¹ Njite Bildad suhita-dalri shepani, lriaco lrirso: ² ¿Coancaojli pjenaotsa cacoatsa pjia cayoji caaco capisho pjia? ¿Cpancaojli pjenaotsa caolri kjaidadalri shoca njaji yacoti pimotoetalri pinoma lrikjoite? ³ ¿Capja Dio imatsiketaca jliaji matsiadalri? ¿Capja Dio inaitja maatsi lrirso jliaji corridalritsa imatadaca? ⁴ Njaji pienipe nanaitja mamatsicanao Dio ikjoete; njite wanji cayocani, niini Dio icada namatsicana carrotsa iinona. ⁵ Job, pioma Dio ajádalri sho matsia, njite pitatja kjenácarro lricapaca pjia jliaji Itaitakjeti iminalri. ⁶ Matsia cadaa picaolre njite matsia minitsa njaji pinaitjalri corrintja Lrinaitja maatsi pirso, icamitsantja lrinaitja pirso njite lridieta pjia coaji piaca caicarrom tsenakja. ⁷ Corri cadana piatoa pirso aima pinaani, mitsa piketem nacojlena aima njaji pinaani njite caconaite pjia naikjaote. ⁸ Pinaitja matsiacalri, pitatja pjimi piicao coaji piaca njaji waferrinaipemi oopi, njite piwapa pjimi matsia piicao cocaca jliaji nanjirri pia. ⁹ Walriperrim catoa fa njite corri toa coca wanji ima kjeyaperrim catsa waofacawa jalredaoca lrico. ¹⁰ Nacanantaotsa pjia, nacaiteotsa pjimi coajica pianjícarro. Nacanantaotsa pjia pjiomi njaji nanjirri nacaolre ricope. ¹¹ Jliaji jaico papiro corrin lritaita lritaoñacawa teeco jotojotopalri ioya. Njaji tidoapa corrin nataita nataoñacawa corricawatsa pacapa ooni. ¹² Caafi cadanatoa njaji mayoa canapetsa, kjeya pja merricana malritsi ioya ¹³ Icatsa cayoca njaji inaiki imaodacacape Dio ioya; pjiomi jliaji matsiadalri nawapalri tja njaji inaiki matsiperri Dio iwayaketa naoyana. ¹⁴ Corriotsa matsia carrocani lrinaco jliaji lricadalri lricaolre inaco, njite lrimaodacaca midalri nacotsa, cayocaniji coca capisho irroa eeni itodalre naco. ¹⁵ Lriorsoa tjaotsa lriipana naco, mitsa corriotsa lritarrawatá carroca lriapiya; lrioma tjaotsa jlipacani, mitsa corriotsa lricadaaca carroca lrirso. ¹⁶ Cayoca njaji inaiki matsiperritsa canapirri jipolré perri sho, jérri imoto cádanaco nanacojle icamitsa napalri imotocawa pjiomi yacalrecoa naco. ¹⁷ Nápalri shewawa jiipada ipatakja lrico matsiacawa nanji jiipa. ¹⁸ Mitsa apada itaacadana corriotsa nanjí carroca coancawa pia nemawa. ¹⁹ Icampjatsa natiima iwayacacawa cayo, njite panenakja malritsi imotoatsawa nemacarrom pia. ²⁰ Dio icoadata jliaji inaiki matsiadalritsa inaitjaca, mitsa lripeeco lrioyao jliaji inaitjacada maatsi. ²¹ Dio icadaa tsenakjaotsa picaaca, njite catimácarro tsenakja pjia. ²² Njite capaimani caotsa njaji picoema; njite naapana iwayacacaotsawa.