¹ Awo olwaikiire omu Ikoniyo nibaingirira kumwe,omwinkamyo erya Buyudaaya nibasimoola batyo;ekibbura kikoto n'okwikiriza nibaikiriza,Abayudaaya n'abayonani. ² Baitu Abayudaaya abatagondere,nibatangula abamawanga nibafoola ememe zaabwe okubba emibbi edi abaluganda. ³ Awo ni bamala ebiro bingi nga babuura nobuvumu bwingi omumukama waiswe eyategeezerye ekigambo eye kisa kyaamwe nga abaweerya obubonero nebyamagero okukolebwanga omu mikono gyaabwe . ⁴ Baitu ekibbura eky'omu kibuga nikyawukanamu;abamwe n ibba oku lubaju lw'abakwenda. ⁵ Abamawanga n'Abayudaaya amwe n'abakulu baabwe bwe babalumbire okubakoora eby'ekyejjo,okubajooga era te n'okubakubba amabbaale. ⁶ Bwe bakitegeire nibairuka omu bibuga ebye Lukaoniya,Lusitula ne Derube; n'ensi ezirirainewo; ⁷ Nibabb'eyo nka bakubuulira enjiri. ⁸ Omu Lusitula,ne waaliyo omuntu nka taali n'amaani omu bigere byaamwe n'abba ng'awo mulema okuzwa omu kidda kya maamwe nka tatambulangaku gonze akadooli. ⁹ Oyo nawuura oPaulo nk'akusimoola:yena namwekaliirya amaiso n'abona nk'alina okwikiriza okucungura. ¹⁰ oPaulo n'asimoola n'eiraka elikooto muno;ati yemeera!oku bigere byaamu,weegolole! n'aguluka n'atambula. ¹¹ Ekibuura nikyabweine oPaulo ky'akoore,ninaimukya amaraka gaabwe nka basimoola omu lulimi olulukaoniya,Aba Kanca abaikaire gye tuli nka bakwisaana nk'abantu. ¹² oBalunabba nibamwita zeewu n'oPaulo nibamweta kerume,olw'okubba niye yasingire okusimoola. ¹³ Okabona wa Zeewu,eyaali omu maiso g'ekibuga n aleeta onte n'engule ez'ebimuli okwika oku lwigi nk'akutaka okuwaayo eSaddaka ebibbura. ¹⁴ Baitu abakwenda,oBalunabba n'oPaulo bwe bawulire,niboonola engoye zaabwe;nibafubutuka nibabba omu kibuura nka bakusimoola igurue. ¹⁵ Nka bakukobba ati abasaiza!kiki ekikubakozesya ebyo?Iswena tuli bantu abakwatiibwa byona nka nnywe era te tubabuulira ebigambo ebisai ,muleke ebyo ebitaalimu;mukyukire Okanca omwomi,eyakoore eiguru n'ensi n'enyanja n'ebintu byona ebirimu. ¹⁶ Omu migyo egyayakaire yalekere amawanga goona okulambuura omu mazira gaago. ¹⁷ Baitu tiyeemaareyo nka talina mujuurwa olw'okubba yakolanga kusai nka abatonyeseza oikendi okuzwa omwiguru,n'ebiro eby'okubalirangamu emere;naizuulyanga emitima gyaabwe n'emere n'eisanyu. ¹⁸ Bwe basimoire ebyo,nibaziyiza ebibbura lwa mpaka okubawa esaddaaka. ¹⁹ Bayitu Abayudaaya nibazwa omu Antiyokiya ne ikonio nebabatangula ebubbura olw'okubba oPaulo n'amabbaale,nibamukulula nibamulukya enzai wa Kibuga nka bakulowooza ati afiire. ²⁰ Baitu Abegesya nibamwetooloire,nayemeera nayingira omu kibuga;oku lunaku olwa kabiri,nayaba n'oBalunabba okwika eDerube. ²¹ Nibamaare okubuulira enjiri omu kibuga ekyo,n'okufoola Abegesya baingi nibairayo omu Lusitula ne Ikonio ne Antiyokiya. ²² Nka banyweeza ememme ez'Abagesya nka bababuulira okunyikiririranga mu ku kwikiriza era te olw'okubona enaku ezingi ziti;kitugwaniire okwingira omu omubukama bwa Kanca. ²³ Nibamaare okulondera abakaire omu buli iramyo,n'okuramya n'okusiiba; nebabasigira Omukama waiswe gwe baikirize. ²⁴ Nibakola omu Pisidiya nibayika Panfuliya. ²⁵ Nibamaare okubuulira ekigambo omu Peruga nibasererengeta omu Ataliya. ²⁶ Nibazwaayo,niwanika amatanga okwika Antiyokiya abaayo nibabasigira ekisa kya Kanca olw'omulomo omukooto gwe bayikirirye. ²⁷ Bwe bayikire,nibakumbaanya iramyo nibabakobera byona Okanca bye yakooranga amwe nabo,era te yaigulirewo abamawanga olwii olw'okwikriza. ²⁸ Nibamalaayo ebiro bingi amwe n'abegesya.