¹ Folo roa amby tao i Manase laha nanomboky nanjaka; nanjaka tagnatiny dimam-polo limy amby tao ta Jerosalema tagny ie. ² Nanao raty tamason'i Yaveh ie, manahaky gnany raha mampangaroharo gnany reo firenena fa nalan'i Yaveh tagnatrehany gny vahoakan'Israely. ³ Fa nananga ndraiky gnany reo fipetraha abo nirinavan'i Hezekia rainy, voho nananga gnany reo alitara ho gnany reo Bala ie, nanao gnany reo baon'Aseraha ie, voho niankohoky tami-gny reo basiany gny lagnitsy voho nanompo gnan-drozy. ⁴ Nagnamboatsy alitara fanompoa aoly Ambiasa tan-tragnon'i Yaveh tao i Manase, na la nibaiko aza Yaveh hoe : " a Jerosalema agny ipetrahany gny agnarako zisiky amparany." ⁵ Nagnamboatsy alitara ho gnany reo basiany gny lagnitsy iaby tami-gny kianja roany gny tragnon'i Yaveh teo ie. ⁶ Naroany tan-dohasahan'i Ben-hinoma tao gny reo gnanany lahy. Nanao fagnambara ndraiky sikily ie; namaky fahita ie; voho nandeha tami-gny reo ze nisafa ami-gny maty tagny ndraiky gny reo nisafa ami-gny reo fagnahy. Nanao raha raty maro tamason'i Yaveh teo ie voho nikaiky gny siakin-Dranagnahary . ⁸ Tsy hafindrako amin'ny tany zay notendreko ho an'ny razamben-drozy sasy gny vahoakan'Israely laha toa ka mitandry zay iaby nibaiko gnan-drozy, magnaraky gny lalagna, fitsipiky, voho gny reo lily nameako gnan-drozy tami-gny alalan'i Mosesy rozy." ⁹ Nitinarik'i Manase hanao raty mandilatsy mare noho gny reo firenena fa nirinavan'i Yaveh tagnatrehany gny vahoakan'Israely i Joda ndraiky gny olo ta Jerosalema tao. ¹⁰ Nisafa tamin'i Manase ndraiky tami-gny olony i Yaveh, fa tsy nivaky loha rozy. ¹¹ Ka nandesin'i Yaveh tagnaminy teo gny reo mpifehy gny miaramila gny mpanjakan'i Asyria, nangalaky gnan'i Manase tami-gny rojo vy, nandrohy gnazy tami-gny rojo vy voho namoaky gnazy ho gnany Babylona. ¹² Laha tagnainy gny faharia tao i Manase, la nisoloho tamin'i Yaveh, Ndranagnahariny voho nanetry fatratry gny vatany tagnatrehany gny Ndranagnahariny reo razambeny. ¹³ Nivavaky tagnaminy ie, voho Ndranagnahary ro nitaraignany, ka ren-Dranagnahary gny fitaraignany voho nandesiny nimpoly ho a Jerosalema agny, tami-gny fanjakany tagny ie. Voho la hain'i Manase fa Yaveh ro Ndranagnahary. ¹⁴ Tafarany zay, Manase la nagnamboatsy vala ambaliky ami-gny tanan'i Davida, tami-gny ilany andrefan'i Gihoana eo, tan-dohasaha, tagny, tami-gny filira ami-gny vavahadin-kazandrano. Nagnodidy gny havoan'i Ofela ie voho nananga gny vala la vatany abo. Nametraky mpifehy mahery fo tami-gny tana mivala iabiabin'i Joda ie. ¹⁵ Nalany tsy ho an-tragnon'i Yaveh ao gny reo Ndranagnahary hafa, gny aoly, voho gny reo alitara iaby namboariny tan-bohitsiny gny tragnon'i Yaveh tegny ndraiky ta Jerosalema tagny, voho nariany tam-balikiny gny tana tegny zay. ¹⁶ Namboatsy indraiky gny alitaran'i Yaveh voho nagnomea soro ho fagnati-pihombona ndraiky fagnati-pisaora teo ie; nibaiko gnan'i Joda hanompo gnan'i Yaveh Ndranagnaharin'Israely ie. ¹⁷ Ndra zay aza, gny vahoaky la mbo nanao soro tami-gny reo fitoera abo avao, nefa ho gnan'i Yaveh raiky, Ndranagnaharin-drozy. ¹⁸ Laha gny ami-gny reo raharaha hafa mikasiky gnan'i Manase, gny vavaky nataony tamin-Dranagnahariny, ndraiky gny safany reo mpahita nisafa tagnaminy tami-gny agnaran'i Yaveh, Ndranagnaharin'Israely, ingo, voasoratsy ami-gny asany reo mpanjakan'Israely ao zay. ¹⁹ Agnainy zay ao gny tantarany gny vavaky nataony, ndraiky gny fihetsim-pon-Dranagnahary tami-zay. Ao avao koa gny fahotany ndraiky gny reo fahadisoany iaby, voho gny reo toera nananganany gnany reo fitoera abo ndraiky nametrahany gny reo baon'Aseraha ndraiky gny sarin-draha voasokitsy talohany gny nanetreany gny vatany__Voasoratsy ami-gny tantarany reo mpahita ao zay. ²⁰ Voho nimaty tami-gny reo razambeny tagny i Manase, ka nalevin-drozy tan-tragnony tao. Arona, gnanaky lahy ro lasa mpanjaka nilimby gnazy. ²¹ Roapolo roa amby tao i Amona laha nanomboky nanjaka; nanjaka tagnatiny roa tao ta Jerosalema tao ie. ²² Nanao gny raty tamason'i Yaveh, ie manahaky fa nataon'i Manase, rainy. Nanao soro ho gnany reo sarin-draha voasokitsy iaby fa nataon'i Manase rainy i Amona, voho nanompo gnany reo ie. ²³ Tsy manenty vata tagnatrehan'i Yaveh ie, manahaky fa nataon'i Manase rainy. Fa koa, intoy Amona toy avao la nanao fahadisoa maro mare. ²⁴ Nanao tetiky hanohitsy gnan-drozy mpanompony voho namono gnazy tan-tragnony tao avao. ²⁵ Fa gny lony gny tany namono gnany reo iaby nitetiky hanohitsy gnan'i Amona Mpanjaka, voho nataon-drozy ho mpanjaka nilimby gnazy i Josia, gnany lahy.