¹ Bunni nibyo bukwenda obwazwire edi Okanca obukukwata okukibuga Ninive. Obwawandikibwe omucitabu kyakabonekerwa eca nakumu Omweru Kossi. ² Omukama Okanca wabwiiya atete wankikidi, tataka bantu baamwe abatali Kanca. ³ OMukama Okanca alwaawo okunyiiga atete ali nobuyinza obutakobebwaku. Okanca watabula wabawo ompuungo ne empewo owakampanggwe owamani; Atete ebiguru niba cuucu owa magulu gaamwe gwe gasikula nka akutambula. ⁴ Alagira enyanja nekalla,atete nakalya emiiga Olwo emisiri ja Basani nejo kulusozi kalimeeri nezikala atete nebimuli byokunsozi lebanon nebikala. ⁵ Okanca ejaba ensozi ezikooto zitengeeta obusozi obudyoli nebusanyuka, ensi yoona yona neyesunda na bantu bamu boona boona nebayugumira. ⁶ Nani asobola okwemerawo nka asunguwaire? yenani asobola okubawo nka mwomi omumaiso gamwe. Obunsungu nka bumutabukire nka omura amabaale gamenyekamenyeka negeisya okucuucu. ⁷ Okanca musai, niye kifo eciguru ca kwewogomamu omubiro byabizibu ;q atete ye abudabuda abo mweyuna. ⁸ Naye abazigu bamwe alibasaniawo nomwizulo ogwa amaizi agamani muno; alibasindikka ocirikirya eco kufa. ⁹ Nywe mukwesomera kukola ci Okanca? Aiza kuba sanyawo; wabulewa ecizibu ecisobola okwimukawo omulundi ogwakabiri. ¹⁰ Gonze mulinga amawa agakwatagaine, ate nemuba nka abanwyi bamwenge, mukwaaba kusanawo nka eisubbi erikalu nirimamuka nomuuro. ¹¹ Omuntu yalugire omunywe oyo e Ninevi ngali nebibi bingi muno bye yaali ategekere okukola, naiza okwesoomera Okanca. ¹² Okanca akukoba ati; Abantu bange abaisirari, gonze Abassiria bataa baingi batyo, atete nka bamaani muno nkwaaba kubeyawo bawewo. Gonze nywe nabaicirye omukubonabona, tinkwaaba kwiirayo okubaica omukubonabona tee ¹³ Ati buni okumenyamenya ejoko abantu abo izeire okumikono jaanywe. ¹⁴ Okanca atairewo eciragiro okurwanywe; Ninevi: Eibara ryanywe rikwaba kweyeberwa; titwizza kubasimira kuba nabaizukulu. Nkwaaba kusaniawo ebifanani bya misambwa jaabwe, ebyabazibwe nebyo ebyakoleibwe mu byooma ebyasanusibwe omumuuro ebiri Omubirooro byabwe. Nkwiiza okubasakira amagombe, kuba temugwaine kubawo kunsi nka muli bomi ¹⁵ Abantu ba Buyudaaya mubonne eni! Omukwenda akwiiza okunsozi nkakuleeta obukwenda obusai atete akulangirira emirembe. Ati buni mukole embaga atete mwiciirye bye mwegamire edi Omukama Okanca kuba ababbi abo tebakwaaba kwirayo okubalumba. Bazikiriziibwe nebawaawo.