OKhuwosesewa Mu Moni Cha Fesito ¹ . Endaalo chidatu Fesito nikolire mu syaalo sino, Fesito kanina emukulu natula Kayisareya nacha e Yerusalemu, ² eyatula omukhulutu wa bakhawona nabatangirisi lubecha mumoni cha Fesito batawo emboosi echokhuwabira Paulo. ³ . Mukhubirikisya muwangu basaba Fesito, mukhudakha abakwire, Paulo akalukhanisiwe ayiriwe e Yerusalemu, khulwokhuba bali batekekha okhumwerinda khungira bamwitte. ⁴ Fesito kabakowolamu ati, “Paulo kawoyeerwa e Kayisareya, ne khandi samwene ndi okhuchayo mundaalo cha ambi. ⁵ . Mulekhe balala khubatangirisi benywe beche khuchane bomiise bibafambya omusaacha oyo naba nende syakholire esibi.” ⁶ Namalire endaalo munana oba ekhumi nabo, kamala kawawo kekhirira e Kayisareya, khandi oludaalo lulondakho kekhasa olukhikho kalagira balete Paulo mumoni chaye. ⁷ . Nibaletire Paulo, Abayudaaya abali nibatulire e Yerusalemu bamwewodokhaniya, bamuyingakho emisango chibatanyala okhukhakhasa. ⁸ . Awenawo Paulo kewosakho ati: “Awumawo sinkholire esibi esiddira khumalako ka baYudaaya oba akomu nyumba ya Weere oba eyiri Kayisali.” ⁹ Ne Fesito, olwokhudakha akwire Abayudaaya, kawolera Paulo ati, “Ofukirira okhucha e Yerusalemu owosesewe mumoni change eyo khu bibakhuwabira binno?” ¹⁰ . Ne Paulo kakowolamo ati: “Wunanu wuno ndi mumoni cha Kayisali, yinkhoyire khengerwe. Awuma syosi syoosi sinsobisye khu Bayudaaya, nga lusimanyire wulayi wamwene. ¹¹ Nisiba siiti aliwo sinsobisye esikhoyerwa nhengerwe okhufwa, singana khufwa. Naye nisiba siti aliiwo emisango chinteywekho na baYudaaya bano nichiba nichitalimo, awuma oli no’wunyala okhumbayo yibali. Njulira eyiri Kayisali!” ¹² . Fesito namalire okhufukirisaniya no’lukhikho lwaye, kakhengawo ati, “Omalire wajjulira Kayisali. Wunanu onache eyiri Kayisali!” Fesito Keteeba Khu Mwene’ngo Aguripa. ¹³ Endaalo ntono nichibitirewo omwene’ngo Aguripa nende Bberinike bola e Kayisareya okhuyeresa Fesito oluyaali. ¹⁴ . Nga lubali nibacha okhumalayo endaalo nyingi, Fesito kalomaloma khu mbosi cha Paulo no’mwene’ngo. Kawoola ati: “Aliwo amusaacha ano Felikisi yikalekha ngo’muwowe.” ¹⁵ . Ninacha e Yerusalemu, bakhawona bakhulutu nabakhulutu ba Bayudaya bamutakho emisango khandi basaba akhengerwe. ¹⁶ . “Nabawoolera ati sisiri mu nsambo cha ba Rooma okhuwaayo omutu nateema mumoni cha’bamuwabira ne khandi bamuwa enkhabi okhwewosakho omwene okhwema hu bibamuwabiye. ¹⁷ Nibecha ano nange, sinakhindya musango, nekhasa olukhikho oludaalo lulondakho, nalagira baleta omusaacha, mu lukhikho. ¹⁸ . Naba muwabira nibasingira okhulomaloma, sibamutakho emisango chinali nimbasirisa. ¹⁹ . Okhumalakho, balikho notuwosi wosi tubamufambya otukudaniya nga tudira khu ddini yawe nende khu musaacha wafwa yibalanga Yesu oyo Paulo yikali nalomalomakho ati mulamu. ²⁰ . Sinamanya ngeri yokhutebereseramo emboosi echo; namuteeba nanyala okhufukirira okhucha e Yerusalemu nje yaba awoseserwe emisango chino. ²¹ Ne Paulo nikajulira okhuwosesewa khube muwunyala wukhirawo, nalagira bakhole nibamwikalira okhwola lunakhanyalire okhumuyira eyiri Kayisali.” ²² . Awo Aguripa kawolera Fesito ati, “Ndakha okhumwewulirirakho omwene khu byo’musaacha ono.” Kamukowolamo ati, “Muchuli onamuwulire.” Paulo mumoni cha Aguripa. ²³ Oludaalo lwalondakho Aguripa nende Bberiniike becha no’luyaali lukali manu bengira abatekereesi mubekhala nabatangirisi be siko sikhulutu. Okhwema khu silagiro sya Festo, Paulo kaletewa mubali. ²⁴ . Festo kawoola ati, “Omwene’ngo Aguripa, nende abali muno nafwe, muwona omusaacha ano! Abatu boosi abekhala e Wuyudaaya bawabiye omusaacha ono yindi mu Yerusalemu nende ano mu Silisiya, ni bakhubba olukhero baati syakhoyire khuba mulamu ata. ²⁵ Nakaana nti awumakho nesisobyo syosi syoosi esikira abe nga keteewa, ne khulwokhuba ajjuliye eyiri omutuki mukhulutu nakhengawo okhumusindikha e Rooma. ²⁶ . Ne mbuma esilungifu syoosi sinyala okhumuwandikakho. Nolwesyo muletire mweesi yimuli, okhukhirira elala eyiri ewe owo’luyaali Omwene’ngo Aguripa, nisinyalikha nikhumalire okhumuteberesakho khunyale okhumuwandikakho. ²⁷ . Khuba ese mbaasa si’siba syamakesi okhumuta muwikalire nintakaana omusango kwo’khumutakho.”