¹ Awo waliwo omuntu owa mu Bafalisaayo, ibara lyamwei Nikoodeme omufuzi omu Buyudaayo. ² . Oyo naiza jali obweire, namukoba ati "Labbi, tumaite nti oli mwengesha eyazwire edi Okanca: kubanga ndoowo muntu ayiza okukola bubonero buni bwo kola we, kwiyanku nga Okanca ali naye?" ³ OYesu namwiramu namukoba ati "Ddala ddala nkukukoba nti omuntu natabyalibwa murundi gwa kabiri tasubula kubona bukama bwa Kanca". ⁴ . Nikoodemo namukoba ati, "Omuntu asobola atya okubyalibwa nabanga mukaire? Asobola okwingira omukidda kya maamwei nabyalibwa omurundi ogwakabiri? ⁵ OYesu namwiramu ati, "Ddala ddala nkukukoba nti omuntu natabyalibwa maizi na mwoyo, tasobola kwingira mubukama bwa Kanca. ⁶ . Ekibyalibwa omubiri kibba mubiri, ne kibyalibwa omwoyo kibba mwoyo. ⁷ Tewewunya kabanga nkukobere nti kibagwanire okubyalibwa omurundi gwakabiri. ⁸ . Ompungo awungira jakwedya nowuura okuwuuma kwamwei, naye tomanya jankuzwa, newakubadde jakwaba; nemwo atyo nabba buli muntu yenna yenna abyalibwa omwoyo." ⁹ Nikoodemo nairamu namukoba ati, "Ebyo bisoboka bitya okubawo?" ¹⁰ . OYesu namwiramu namukoba ati, "We omwegesha wa Isiraeri, notomanya ebyo? ¹¹ .Ddala ddala nkukukoba nti Tubaza byetumaite, yutengeza kye twabweine, naye temwikiriza kutengeza kwaiswe. ¹² Ne bakobeire ebyansi, nemutaikiriza, mulikiriza mutya nenabakobera ebya mwiguru? ¹³ . Ndoowo muntu eyali aninireku omwiguru, wabula eyazwire omwiguru, niye mwana wamuntu. ¹⁴ Nka OMusa neyawanikire Ompiri omwiruggu, nemwo kityo nomwana wa muntu kimugwanire okuwanikibwa. ¹⁵ . Buli muntu yenna yenna amwikiriza abe nobwomi obutawawo omuye." ¹⁶ "Kubanga Okanca neyayedelye ensi atyo nokuwayo nawayo omwana wamwei eyabyalibwe omwei yeika, buli muntu yenna yenna amwikiriza aleme kubula, naye abe nobwomi obutawawo." ¹⁷ . Kubanga OKanca teyatumire mwana wamwei munsi, okusaara ensi omusango, naye ensi ecungukire okuye. ¹⁸ . Amwikiriza tegumusinga; atamwikiriza gumara okumusinga, kubanga taikiriza eibara lya mwana eyabyalibwe omwei yeika owa Kanca. ¹⁹ Gunni negwo musango kubanga eisana rizire omunsi, abantu nebedya omulikirya okusiga eisana, kubanga ebikolwa byabwei byali bimbi. ²⁰ . Kubanga buli muntu yenna yenna akola ebitasanira akyawa eisana, naye taize eri eisana, ebikolwa byamwei bireme kunenyezebwa. ²¹ . Naye akola amazima aiza eri eisana ebikolwa byamwei bibunike nga byakoleibwe mu Kanca. ²² Oluvannyuma lwe ebyo OYesu naiza nabangeswa bemwei omunsi ya Bayudaaya; nalwayo nabo, nabatizza. ²³ . Naye OYokaana yalinga abatiriza omu Enoni ampi ne Salimu, kubanga nijjo jiwali amaizi agaigi, nebaizanga nebabatizibwanga. ²⁴ . Kubanga OYokaana yalinga akyali kutekebwa mwikomera. ²⁵ Abagereswa ba Yokaana nomubuyudaaya ne bamba nempaka, omu bigamba ebya kutukuza. ²⁶ . Nebaiza eri OYokaana, nebamukoba nti "Labbi odi eyali naawe eseere wa Yoludaani, niye gwewategezanga, bona, oyo abatizza, nabantu bonna bonna ababa jali". ²⁷ OYokaana nairamu nabakoba ati, "Omuntu tasobola kubba na kintu kyona kyona kuiyaku nga kimuwerebwe okuzwa omwiguru. ²⁸ . Nywe abennyini muli banjulizi bange nenabazira nti tinije Kristo, naye nga natumibwe kumukulebera. ²⁹ . Alina omugole niye awasire, naye omukwano gwamwei oyo akuwasa, ayamera nga akumuwulirye. ³⁰ Ye kimugwanira okukula, naye nje okutoowala". ³¹ . Azwa omwiguru niye afuga byonna byonna; owa munsi abba wa munsi, abaza byamunsi, Azwa omwiguru niye afuga byonna byonna. ³² . Kyeyabweine era kye yawulire nekyo kya batengeza, naye ndoowo muntu aikiriza kutegeza kwamwei. ³³ . Aikiriza okutegeza kwamwei nga ataireko akabonero kamwei nti Kanca wa mazima. ³⁴ Kubanga OKanca gwe yatumire abaza bigambo bya Kanca, kubanga OKanca amuwa Omwoyo wamwei aizwire. ³⁵ . Oitaiswe ayandye omwana, era yamuwaire byonna byonna omu mukono gwamwei. ³⁶ . Aikiriza omwana alinna obwomi obutawawo, naye atamwikiriza omwana, talibona bwomi, naye obusungu bwa Kanca bulibba kuniye.