¹ . Awene awo Aguripa kawoola Paulo ati, “Ofukirirwa okhulomaloma ewe omwene.” sakira Paulo kakhosesa omukhono kwaye nachaka okhwewosakho: ² . “Omwene’ngo Aguripa, nsimbaasa samwene okhuba ne’nkhabi eyokhwema mumoni chawo olwaleero nga lunewosakho khubitu aba’Yudaaya bibateyekho, ³ no’khukhiririsa ewe oli no’wumanyirifu wenkhola nemidunga chaba Yudaaya. Nolwesyo, mbasaba muntekerese nokhwesimirisa. ⁴ “Abayudaaya boosi bamanyire nga lunamenya okhutula mu wuwere wange, okhutula njaka owulamu wange mu syaalo syange, nende ata mu Yerusalemu. ⁵ . Babeeye nibamanyire olwembaka ngali sino banyala no’khuwa owujjulisi, nisiba mbo bafukirira, baati okhwema okhutulira erala khu womu nende khusaga lyeddini yikhufukiriramo. Namenya ng’Omufalisaayo. ⁶ Nende wunanu siri mbo khulwokhuba ndi nesuubi mu Weere bikalaka ba Bbaaba syaba nti ndi mukhukesewakho olwaleero. ⁷ . Khuno nje okhulakiwa khwebiikha ekhumi na’bibiri bikhulimo esuubi lyo’khuwona niryolerera nga lubadidikhana nibayeresa Weere esideete nesiro. Oo omwene’ngo, siri sityo khulwokhuba olwe’suubi lino nisyo esyemakho aba’Yudaaya bibanterakho omusango. ⁸ . Lwasi khwinywe musiyiira musibaso muuti sisinyalikha Weere okhusyukhisa abaafu? ⁹ . “Seesi samwene necha nasimanya nti nkhoyire nkhole esinyalikha syoosi okhuyinganiya eritta lya Yesu owe Nasalesi. ¹⁰ . Nende nje lusyali sinakhola e Yerusalemu. Ne muwunyala wa ba Hawona bakhulutu nata abolerefu bangi mujjera, ata nende okhwitiwa. Nakhubbirangakho akhalulu nga simbakwira. ¹¹ . Makhabi mangi kanakendanga okhutula mu sinagogi ndala okhucha muyiindi ningenderera babasandye, no’khukesakho okhubayinga no’khufwotokheresa erita lya Weere. Mukhuwemukha khwange yibali, samwene nachanga nende mu biko bya bateende okhubasandya. ¹² “Mu ndala khu ηηendo chinali ninja e Damasiko no’wunyala nokhutumiwa khwa ba Hawona bakhulutu. ¹³ . Mu bikha nga sawa mukaga chesideete, Oo Omwene’ngo, nga lunali nindi khungira, nawona owulafu okhutula mukulu, ngawukhira oweryuba, nga wadukha okhunewodokhaniya nende abo bakhwali nabo. ¹⁴ . Fesi feesi khwakwa asi khuloba, nawulira ekono nirimboola mu luliimi lwe Bbulaniya liiti, ‘Saulo, Saulo, lwasiina wunsandya? Sidinyu ewe okhutacha khu mayingo.” ¹⁵ . Awo namala nateeba nti, ‘Niwe nanu, Omwami?’ Omwami kakowoolamo ati, “’Nise Yesu, yoli okhusandya.’ ¹⁶ . Wunanu singira omale weme tiiri. Nkhuwonekheye okhudola obe ngo’mukhosi khandi omujulisi webyo byowene nebyo binja okhukhwekesa. ¹⁷ . Nicha okhukhuwoniya eyiri abatu bawo bene nende eyiri abateende. Ndi okhukhutuma yibali ¹⁸ okhubekula emoni chawe obakalukhaniye obatuse musirema abate muwulafu, nokhutula mu maani ka setani bakowolere Weere, khu sinyalikhe bo bafune okhulekherwamo okhwe’bibi no’khufuna esifwo mwabo abalabisiwa nenfukiirira mwise.’ ¹⁹ “Nolwesyo wunanu, omwene’ngo Aguripa, sinali ojemera okhwekesewa khutula mwikulu. ²⁰ . Esisokha eyiri abe Damasiko, nende eyiri abe Yerusalemu na bewuYudaaya boosi na’bateende bosi, nawuulira nti bakhoyire beyolobye bakalukhanire Weere bakhakhase okhweyolobya khwawe okhubitira mubikholwa byawe. ²¹ . Nje esyakira aba Yudaaya bandiira mulwanyi lwe’nyumba ya Weere nga bakesakho okhunjitta. ²² Ne mbeye no’wuyeedi wa Weere okhwoola khu lwa leero, manu neema ano ninjulira eyiri abatono nabakhongo nasirala. Awuma simeedakho okhutuuma banabbi nende Musa bikawoola ati biribaawo__ ²³ ati Kristo alisaanda nende, ngo owamberi okhusingisiwa mu baffu, kakhanjuluse owulafu eyiri abatu baye beene nende eyiri abateende.” ²⁴ Nikolire awo Festo kamulya esirimi mu khulomaloma khwa Paulo nikewosakho. “Okotire mu bibaso byawo, Paulo!” Kakhamukha nekono khongo ati, “Okhusoma khwawo khungi khuli okhukhuyira obe ngo’kwakho eralu mumutwe kwawo.” ²⁵ . Paulo kamukowolamo ati, “Sindi mukwi wamalalu, Oo, omwolerefu Festo,” “Simbeye nimboola situfu khandi syawene. ²⁶ . Omwene’ngo amanyire ebitu bino, manu nyala okhulomaloma nindi mulekhule yooli. Nichusiwa nti awumawo esimutumire ata sirala, khulwokhuba awuma esikholirwe mu ngodi kodi. ²⁷ “Omwene’ngo Aguripa ofukiririra mu ba nabbi? Manyire nti osikhola.” ²⁸ . Olwo Aguripa kawoola Paulo ati, “Obaasa oti musikha sitono esyo onyala onkhunfukirisa naba omukurisitayo?” ²⁹ . Paulo kamukowolamo ati, “Embaka tono oba ndeeyi__ Nsaba Weere okhutaba si ewe weηηene nende boosi abantekeresise olwa’leero banyale okhuba sindi, okhumalakho olwenjegere chino.” ³⁰ Omwene’ngo kasingira, alala nende Gafana Berinike nabali bekhaye nabo. ³¹ . Nibatula musisenge, bali balomaloma mulala syamulala nibamonyesaniya, ni’bawoolana baati, “Omusacha ono syali khukhola esinyala syamwosa khu khwitiwa oba okhuwoyewa.” ³² . Aguripa kawoola Festo ati, “Omusaacha ono aba kalekhuliwa khale nisiba mbo sikajjulira ewa Kayisali.”