¹ Valo tao i Josia ro nanomboky nanjaka; nanjaka tagnatiny gny telopolo amby tao ta Jerosalema ie. ² Nanao gny to tamason'i Yaveh teo, ndraiky nandeha tami-gny lalan'i Davida razambeny, voho tsy mba nivio nagnavagna na nagnavia ie. ³ Voho tami-gny tao fahavalo nanjakany, laha mbo tanora ie, la nanomboky nila gnan-Dranagnaharin'i Davida, razambeny. Tami-gny tao faha folo roa amby, la nanomboky nagnalio gnan'i Joda ndraiky Jerosalema iaby tami-gny fitoera abo ie, gny baon'Aseraha, ndraiky gny sarin-draha voasokitsy voho gny sarin-draha vita tami-gny vy. ⁴ Nirinavany gny vahoaky tagnatrehany teo gny reo alitaran'i Bala; nitinapahiny gny alitarany gny ditin-kazo magnitsy tagnambony reo teo. Nitinorotorony gny reo baon'Aseraha ndraiky gny reo sarin-draha voasikotsy, voho gny reo sarin-draha vita tami-gny vy zisiky hiaviany regny ho lemboky. Naparitakiny tami-gny lolony reo nanao soro ho gnany zay gny lemboky. ⁵ Naroany tami-gny alitarany teo gny taolany reo mpisorony. Manahaky gnany zay gny fomba, nagnaliavany gnan'i Joda ndraiky Jerosalema. ⁶ Nataony manahaky gnany zay koa gny reo tanan'i Manase, Efraima,voho Simeona, gny lala iaby nagna Naftaly agny, ndraiky tami-gny reo faharava nagnodidy zay. ⁷ Nirinavany gny reo alitara, nipinotikiny ho lasa lemboky gny reo baon'Aseraha ndraiky gny reo sarin-draha voasikotsy, voho nitinapakiny gny alitara gny ditin-kazo magnitsy nanera gny tanin'Israely iaby; nimpoly ta-Jerosalema tagny ie bakeo. ⁸ Voho tami-gny tao faha folovalo amby nanjakany, hafa voalion'i josia gny tany ndraiky gny tempoly, la nagniraky gnan'i Safana gnanaky lahin'i Azalia, Maseira, governorany gny tana, voho i Joa gnanaky lahin'i Yaveh Ndranagnahariny. ⁹ Gnagna amin'i Hilkia agny, mpisorobe rozy, voho nagnanky tagnaminy gny vola nandesy tami-gny tragnon-Dranagnahary tao, fa navoriny reo Levita, ndraiky gny reo mpiamby varavara baka amin'i Manase ndraiky Efraima, baka ami-gny sisa tamin'Israely iaby, baka amin'i Joda ndraiky Benjamina iaby, voho baka ami-gny reo olon'i Jerosalema. ¹⁰ Nankinin-drozy tami-gny reo johary nagnara-maso gn'asa tami-gny tempolin'i Yaveh teo gny vola. Reo johary reo ro nagnarama gny mpiasa nagnamboatsy ndraiky nagnampoly gny tempoly tami-gny polasiny. ¹¹ Naloan-drozy tami-gny reo mpandrafitsy ndraiky gny reo mpananga gnany zay mba hikaloa vato voapaiky ndraiky hazo ho fandrefesa, voho hagnamboara andry ho gnany reo rafitsy nirinavany reo mpanjakan'i Joda sasany. ¹² Nanao gn'asa tam-patokia gny reo johary. Reo mpagnara-masony la Jahata ndraiky Obadia, gny reo Levita baka ami-gn'anaky lahin'i Merary; voho Zakaria ndraiky Mesolama, baka ami-gny reo gnanaky lahiny reo Kehatita. Reo Levita hafa, ze mpitendry raha magneno lavatany mahay iaby, mpanoro gnany reo mpiasa. ¹³ Reo levita reo la misahana gnany reo nanday gny fitiavany gny tragno bevata ndraiky gny reo johary iaby gn'asa samby hafa. Nisy avao koa gny reo Levita mpitan-tsoratsy, mpandrindra, voho mpiamby vavahady. ¹⁴ Lafa naboakin-drozy gny vola nandesy tan-tragnon'i Yaveh tao, la hitan'i Hilkia mpisoro gny bikiny gny lalagnan'i Yaveh namea tami-gny alalan'i Mosesy. ¹⁵ Hoy Hillkia tamin'i Safana mpanoratsy lalagna hoe: " Hitako tan-tragnon'i Yaveh tao gny bokiny gny lalagna." Nandesin'i Hilkia tamin'i Safara tagny gny boky. ¹⁶ Nandesin'i Safana tami-gny mpanjaka tagny gny boky, sady nagnambara tagnaminy avao koa, nanao hoe: " Gny reo mpanomponao la manao gny raha iaby nankiny tamin-drozy. ¹⁷ Fa nirinaokin-drozy gny vola hita tan-tragnon'i Yaveh tao, voho nameany tan-tagnany reo mpagnara maso teo ndraiky gny reo mpiasa zay." ¹⁸ Nivola tami-gny mpanjaka i Safana mpanoratsy lalagna hoe: " Namean'i Hilkia mpisoro boky zaho." Voho nivinakin'i Safana tami-gny mpanjaka zay. ¹⁹ Voho lafa njanjiny gny mpanjaka gny reo safany gny lalagna, la nandrotiky gny akanjony ie. ²⁰ Gny mpanjaka nibaiko gnan'i Hilkia, Ahikama, gnanaky lahin'i Safana, Abdona gnanaky lahin'i Mika, Safana mpanoratsy lalagna, voho Asia, mpanompony manoka, manao hoe: ²¹ " Mandehana voho agnotanio ho gnahy gny sitrapon'i Yaveh, voho koa ho gnany reo tavela a Israely agny ndraiky a Joda agny, nohony gny safany gny boky fa vita. Fa bevata zay, la gny nakin'i Yaveh fa nilatsaky tagnamintsika. Bevata zay, nohony reo razambentsika tsy mijanjy gny nivinolany gny boky gny mba hankatova gnany zay voasoratsy iaby tami-zay." ²² Voho Hilkia, ndraiky gny reo nibaikoany gny mpanjaka, la nagna amin'i Hilkia mpagnambara hafatsy ampela agny, valin'i Saloma gnanaky lahin'i Tokehata gnanaky lahin'i Harsa, mpagnajary ahanjony gny fisorogna ( Nipetraky ta jErosalema tao tami-gny tana ambany tao ie), Voho tami-zay fomba zay ro nisafagnan-drozy tagnaminy. ²³ Hoy ie tamin-drozy hoe: " Zao ro nivinolan'i Yaveh, Ndranagnaharin'Israely: Volagno johary nagniraky gnanao tagnamiko tatoy hoe: ²⁴ Zao ro nivinolan'i Yaveh: Ingo, ampandesy loza etoa ami-toy toera toy ndraiky gny reo olony Zaho, gny reo hazo iaby fa voasoratsy tami-gny boky tao fa voavakin-drozy tagnatrehany gny mpanjakan'i Joda. ²⁵ Fotony fa nahafoy Gnahy voho fa nagnoro gny ditin-kazo magnitsy ho gnany reo Ndranagnahary hafa rozy, mba hikaihany Gnahy ami-gny siaky tami-gny reo raha iaby nataon-drozy__noho zay la hiraraky ami-toy polasy toy gny siakiko, voho tsya ho maty zay.' ²⁶ Fa ho gnany gny mpanjakan'i Joda, nagniraky gnanareo mba hagnontany gnan'i Yaveh tokony hataony, la zao ro volagninareo agnaminy: 'Yaveh, Ndranagnaharin'Israely mivola gnany zao: Gny ami-gny safa njanjinao, ²⁷ fotony iha tso-po, ndraiky nanetry vata tagnatrehan-Dranagnahary lafa renao gny safany hamaly gnany toy toera toy ndraiky gny reo olony, voho fotony iha manetry tegna tagnatrehako voho nandrotiky gn'akanjonao ndraiky tagnatrehako, la fa nijanjy gnanao avao koa Zaho__zay ro fagnambaran'i Yaveh__ ²⁸ ingo, havoriko ho ami-gny reo razambenao eo iha. Ho voavory ami-gny lolonao ao am-piadagna iha, voho gny masonao la tsy ahita gny loza handesiko etoa ami-toy toera toy ndraiky gny reo olony."' Nandesiny reo johary tami-gny mpanjaka tagny zay hafatsy zay. ²⁹ Bakeo gny mpanjaka nagnaraky mpanday hafatsy ka namory gny loholon'i Joda ndraiky Jerosalema iaby. ³⁰ Voho niakatsy tan-tragnon'i Yaveh tao gny mpanjaka, ndraiky gny reo joharin'i Joda voho gny reo olon'i Jerosalema, ndraiky gny reo mpisoro, gny reo Levita, voho gny vahoaky iaby, beka ami-gny bevata ka la zisiky ami-gny kelikely. Voho nivinakiny tamin-drozy gny safa iabiaby gny bokiny fagnenkea hita tan-tragnon'i Yaveh tao. ³¹ Nitsanga tami-gny fitoerany eo gny mpanjaka voho nanao fankea tagnatrehan'i Yaveh, fa hagnaraky gnan'i Yaveh, ndraiky hitandry gny reo liliny, gny reo fitsipiny, voho gny reo lalagnany, ami-gny fony iaby ndraiky gny fagnahiny iaby, hankato gny reo safany gny fagnenkea voasoratsy ami-zay boky zay ao. ³² Nisafa tami-gn'olo iaby hita ta nJerosalema tao ndraiky a Benjamina ie mba hagnenky fagnenkea. Tami-gny fankatoava ro nanovany gny olon'i Jerosalema gny fagnenkea an-Dranagnahary, Ndranagnahariny gny razamben-drozy. ³³ Nalan'i Josia tami-gny tany teo gny reo raha fahavetaveta iaby gnany gny vahoakan'Israely. Nampanompoany gnan'i Yaveh, Ndranagnaharin-drozy gn'olo iaby ta Israely tagny. Fa tami-gny androny iaby, la tsy nikalo tami-gny fagnaraha gnan'i Yaveh, Ndranagnahariny gny razambeny rozy.