¹ N'abakoba nti Mazima mbakoba nti Ku bano abemereire wano waliwo abamu abatalirega ku kufa n'akatono; okutuusia lwe balibona obwakabaka bwa Katonda nga bwiza n'amaani. ² Awo enaku omukaaga bwe gyabitirewo Yesu n'atwala Peetero no Yakobo no Yokaana, n'ayaba nabo ku lusozi oluwanvu bokka mu kyama: n'akyuusibwa mu maiso gaabwe. ³ Engoye gye ne gyakaayakana ne gitukula inu; so nga wabula mwozi ku nsi ayinza okugitukulya atyo. ⁴ Awo Eriya no Musa ne baboneka; era babbaire batumula no Yesu. ⁵ Peetero n'airamu, n'akoba Yesu nti Labbi, niikyo ekisa ife okubba wano; kale tusiisire ensiisira isatu; eimu yiyo, n'eimu ya Musa, n'eimu ya Eriya. ⁶ Kubanga yabbaire tamaite ky'eyairamu; kubanga babbaire batiire inu. ⁷ Awo ekireri ne kiza ne kibasiikirizia; eidoboozi ne lifuluma mu kireri nti Ono niiye Mwana wange omutakibwa: mumuwulire. ⁸ Bwe baakebukire amangu ago, ne batabona muntu ate wabula Yesu yenka nabo. ⁹ Awo bwe babbaire baika ku lusozi, n'abakuutira baleke okukoberaku omuntu bye baboine, okutuusia Omwana w'omuntu lw'alizuukira mu bafu. ¹⁰ Ne bakyekuuma ekigambo ekyo nga beebuuzaganya bonka nti Okuzuukira mu bafu kulibba kutya? ¹¹ Ne bamubuulya nga bakoba nti Abawandiiki batumula nti kigwana Eriya okusooka okwiza. ¹² N'abakoba nti Eriya y'asookere okwiza, n'alongoosa byonabyona: era kyawandiikiirwe kitya Omwana w'omuntu okubonyaabonyezebwa ebingi n'okunyoomebwa? ¹³ Naye mbakoba nti Eriya yamalire okwiza, era baamukolere buli kye batakire, nga bwe kyamuwandiikiirwe ¹⁴ Awo bwe baatuukire eri abayigirizwa be, ne babona ekibiina kinene nga kibeetooloire, n'abawandiiki nga babasokaasoka. ¹⁵ Amangu ago ekibiina kyonakyona bwe kyamuboine, ne beewuunya inu, ne bairuka gy'ali ne bamusugirya. ¹⁶ N'ababuulya nti Mubasokaasoka lwaki? ¹⁷ Omumu mu kibiina n'amwiramu nti Omwegeresya, nkuleeteire omwana wange, aliku dayimooni atatumula; ¹⁸ buli gy'amutwala, amukubba ebigwo; abimba eiyovu, aluma amainu, akonvuba: nkobere abayigirizwa bo bamubbinge; ne batasobola. ¹⁹ N'abairamu, n'akoba nti Imwe ab'emirembe egitaikirirya, ndituusa waaina okubba naimwe? ndituusa waina okubagumiinkiriza? mumundeetere. ²⁰ Ne bamuleeta gy'ali: awo bwe yamuboine, amangu ago dayimooni n'amutaagulataagula inu; n'agwa wansi, ne yeekulungula, ng'abbimba eiyovu. ²¹ N'abuula itaaye nti Obulwaire buno kasookedde bumukwata ibbanga ki? N'akoba nti Bwo mu butobuto. ²² Emirundi mingi ng'amusuula mu musyo ne mu maizi okumwita: naye oba ng'oyinza, tusaasire, otubbeere ²³ Yesu n'amukoba nti Oba ng'osobola! byonabyona bisoboka eri aikirirya. ²⁴ Amangu ago itaaye w'omwana n'atumulira waigulu, n'akoba nti Ngikirirya: saasira obutaikirirya bwange. ²⁵ Awo Yesu bwe yaboine ng'ekibiina kikuŋaana mbiro, n'aboggolera dayimooni, n'amugamba nti Iwe dayimooni atatumula, era omwigavu w'amatu, nze nkulagira, muveeku, tomwiriranga ate n'akatono. ²⁶ Awo n'akunga, n'amutaagula inu, n'amuvaaku; n'afaanana ng'afiire; n'okukoba abandi bangi ne bakoba nti Afiire. ²⁷ Naye Yesu n'amukwata ku mukono, n'amuyimusia; n'ayemerera. ²⁸ Awo bwe yayingiire mu nyumba, abayigirizwa be ne bamubuulya mu kyama nti Ife tetwasoboire kumubbinga. ²⁹ N'abakoba nti Engeri eno tekisoboka kuvaaku lw'e kigambo wabula olw'okusaba. ³⁰ Ne bavaayo, ne babita mu Galiraaya, n'atataka muntu yenayena kutegeera. ³¹ Kubanga yayegereserye abayigirizwa be n'abakoba nti Omwana w'omuntu aweebwayo mu mikono gy'abantu, balimwita; kale bw'alimala okwitibwa, era walibita enaku isatu n'azuukira. ³² Naye tebaategeire kigambo ekyo, ne batya okumubuulya. ³³ Ne batuuka e Kaperunawumu: awo bwe yabbaire ng'ali mu nyumba n'ababuuza nti Mubabbaire muwakana ki mu ngira? ³⁴ Naye ne basirika: kubanga babbaire bawakana bonka na bonka mu ngira nti yani omukulu. ³⁵ N'atyama, n'ayeta eikumi n'ababiri, n'abakoba nti Omuntu bw'ataka okubba ow'oluberyeberye, yaabbanga ku nkomerero ya bonabona, era muweereza wa bonabona. ³⁶ N'akwata omwana omutomuto, n'amwemererya wakati mu ibo: awo n'amuwambaatira n'abakoba nti ³⁷ Buli eyaikiriryanga omumu ku baana abatobato abaliŋanga ono, mu liina lyange, ng'aikirirye nze: na buli muntu yenayena anjikirirya nze, taikirirya nze, wabula odi eyantumire. ³⁸ Awo Yokaana n'amukoba nti Omuyigiriza, twaboine omuntu ng'abbinga dayimooni mu liina lyo; ne tumugaana, kubanga teyabitire naife. ³⁹ Naye Yesu n'akoba nti Temumugaananga: kubanga wabula muntu ayakolanga eky'amagero mu liina lyange ate amangu ago n'anvuma. ⁴⁰ Kubanga atali mulabe waisu ng'ali ku lwaisu. ⁴¹ Kubanga buli muntu eyabanywisyanga imwe ekikompe ky'amaizi kubanga muli ba Kristo, mazima mbakoba nti talibulwa mpeera ye n'akatono. ⁴² Na buli muntu eyesitalyanga omumu ku abo abatobato abanjikirirya, waakiri oyo okusibibwa olubengo olunene mu ikoti lye asuulibwe mu nyanza. ⁴³ Omukono gwo bwe gukwesitazianga, ogutemangaku; waakiri iwe okuyingira mu bulamu, ng'obulaku ekitundu, okusinga okwaba mu Geyeena ng'olina emikono gyombiri, mu musyo ogutalikira; ⁴⁴ eigino lyayo gye ritafiira so n'omusyo tegulikira. ⁴⁵ N'okugulu kwo bwe kukwesitalyanga, okutemangaku: waakiri iwe okuyingira mu bulamu ng'obulaku okugulu, okusinga okusuulibwa mu Geyeena, ng'olina amagulu gombiri; ⁴⁶ eigino lyayo gyeri tefiira so n'omusyo tegulikira. ⁴⁷ N'eriiso lyo bwe likwesitalyanga, olitoolangamu; waakiri iwe okuyingira mu bwakabaka bwa Katonda ng'oli mu tulu, okusinga okusuulibwa mu Geyeena, ng'olina amaiso gombiri; ⁴⁸ eigino lyayo gyeri tefiira, so n'omusyo tegulikira. ⁴⁹ Kubanga buli muntu alirungibwamu omusyo. ⁵⁰ Omunyu mulungi: naye omunyu bwe guwaamu ensa muliiryaamu ki? Imwe mubbe n'omunyu mukati mu imwe, mutabagane mwenka na mwenka.