¹ Agulipa nakoba oPawulo nti oikirizibwe okuwuzia ensonga zaamu: Awo oPawulo neyekera nagolola omukono nawooza nti. ² "Byenajunanibwe Abayudaaya byonabyona, omukama Agusito, nesimire kubanga nkwaba okulowozia byonabyona olwa leero woli; ³ Era okusinga olw'okubba omaite empisa nebibuuzibwa byona ebiri omu Bayudaaya: nico nkuzwa nenkwagayira ongumikirye okumpulirya. ⁴ Kale empisa zange okuzwa omubuto, ezaasookanga okubba omuyiwanga lyaiswe n'omu Yerusalemi, Abayudaaya bona bazimaite. ⁵ Abantegera okusooka eirai, singa bataka okuntegera bwenegenderezanga omukitundu ekisinga obuzibu ekye eiddini yaiswe nimba mu Falisayo. ⁶ Ati nyemereire okusarwa omusango olw'eisubi okanca lyeya nsubize mubazaiza baiswe lye basubire. ⁷ okuikaku ebika byaiswe eikumi n'ebibiri nga banyikiranga okuereza okanca emisana n'obwiire. Olw'essubi elyo ai omukama! Abayudaaya nikye bazwire nibampabira . ⁸ Kiki ekikubalowozesia nti tikiyizinka okanca okuyimbola abafu? ⁹ Amazima ningye ngyenkai nalowozanga nga kingwanire okukolanga obubbi ebigambobinji okwiibara lya Yesu omunazalesi. ¹⁰ N'okukola ninkolanga ntyo eYerusalami: Ngye nimbawangayo omu makomera abaikiriiri bamwe bainji bwenamare okufuna obuyinza okuzwa edi bakabona abansinga obukulu, nibayitibwa, nenjikirya okufa kwabwe. ¹¹ Era ningye nababonerezanga emirundi minji omumakungaaniro era nimbawalirizanga lukako okwwivora;! Ate nimala nembasunguwala muno nimba yica ebitakobeka no kuyica enzai webibuga ¹² Naye lwaali lumwe bwe nalinga nkwaba e Damasiko nga nina obuyinza nkambataine ne baluwa n'emiguwa n'okulagirwa okuzwa edi Abakabona abakulu. ¹³ Omwiyiwanga! ai omukama, nimbona ekimyanso, omunzira omusana gwazwire omuiguru! Nga gukwaka okusinga eisana nigumasamasa okunetolora naba beeenali nabo. ¹⁴ Ne tugwa wansi swenaswena nempula eidoboozi nga likusimoora nangye omululimi olw'Ebulaniya nti, Sawulo, Sawulo, okumpigaanya lwaki? kibba kizibu muno wwe okusamba okumwinda ; ¹⁵ Ngye ni nkoba nti niwe naani, omukama wange? Omukama waiswe nankoba nti, ni ngye oYesu owokuyiganya, gwe. ¹⁶ Naye ogolokoke oyemere kumagulu gamu nico nzwire nkubonekere nkulonde obbenga omuwereza era omujulwa webyo mwombonekeyire, era owebyomwe nakubonekeranga. ¹⁷ Nga nkuwonya omubantu, n'omubamawanga, naye ngye nkukutuma okuzibulya amiso gabwe. ¹⁸ Bacuuke okuzwa omukirikirya baire omukitangala nokuzwa mu buyinza bwa sitani baire edi okanca basobole okuwebwa okutolebwaku ebibbi nobusika edi abo abaikiriirye olw'obwikiiriiri. ¹⁹ Kale no, ai omukama Agulipa, tina lemere kugondera okw'olesebwa okwo muiguru. ²⁰ Naye nasokere kubuulira abo omu Damasiko no' Muyerusalemi, era ne munsi yonayona n'Abanamawanga, okwenenya n'okukyukira kanca nga bakola ebikolwa ebisanira okwenenya. ²¹ Abayudaaya, olw'enugu, nikyo bazwire bankwatira omuyekaalu! nebageziaku okunyita ²² Kale no bwenafunire obujuni okuzwa edi okanca okuyica okulunaku luni nyemereire nga ntegeza abato n'abakulu nti tinkusimoora kigambo bugambo mbe, wabula aba nnabi no' Musa byeba simoire nga byaba okuiza, ²³ nga bwekingwanire okulisito okubonyabonyezebwa era niye ari yekera mukuyimboka okwabafu okubulira ekitangaala edi abantu nabanamawanga ²⁴ Yali acayaba omu maiso okuwozia atyo; oFesito namubogola nti, eeh? Otulekeshe? Ogwire iraru? oPawulo! okusoma okwo okwalukoko omaite nga kucusa omuntu okubba omulalu! ²⁵ Naye oPawulo nakoba nti, tindalukire; oFesito omusai omuno naye dala nku simoora ebigambo ebyamazima; n'obuntu bulamu. ²⁶ Kubbanga nomukama, ebigambo bino byenku simoora anu n'obugumu, abimaite olw'okubba maite nti ebigambo bini tibyekwekere edi omukama, gonze ekimwe kubanga ekyo tikakolebwe mubo. ²⁷ Okyikiriza aba nnabbi ai mukama Agulipa? Maite ng'oyikiriza. ²⁸ Aulipa nakoba oPawulo, okutaka kunsenda senda onfoole omukulisitayo? ²⁹ oPawulo nakoba nti, nandisabire okanca olw'okusendasenda okuddooli oba okukooto tiniwe wenkai ai omukama naye nabantu bonabona abawulire ekigambo kinu olwa leero bafooke nga ngye okutolaku okusibibwa enjegere kuni!! ³⁰ Omukama naimuka, owaisaza yeena,no' Berenike, nabo bonabona abali bayikayire n'abomulukiiko, ³¹ nga bakoba bati," omuntu onu nakolangaku kintu kibbi kyonakyona kisianire okumutaisia oba okumusibya omu ikomera." ³² Agulipa yeena nakoba oFesito nti," omuntu onu yandisoboire okutaisibwa singa tiyajulire Kayisali!"