¹ Niini pia ape atsia Uz jipaite ricó lriipitana Job; Jliaji atsia, corrin lrirso lrimatsicana inaiki irso njite inaitjacada matsia pjiomi naco, ifio cada Dio iwana njite shenitaaca cadawa matsidalri ioya. ² Lrirso pia siete lrienipe atsianai njite madalrima lritonaipe. ³ Lrirso pia siete mil oveja, tre mil camello, quiniento buey atsiana njite cayo tsakja inarrona, quinientona burro, njite aima lrirsoperri idejicape lrirso. Icapiatsa apada atsia caconadalripja pjiomi ioya lriyarro ima, iofacadawa jérri imotokemjetewa. ⁴ Njite njaji lrienipe, nacoanaa nanaitja mana nacatimataaca carroa nawada cádanaco jico caojli piana njanirri iipana lrico. Nawana mana naikjaolrewa njaji nakitsidoa madalrimade nairrá-carro njite naiñjácarro nainai. ⁵ Njite yaami cádanaco mana nacatimataacawa, Job inaa naaca naoma njaji lrienipe njite lrinaitja narso matsiacarrona namatsicana ioya Dio ipeyajle. Lricafiawa piyompinaco toa njite lricadaa mana ofrenda lrimjaitanda nacoanaa naco njaji lrienipe, ima lriaco cayuoji: ''Ima wadetsa nanaitja piaca namatsicanao njite caacona matsi Dio naco nacaolre ricó.'' Caidalri manatsa Job inaitjaca narso. ⁶ Njite lriocawa jliaji jalredaoca naacawa njaji Dio yenipe lrikjaolre nemacarro lricapao lripeyajle jliaji Iminalriti, njite cayo cadana ñacaimi íno tsakja nainai. ⁷ Dio iaco ñacaimi irso: ''¿A kjaite pino?'' Njite ñacaimi iaco Dio irso, lriaco Lrirso: ''Noajicatsa noyofia nocapa macadatsa jalredaoca lrico.'' ⁸ Njite Dio iaco lrirso; ¿Capja picapatsa jliaji norsodalri Job? Ima corrin pacapa apada atsia lricayosho jalredaoca lrico, apada atsia corridalritsa inaitja maatsi apjetsida irso, inaitjacada matsia, apada ifio cada Dio iwana njite shena cacadawa matsidalri ioya.'' ⁹ Njite ñacai iaco Diomirso, lriaco lrirso: ''¿Capja piwada Job ifioca piiwana ajádalri lricaolre ricó? ¹⁰ Ima pidanatani njite njaji lriipaneta, padenirri njaji lrirsonipe. Picada matsiaca lrirso pjiomi njaji lridejicalre, njite aima cayao njaji lri-vacan jalredaoca lrico. ¹¹ Mitsa panaya pinotani njite pjiomi njaji lrirsonipe maatsícarro picapácarro coajicaotsa lrimacadawalretaca pjia Piekjoete.'' ¹² Dio iaco ñacai irso: ''Picapa pjiomi njaji lrirsolri, panaya nocadacani picaapi ricó. Icamitsa corri watsa pinota lridada.'' Icamitsa ñacai imoto iawa Dio ioshete ¹³ Njite apapia jalredaoca, naawa njaji lrienipe njite njaji lritonaipe nairrá-carro njite naiñjacarro napjerri iipana lrico. ¹⁴ Njite ape atsia idecada iacoti iocawa Job iderse njite lriaco lrirso: ''Namoyeta piaca jiipai njaji buey njite njaji burro naiñjaca nacodapi. ¹⁵ Niini njaji apana inaiki inocape Sabá lrikjoite náno nakjoete, oopi njepa nadena. Naino pjiomi narsoperri matseta sho. Icamitsa njoa yomje nonocarro nocaite pjia.'' ¹⁶ Caaco cadana toani Job irso, ape íoca tsakjawa lriderse, lriaco lrirso: ''Tiyé jiwawa eeno lrikjote njite lrimjaita njaji oveja njite pjiomi njaji pirsoperri tsakja. Icamitsa njoa yomje nonocarro nocaite pjia.'' ¹⁷ Caaco cadana toani Job irso, ape íoca tsakjawa lriderse, lriaco lrirso: ''Nano madalripoco njaji caldeonai, niini naino njaji camello. Naino tsakja matseta sho njaji pirsoperri. Icamitsa njoa yomje nonocarro nocaite pjia." ¹⁸ Caaco cadana toani Job irso, ape íoca tsakjawa lriderse, lriaco lrirso: ''Njaji pienipe njite njaji pitonaipe naa pia nairra njite naiñja tsakja pirri pjerriti iipana lricojle. ¹⁹ Pada caolri kjaidadalri ipjia jalrapocolri lrikjoite niini lripjiaca kjaida lriipana nacojle. Icamitsa jliwacawa jliaji panti, niini panti inocana pjiomi. Icamitsa njoa yomje nonocarro nocaite pjia.'' ²⁰ Icamina Job jinico yemawa, lritsafá lritsayani, jlirrita pjiomi lritsicolre, njite jliwa lriorsoawa jipai nacojle tjewacjle lrinoma, njite lria matsiadalri Dio irso. ²¹ Lriaco cayoji: ''Matsayan pia nomoto nocapa jalredaoca njodoa ioya, niini matsayan tsakjaotsa nodiacawa nirse tsenakja. Dio piatsa ia norso pjiomi, niini jlia tsenakja idieta pjiomina. Matsiadalrica lriipitana jliaji no-Diote.'' ²² Pjiomi nanaco coajica Job jiyapa piacawa, corrin lrinaitja lrimatsicanao, njite corrin lricaite maatsi Dio naco.