¹ “Eyiri malayika we kanisa mu Efweeso wandiika oti: Chino nje emboosi ch’oyo odiiye eηηiniηini musaanfu mu mukhono kwaye omulungi khandi nga akendera mu bisiindi musaanfu eby’efweesa: ² Manyire ebikholwa byenywe, emirimo chenywe echa’maani nende okhwesimiirisa khwenywe. Manyire nti si munyala okhugumira abaatu ababi khandi mukhemire abo aberaanga okhuba abatume naye nga sinje lubali, khandi nga mu baweene nga’babacha. ³ Mwesimiirisa khandi mwagumira ebidinyu khu lwe’riita lyange, nga simuweeyemo amaani. ⁴ Naye sino nsibatakho: mulekhire okhudakha khwenywe okhwamberi. ⁵ Mwichulise owuleeyi yi mwatula kho mwakwa! Mweyolobye manu mukhole ebiitu bimwakhola mu khuchaaka. Nimuteyolobya, ndiicha yimuli namalayo ebisiindi by’etaara lyenywe okhutula mu sifwo syaalyo. ⁶ Naye muli nasino khu lw’owulayi wenywe: simudakha ebikholwa bya Nikolayiti, seesi bintadakha. ⁷ Oli nende okhutwi, awulire omwooyo syawoolera amakanisa. Eyiri oyo owangula, ndimuwa owunyala okhulya khu musaala okwo’wulamu, okuli mu ndalo ya Weere. Eyiri Ekanisa Mu Sumuna. ⁸ “Eyiri malayika ow’ekanisa mu Sumuna andiika ati: chino nje emboosi ch’oyo Owamberi khandi Osembayo, owafwa khandi kakowola mu wulamu. ⁹ Manyire owudinyu wenywe nende owuwati wenywe__ ate nga muli bayiinda! Manyire owubacha wabo abawoola mbo ba Yudaaya ne sinje lubali, naye nga luwusano lwa Sitaani. ¹⁰ Mutatya olwebyo ebicha okhubasandiya. Mbawoolera, omusuku acha okhuta balala khwinywe mwijeera okhubakhema, khandi mucha okhuwona esaando y’endaalo ekhumi. Mube abamasima, ata okhwoola khumbera ey’okhufwa, khandi ndibawa engule ey’owulamu. ¹¹ Oyo oli nende okhutwi, awulire omwoyo syawolera amakanisa. Oyo owangula syaliwumiya ata nende okhufwa okhw’okhubiri. Eyiri Ekanisa Mu Perugamo ¹² “Eyiri malayika owekanisa mu Perugamo andiika ati: chino nje emboosi ch’oyo oli nende okukhande kwooki ewuleka ne’wuleka. ¹³ Manyire y’omenya__ yi Sitaani ali nesisaala sy’owenengo waye. Ate nga osikala owamasima khu lita lyange. Siwekaana enfukiirira yawo mwiise, ata nende mu ndaalo cha Antipa, omujulisi wange omwesikwa, yibetera mu siko syawo__ yi sitaani kamenya. ¹⁴ Ne lusyakhaba siityo, ndi ne biitu bitono binkhwekanyisakho: oli nende abaatu eyo abeddiira khu nsomesa ya Bbalamu, owasomesa Bbalaki okhwingisa aba Yisirayiri mu sibi nga balya eby’okhulya bibaweresanga emisambwa khandi nende okhukholanga owudaamba. ¹⁵ Mu mbya nasirala ewe weesi oli nende abo abediira khu khusomesa khwa Nikolayiti. ¹⁶ Nolwesyo weyolobye! Nisitaba siityo, nja okhwicha wangu yuli khandi ndibalwanisa nende okukhande okwo’mukhanwa wange. ¹⁷ Oyo oli nende okhutwi, akhoya awulire omwoyo syawoola eyiri amakanisa. Eyiri oyo owangula, ndimuwa khu mannu eyakisiwa. Khandi ndimuwa ekina erafu eriri nende eriita eyaakha niriwandiikirwekho, nga limanyirwe nende oyo yeŋŋene olifuna. Eyiri Ekanisa Mu Suwatira ¹⁸ “Eyiri malayika owekanisa mu Suwatira andiika ati: chino nje emboosi ech’omwana wa Weere, owe’moni echememula ng’omuliro khandi owamakulu akali nga omugasa okuli mu kuliro kungi. ¹⁹ Manyire ebikholwa byawo, okhudakha khwawo nende enfukiirira, owuweresa wawo nende okhwesimiirisa, khandi nga wunanu okhola okhukhirakho nga niwakhola olwataangira. ²⁰ Asyakhaba siityo, ndi okhukhwekanyisakho mu sino: Ogumira omukhasi ola Yeseberi, oweranga okhuba nabbi omukhasi. No’khusomesa khwaye akodiya abakhosi bange nabayira mu wudaamba nende mu khulya ebyo’khulya bibaweresa emisambwa. ²¹ Muweeye ebikha keyolobye owubi waye, naye syakanya. ²² Manu nja okhumukhubba khu sitanda esy’okhusanda, khandi nja okhukhola abo abakhola owudaamba ni naye basande lukali weene, okhutusakho nga beyolobya khu makira kaye. ²³ Ndikhubba abaana baye bafwa. Manu amakanisa kosi koosi kalimanya kaati niise oyo okonya emyoyo nende ebibaaso, khandi ndisasula nawuli syamulala khwinywe okhwema khu bikholwa byenywe nga lubiri. ²⁴ Wunanu mbolera enywe abasikaaye mu Suwatira, eyiri enywe abatediira khu nsomesa yaye khandi nga mutamanya Sitaani byalanga ati byaama byaye ebyo’mukati (sinja khubatakho enywe owusito wundi): ²⁵ Mwediire wusa khu bimulinabyo okhwoosa lu nakheche. ²⁶ Eyiri oyo owangula khandi kakhola bindakha okhwoola khunjakamo, ndimuwa owunyala khubyalo byoosi_ ²⁷ ‘Alibafuka nende endawukhi eyesichuuma; alibasukuna nga ebikoloonjo eby’entamu’__ wusa nga ninfunire owunyala okhutula eyiri Bbaabbaa. ²⁸ Khandi ndimuwa eηηiniηηini ey’echuli. ²⁹ Oyo oli nende okhutwi, akhoyire awulire Omwooyo syawoola eyiri amakanisa.