¹ Petero, omutume wa Yesu Kurisito. Eyiri omwangale wa Weere, abateende abasalanisiwa mu bitundu woosi musyalo sya Pontiya, Galasiya, Pantakiya, Asiya nende Abisiniya, ² abo abangaliwa nga bema khu khumanya khwa Weere seefwe, okhubitira mu khwosewa khwo’mwoyo mwolerefu, okhuba mulonga eyiri Yesu Kurisito khandi owawanyiwakho na mabanga kaye: Esisa ne’mirembe bibe byenywe mu wungi. Enfuma eyiri Weere olwe’nsuubi elamu ³ Enfuma yibe eyiri Weere khandi Bbaabba w’Omwami wefwe Yesu Kurisito! Mu sisa syaye sy’amaani singi syatuweye okhwiwulwa okhuyaakha mu suubi lamu okhubitira mu khusyukhira khwa Yesu Kurisito okhutula mu bafu, ⁴ no’khwingira mu wusikhirano wutanyala khusikhirisiwa, okhwononokha oba okhujujukha__ ensikhirano yabikhiwa mukulu khu lwenywe, ⁵ abo okhubita mu nfukirira bakhingakirwa amaani ka Weere okhwola okhwicha khwokhuwonesewa okhwedusiise okhukisuliwa mu bikha byakamayo. ⁶ Mu bino byoosi mwekhoye lukali, nende sibe siiti wunanu khu lwebikha bitono munyala okhuba ni mwasaanda mu ngira nyingi. ⁷ Bino bichire biityo kho olwenfukirira yenywe__ eyikhira esaabbu omuwendo, eyiwawo ata ayakhateresewa niyibitire mu muliro__ mu syakamo wasyo nfuma, no’luyaali olwa Yesu Kurisito nakisuywe. ⁸ Nende mube mbo mutamuwona, mu mudakha; khandi asyakhaba mbo simumuwona wunanu, mu mufukiriramo khandi mwechusiwa oluyaali olutalomalomekha nende esangaalo ebitirifu, ⁹ khulwokhuba enywe muli okhufuna enfukirira yenywe, okhuwonesewa khwe’myoyo chenywe. ¹⁰ Ebidiira khu khuwonesewa khuno, ba nabbi, abalomaloma khu sisa esyali syo’khwicha yimuli, bakonyeresa mu makesi no’khwegenderesa khukali, ¹¹ nga bakesakho okhukonyeresa ebikha nembera omwoyo wa Kurisito mubo yichali chiseseramo nikali nga alakula okhusandisiwa khwa Kurisito no’luyaali olwali lucha okhulondakho. ¹² Syawikhulirwa yibali siiti sibali nga beyeresa abeene naye enywe, nibali balomaloma khu biitu bino wunanu ebibawoleywe nabo ababawuulira enjiri okhubitira mu mwoyo mulafu owatumiwa okhutula mukulu. Nende ba malayika bekomba okhwewunja mu biitu bino. Mube Bolerefu. ¹³ Nolwesyo, mutekekhe ebibaso byenywe bibe munkhola; khandi mwerinde abeene; mute enfukirira yenywe muwichufu khu sisa sicha okhubayeresewa Yesu Kurisito lwali kisuliwirwakho. ¹⁴ Nga abaana bawulise, mutachira khu wekombi we’sibi wumwali nawo nimusiiri mu wutamanya. ¹⁵ Nga oyo owabalanga ni mwolerefu mweesi mube abolerefu mu byoosi bimukhola; ¹⁶ khuba syawandiikiwa siiti: “Ba mwolerefu, khulwokhuba ndi mwolerefu.” ¹⁷ Okhutula mulaanga Bbaabba oyo olamula wuli mulimo kwo’mutu atali okhwekhubbira, mumenye muwulamu wenywe ng’abateende ano mukhutya khwo’lerefu. ¹⁸ Khubo ewe omanyire oti sibiri khu lwe’biitu biwaawo nga enusu oba esaabbu nti nje khu wawonesewa mu ngira chiwumamo echo’wulamu chimwaweresewa okhutula khu bewusi benywe, ¹⁹ naye lwa mabaanga ko’wukusi wamukulu aka Kurisito, akhakoondi khawumakho ekoondo. ²⁰ Kangaliwa esyalo nisitalongewa, ne kakisuliwa mu ndaalo che’bikha bino khu lwenywe. ²¹ Okhubita mu yee mufukirira mu Weere, owa musyukhisa okhutula mu bafu khandi kafumisiwa, manu sakira enfukirira yenywe ne’suubi biri mu Weere. ²² Nga siri nti wunanu mwelabya mwabene nga mu bita mu khufukiirira amasima khu munyale okhuba no’khudakhana khwokhwesikana eyiri mulala khu wundi, mudakhane abene nabeene mu khwoloberera, okhutula mu mwoyo. ²³ Khuba mwiwuywe khandi ekhabi lindi, si khulumwo lufwa, naye olutafwa, okhubitira mu mboosi namu khandi eyesimirisa eya Weere. ²⁴ Khuba, “Abaatu boosi bali nge’nyaasi, khandi oluyaali lwawe lwoosi luli nge’bimuli ebyo’mundalo; enyaasi lwe’wota ne’bimuli bikwa, ²⁵ naye emboosi ey’Omwami yibawo endaalo choosi.” Ne khandi emboosi yino nje yibabawuulira.