600 mba hagnaramaso gnan-drozy. Nandefa hafatsy amin'i Hirama tagny, mpanjakan'i Tyro i Solomona, nanao hoe: ³ Manahaky ze nataonao tamin'i Davida raiko, gny nandefasanao hazo sedera mba hagnamboarany tragno ipetraha, la manova manahaky gnany zay agnamiko. ⁴ Ingo, agnainy mamboatsy tragno ho ami-gny gnagnaran'i Yaveh Ndranagnahariko zaho, mba hanoka gnany zay ho Gnazy, mba hagnoro ditin-kazo magnitsy agnatrehany eo, mba hametraky gny nofony gny fagnatreha, voho gnany reo fagnatitsy oroa ami-gny maray ndraiky hariva, ami-gny Sabata ndraiky reo volana vaovao, voho gnany reo fisinisinia voatondro ho gnan'i Yaveh Ndranagnaharintsika zisiky amparany, zay ho gnan'Israely. ⁵ Ho bavata vatany gny tragno hoamboariko, fotony bavata gny Ndranagnaharintsika nandilatsy gny reo Ndranagnahary iaby. ⁶ Fa ia zany ro mahay magnamboatsy tragno ho gnan-Dranagnahary, laha zao tontolo iaby zao la zisiky ami-gny lagnitsy aza tsy da Gnazy? Ia zahoro hagnamboatsy tragno ho Gnazy, laha tsy gny magnoro soro agnatrehany eo? ⁷ Nohony zay agniraho johary mahay raha ami-gn'asa ami-gny volamena, volafoty, saba, vy, ndraiky volomparasy, sily, voho volon'aondry manga zaho, voho johary raiky mahay magnamboatsy gny reo karazan-kazo voasikotsy iaby. Hiaraky agnaminy reo johary mahay raha miaraky agnamiko agny Jerosalema agny ie, zay namean'i Davida raiko. ⁸ Andefaso sedera, Kypreso, voho hazo almoga baka Libanona agny avao koa zaho, fotony haiko fa mpanompoko reo la mahay gny fomba fanapaha hazo agny Libanona agny avao koa zaho, fotony haiko fa mpanomponao reo la mahay gny fomba fanapaha hazo agny Libanona agny. Ingo, mpanompoko reo la hiaraky ami-gny reo mpanomponao, ⁹ mba hagnomana hazo maro ho gnahy, fotony gny tragno ho amboariko la ho bavata ndraiky soasoa. ¹⁰ Ingo, zaho hagnomea gnany mpanomponao reo, la gny reo johary hanapaky gny hazo vary tritika roa aly Kora, divay roa aly bata, voho diloilo roa aly bata." ¹¹ Voho Hirama, mpanjakan'i Tyro, namaly an-tsoratsy, nalefany amin'i Solomona agny hoe: " Fotony Yaveh tea gny olony, la nanao gn'anao ho mpanjaka agnamin-drozy ie." ¹² Fagnampiny zay, Hirama, nisafa hoe: " Isaora anie Yaveh, Ndranagnaharin' Israely, nanao gny lagnitsy ndraiky gny tany, nagnomea gnanaky lahy hendry gnan'i Davida mpanjaka, namea tam-pitandrema ndraiky fahazavan-tsay, hagnamboatsy tragno ho gnan'i Yaveh, voho tragno ho gnany gny fanjakany. ¹³ Voho nagniraky johary mahay raha zaho, nagnomea tam-pahazavan-tsay, la i Horama, matihaniko. ¹⁴ gnanaky lahiny gn'ampela irany reo gnanaky ampelan'i Dana ie. Johary baka Tyro agny ro babany. Mahay raha ami-gny asa ami-gny volamena, volafoty, saba, vy, vato, ndraiky ami-gny hazo, ndraiky ami-gny volomparasy, manga voho jaky volon'aondry, ndraiky rongony foty maliniky ie. Mahay raha ami-gny karaza sikorsy ndraiky karaza famolavola avao koa ie. Ao hisy polasy ho gn'azy ami-gny reo mpiasanao mahay raha, ndraiky ami-gny reo gnany Tompoko, la i Davida, rainao. ¹⁵ Ka androany, gny vary ndraiky gny vary hordea, gny diloilo ndraiky gny divay, nisafagniny Tompoko, la ao ho alefany ami-gny reo mpanompony . ¹⁶ Hanapaky hazo bakagny Libanona rahay, maro araky ze ilanao. Halefanay mitsinkafo ami-gny riaky ho agny Jopa ho agnaminao agny io, voho iha ro hampiakatsy gnany zay agny Jerosalema ." ¹⁷ Nagnisa gnany reo vahiny iaby tamigny tany Israely ao i Solomona, araky gny fomba nagnisan'i Davida, rainy, gnan-drozy. 153,600 ro isakin-drozy. ¹⁸ Nanondro fito aly tami-gny reo ie mba handay enta, valo aly mba ho mpanapaky hazo am-bohitsy agny, vohompagnara-maso 3.600 mba hampiasa gny vahoaky.