¹ Njite lriocawa jliaji jalredaoca nanocawa njaji Dio yenipe lrikjaolre nemacarro lricapao lripeyajle jliaji Iminalriti. Njite napecolrico ñacaimi íno tsakja nainai lriem+acarro Iminalriti ipeyajle tsakja. Niini Iminalriti iaco ñacaim irso: ''¿A kjaite pino?'' ² Njite ñacaimi iaco Dio irso, lriaco Lrirso: ''Noajicatsa noyofia nocapa macadatsa jalredaoca lrico.'' ³ Njite Dio iaco lrirso; ¿Capja picapatsa jliaji norsodalri Job? Ima corrin pacapa apada atsia lricayosho jalredaoca lrico, apada atsia corridalritsa inaitja maatsi apjetsida irso, inaitjacada matsia, apada ifio cada Dio iwana njite shena cacadawa matsidalri ioya. Corrito lrinaitja lrimatsicanao, pinaa cadana noemaca lrikjoete, nonaitjçarro matsi lrirso mikjapantsa. ⁴ Njite ñacai iaco Dio irso: ''Apad atsia itaita inaitjaca coca catsa lrioma capoa lriyomjetaca lricafica, atee corrin coajica lrinaitjaca lriyarroaji iñáa cadawa o nja cadaa njaji lrikitsiñape. ⁵ Niini panaya pinota lridada njite lriapi tsakja, niniotsa picapa coajica lricaiteotsa maatsi Pinaco piekjoete tsa.'' ⁶ Niini Dio iaco lrirso: ''Matsiatsa, panaya nocadani picaapi ricón; icamitsa corrin pitaita piinocani. ⁷ Ikena ñacai imoto iawa Dio ioshete. Njite ikena lricadaa iyaoniti matsinaperri imotocawa Job idada naco, jlipa lrico nakjoite atee lripolrico nacojle. ⁸ Job jipa poalri iwanam jliweetaca shopawa lrisho,

njite jliwa lriofawa palripoco ipecolrico.

⁹ Njite roaco rsoaji lriino lrirso: ''Corritoa pioma pimaitja pimatsicanao? Caaco pjia maatsi Dio naco mayamí carroena pjia.'' ¹⁰ Mitsa Job iaco lriino irso: ''Caacoca pjia inarro majicadarrom sho. Ajadalri warsotsa wanjí wacoadataca njaji matsiaperri mitsa njaji matsiperri tsakja.'' Nanaco njaji coajica Job jiyapawa, corrin lrinaitja lrimatsicanao lrinoma sho. ¹¹ Njite njaji Job ikitsiñapeji madalridade njemi cádanaco coajica jliyapacawa matsi, ikena nánoca nayacalre rikjoite nacoana: Elifaz, Teman lrikjoiteda; Bildadsuhita tairri, njite Zofar, Naamat njitedalri. Nacaitiaca piawa naocácarro pacoacatsa lriderse naoyácarro lrinai njite nacatimatácarroni. ¹² Njite njerreta cádanaco nacapan tekjoite toa, corrinatsa nanji jliacani. Ikena naiyaca kjaida; natsfá natsayani njite napeco palripokjoa nanacoa njewida nacó. ¹³ Naofawa jiipai ricó lriinai siete jalredaoca njite siete deepi. Corrin coca nacaite lrirso, nacapa capoa matsinaca njaji jliyapalri irricoda.