¹ Njite Elifaz temanitatairri shepani, lriaco: ² ¿Capja canacaica apada inaiki Dio irso? ¿Capja canacaica Dio irso apada inaiki cajikjedalri? ³ ¿Capja pataita pacatimataca jliaji Jidatinalri panaitja cadaa matsia lrirso? ¿Corritsa coca pamatsiaca Lrirso corri cadatsa coca pimatsicanaa? ⁴ ¿Capja pifio capoa Lriiwana Jlirrapiteta pjia njite Lricaite piacona? ⁵ ¿Capja corrica pimatsicana imaimaca ikjaoteca? ¿Corri capoa yami pinaitjaca pimatsicana? ⁶ Ima pia capoa pi-palratan nakjoite toa pikitsinda irso pjita lrioya picoadao pjaa mikjapantsa, njite wadee macoadana catsa jliaji pianda lrirso opi pjita lritsayan lrioya njite matsayantsa picadacani. ⁷ Corrin pia nairrao ooni nairrá-carro njaji inaiki metaperri icaolre; pifarro iñjaodati naoya njaji caiwiperri irso maawitacai ⁸ pjia cada pia pia jiipai macadalri iminalri, njite piofa pia lri ricoda pjia, inaiki caconadalri narso. ⁹ Pjienita pioyawa teecoa njaji madoiyoanaipe cayokjetsate; njite picadaa nadejica njaji mjanirrinaipemi nacoadatsa. ¹⁰ Caishopa, aima matsiperri iwapaca pjia piwaida naco, njite pifio coca catsa iwana. ¹¹ Niini cadaocádalri wadee picapaca; njite ooni imaimaca iita pjia. ¹² ¿Capja corrica Dio iofawa eenolricojle? ¡Picapa coajica nayenonca njaji jiwirsida! ¹³ Njite piaco cayoji: ¿Cocao piaji Dio naco? ¿Capja Lritaita lricaiteca paacona cadaocacawa lrico? ¹⁴ Njaji cadaocaperri naitani waoyani wadee Lricapaca fa; teeco lriofacawa eeno iwawa lrico niini corrin coajica lricapaca fa. ¹⁵ Mamacatsa pioyao coaji piaca nanaitjaca oopi njaji inaiki matsiperritsa ¹⁶ njaji mayamirri njenana ipjeya toa, njaji iwayacacalriwa cayoji ooni iwapoa ipeeco capisho panti yemacarrodao, ¹⁷ njaji icaitecape pia Dio irso: ''Pjiena waoya; njaji icaitecape pia: ¿Coca Lritaita lrinaitjaca fa jliaji Jidati iminalri?'' ¹⁸ Cayo cadanana, Dio oipakjanta naapana inaaniti matsiaperri sho; teeco jliyapa nooya nawaopiakje njaji inaiki matsiperri. ¹⁹ Catima nacaolre njaji inaiki matsiaperri nacapa cádanaco coajica njerrapitaca njaji inaiki matsiperri; njite njaji mamatsicanapetsa necaa tsakja naicao. ²⁰ Naaco nanaco: ¿Corritsa jliaca iwayacawa jliaji yemalri pia wakjoete? njite tiyé imjaita pjiomi njaji nayarroajipe. ²¹ Panaya pimatsieta piwaopiakje Dio iapiya pirsocarro imaodacakjeti picaolre ricó Lriapiya, pinaitja cadaa cayo Lrinoatsa pikjaolre matsiacalri ricó. ²² Notatja piinai caiwi ricotsa, piwapa pjimi coajica Lricaiteca pjia, pimatsieta Lriaco picaolre ricó. ²³ Pidia cadawa Jidatinalri ikjaolre, jlirreta tsenakjaotsa pjia, yami cadatsakja inaitjaca imatsicanawa apjetsida naco. ²⁴ Miperitsa njaji pi-ricoca cayoperritsa jiipai italre sho, njaji piwirrote natsiaperri Ofir lrikjoiteperri cayo caotsana nacayosho njaji jiipada iorsoacapewa onicaji lrico, ²⁵ Jidatinalri caotsa pi-ricoca, palrata cacoadadalricani pirso. ²⁶ Niiniotsa picatimatacawa Jidati iminalri nacojle; pjirretaotsa picapa Dio ikjaolre. ²⁷ Pitatjaotsa Lriinai, njite Jlimiotsa pirso; njite picaoña watsa njaji picakiterri pinaitjacaotsa Lrirso. ²⁸ Njite coca cadaa picaite Lrirso lrinaitjaotsa cayoji picaite capisho; njite catjinacaotsa pirso njaji pinaitjalrotsa cayoji camarrai icana capisho paapowa. ²⁹ Dio ikjenataca njaji inaiki padalreperri njite Lrimanacota njaji inaiki kjenaperritsa. ³⁰ Lriyomjeta tsakjaotsa njaji inaiki camatsicanadalri tsakja; yomjeotsani lrinaitja capoa matsia lricaapi sho