¹ Omugugu gwa Nineeve. Ekitabo eky'okwolesebwa kwa Nakumu, Omwerukoosi. ² Mukama niiye Katonda w'eiyali, era awalana eigwanga; Mukama awalana eigwanga, era ow'obusungu obungi; Mukama awalana eigwanga abamukyawa, era agisira abalabe be obusungu. ³ Mukama tatera kusunguwala, alina amaani mangi, so talitaatira n'akatono. Engira lya Mukama ebiita mu kikuŋunta no mu kibuyaga, era ebireri niingyo enfuufu gy'ebigere bye. ⁴ Akangavula enyanza n'agikalya; era akalya emiiga gyonagyona; Basani ebabukire no Kalumeeri, era ekimuli eky'oku Lebanooni kibabukire. ⁵ Ensozi gikankana gyabbaire, busozi ne busaanuuka; era eitakali ne liimuka mu maiso ge; niiwo awo, ensi gyonagyona ne bonabona abagibbamu. ⁶ Mu maiso g'obusungu bwe yani asobola okwemerera? yani asobola okubbawo obusungu bwe nga bunyiikiire? obulalu bwe bufukibwa ng'omusyo, n'enjazi zimenyebwamenyebwa niiye. ⁷ Mukama musa, kigo ku lunaku olw'okuboneramu enaku; era amaite abo abamwesiga. ⁸ Naye no mukoka akulukuta alimalirawo dala ekifo kyakyo, era abalabe be alibasengererya mu kizikiza. ⁹ Kye muteesya ku Mukama kiki? alimalirawo dala; obunaku tebuliyimuka omulundi ogw'okubiri. ¹⁰ Kubanga waire nga bali ng'amawa agakwatagaine, era nga batobere okwekankana mu kunywa kwabwe, balyokerwa dala ng'ensambu enkalu. ¹¹ Mu iwe mwire omumu alowooza akabi ku Mukama, ateesa ebibbiibi. ¹² Ati bw'atumula Mukama nti waire nga balina amaani amakakafu era bangi, era balizikirira, naye alivaawo. waire nga nakubonekerye enaku, tinakubonekyenga naku. ¹³ Era atyanu naamenya ekikoligo kye kive ku iwe, era naakutulakutula ebikusiba. ¹⁴ No Mukama alagiire ku iwe baleke okweyongera okusiga ku liina lyo; ndizikirirya ekifaananyi ekyole n'ekifaananyi ekisaanuuse bive mu nyumba ya bakatonda bo; ndisima entaana yo; kubanga oli mugwagwa. ¹⁵ Bona, ku nsozi ebigere by'oyo abuulirira ebigambo ebisa, alangira emirembe! Weekuuma embaga gyo, iwe Yuda, tuukirirya obweyamu bwo; kubanga omubbiibi takaali abitanga wakati wo; azikirira dala.