¹ Awo n'agolokoka n'avaayo, n'aiza mu bitundu eby'e Buyudaaya n'emitala wa Yoludaani: ebibiina bingi ne bikuŋaanira w'ali ate; nga bwe yebityanga n'abegeresya ate. ² Awo Abafalisaayo ne baiza gy'ali, ne bamubuulya nti Kisa omuntu okubbinga mukali we? nga bamukema. ³ Naye n'airamu n'abakoba nti Musa yabalagiire atya? ⁴ Ne bakoba nti Musa yaikirirye okuwandiikanga ebbaluwa ey'okubbinga; kaisi abbingibwenga. ⁵ Naye Yesu n'abakoba nti Olw'obukakanyavu bw'emyoyo g'yanyu kyeyaviire abawandiikira eiteeka lino. ⁶ Naye okuva ku luberyeberye lw'okutonda, yabatondere omusaiza n'omukazi. ⁷ Omuntu kyayavanga aleka itaaye no maye ne yeegaita no mukali we; ⁸ boona bombiri baabanga omubiri gumu: kale nga tebakaali babiri ate, wabula omubiri gumu. ⁹ Kale Katonda kye yagaitire awamu, omuntu takyawukanyanga. ¹⁰ Awo ate mu nyumba abayigirizwa ne bamubuulya ekigambo ekyo. ¹¹ N'abakoba nti Buli muntu yenayena eyabbinganga mukali we, n'akwa ogondi, ng'ayendere okumusobya; ¹² yeena mwene bweyanobanga ewa ibaaye, n'afumbirwa ogondi, ng'ayendere. ¹³ Awo ne bamuleetera abaana abatobato, okubakwataku: abayigirizwa be ne bajunga abaabaleetere. ¹⁴ Naye Yesu bwe yaboine n'asunguwala, n'abakoba nti Mwikirirye abaana abatobato baize gye ndi; so temubagaana; kubanga abafaanana nga bano obwakabaka bwa Katonda niibwo bwabwe: ¹⁵ Mazima mbakoba nti Buli ataikiriryenga bwakabaka bwa Katonda ng'omwana omutomuto, talibuyingiramu n'akatono. ¹⁶ N'abawambaatira, n'abawa omukisa, ng'abateekaku emikono. ¹⁷ Bwe yabbaire ng'ayaba mu ngira, omu n'aiza gy'ali ng'airuka, n'amufukaamirira, n'amubuulya nti Omuyigiriza omusa, naakola ntya okusikira obulamu obutawawo? Yesu n'amukoba nti Onjetera ki omusa? wabula musa wabula omumu, niiye Katonda. ¹⁸ Yesu n'amukoba nti Onjetera ki omusa? wabula musa wabula omumu, niiye Katonda. ¹⁹ Omaite amateeka, Toitanga, Toyendanga, Toibbanga, Towaayirizanga, Tolyazaamaanyanga, Oteekangamu ekitiibwa itaawo no mawo. ²⁰ N'amukoba nti Omuyigiriza, ebyo Byonabyona nabikwaite okuva mu butobuto bwange. ²¹ Yesu bwe yamulingiriire n'amutaka, n'amukoba nti Oweebuukireku ekigambo kimu: yaba otunde byonabyona by'oli nabyo, ogabire abaavu, weena olibba n'obugaiga mu igulu: oize onsengererye. ²² Naye n'atokooterera olw'ekigambo ekyo, n'ayaba ng'anakuwaire; kubanga yabbaire alina ebintu bingi. ²³ Awo Yesu ne yeetooloolya amaiso, n'akoba abayigirizwa be nti Nga kizibu abagaiga okuyingira mu bwakabaka bwa Katonda! ²⁴ Abayigirizwa ne beewuunya ebigambo bye. Naye Yesu n'airamu ate, n'abakoba nti Abaana, nga kizibu abo abeesiga obugaiga okuyingira mu bwakabaka bwa Katonda! ²⁵ Niikyo ekyangu eŋamiya okuyita mu nyindo y'empisio, okusinga omugaiga okuyingira mu bwakabaka bwa Katonda. ²⁶ Ne bawuniikirira inu, ne bamukoba nti Kale yani asobola okulokoka? ²⁷ Awo Yesu n'abalingirira n'akoba nti Mu bantu tekisoboka, naye tekiri kityo eri Katonda; kubanga byonabyona biyinzika eri Katonda. ²⁸ Awo Peetero n'atandika okumukoba nti Bona, ife twalekere byonabyona, ne tukusengererya. ²⁹ Yesu n'amukoba nti Mazima mbakoba nti Wabula eyalekere enyumba, oba ab'oluganda, oba bainyina, oba maye, oba itaaye, oba abaana, oba ebyalo, ku lwange n'olw'enjiri, ³⁰ ataliweebwa emirundi kikumi mu biseera bino ebya atyanu, enyumba, n'ab'oluganda, ne bainyina na bamawabwe, n'abaana, n'ebyalo, n'okuyigganyizibwa; no mu mirembe egyaba okwiza obulamu obutawaawo. ³¹ Naye bangi ab'oluberyeberye abalibba ab'oluvanyuma; n'ab'oluvanyuma abalibba ab'oluberyeberye. ³² Bwebabbaire mu ngira nga bambuka e Yerusaalemi; no Yesu yabbaire ng'abatangiire, ne beewuunya, na babbaire abasengererya ne batya: Awo ate n'atwala eikumi n'ababiri, n'atandika okubabuulira ebigambo ebyaba okumubbaaku, nti ³³ Bona, twambuka e Yerusaalemi; Omwana w'omuntu aliweebwayo eri bakabona abakulu n'abawandiiki; balimusalira omusango okumwita, balimuwaayo eri ab'amawanga: ³⁴ balimuduulira, balimufujira amatanta, balimukubba, balimwita; bwe walibitawo enaku eisatu alizuukira. ³⁵ Awo Yakobo no Yokaana, abaana ba Zebbedaayo, ne basembera w'ali, ne bamukoba nti Omuyigiriza, tutaka otukolere kyonakyona kye twakusaba. ³⁶ N'abakoba nti Mutaka mbakolere ki? ³⁷ Ne bamukoba nti Tuwe tutyame, omumu ku mukono gwo omuliiro, n'ogondi ku mukono gwo omugooda, mu kitiibwa kyo. ³⁸ Naye Yesu n'abakoba nti Temumaite kye musaba. Musobola okunywa ku kikompe kye nywaku nze? oba okubatizibwa n'okubatiza kwe mbatizibwamu nze? ³⁹ Ne bamukoba nti Tusobola. Yesu n'abakoba nti Ekikompe nze kye nywaku mulinywaku; n'okubatiza kwe mbatizibwamu nze mulibatizibwa; ⁴⁰ naye okutyama ku mukono gwange omuliiro oba ku mugooda, ti niinze nkugaba, naye kw'abo be kwategekeirwe. ⁴¹ Awo eikumi bwe bawuliire, ne batandika okusunguwalira Yakobo no Yokaana. ⁴² Yesu n'abeeta, n'abakoba nti Mumaite ng'abo abaalowoozebwa okufuga ab'amawanga babafugisya amaani; n'abakulu baabwe babatwala lwe mpaka. ⁴³ Naye mu imwe tekiri kityo: naye buli ataka okubba omukulu mu imwe yabbanga muweereza wanyu; ⁴⁴ na buli ataka okubba ow'olubereberye mu imwe yabbanga mwidu wa bonabona. ⁴⁵ Kubanga mazima Omwana w'omuntu teyaizire kuweerezebwa, wabula okuweereza, n'okuwaayo obulamu bwe okununula abangi. ⁴⁶ Awo ne batuuka e Yeriko: bwe yaviire mu Yeriko n'abayigirizwa be, n'ekibiina kinene, omwana wa Timaayo, Batiimaayo, omusabi omuduka w'amaiso, yabbaire atyaime ku mbali kwe ngira ⁴⁷ Awo bwe yawuliirwe nga Yesu Omunazaaleesi niiye oyo, n'atandika okutumulira waigulu n'okukoba nti Omwana wa Dawudi, Yesu, onsaasire. ⁴⁸ Bangi ne bamubogolera okusirika: naye ne yeeyongera inu okutumulira waigulu nti Omwana wa Dawudi, onsaasire: ⁴⁹ Awo Yesu n'ayemerera n'akoba nti Mumwete. Ne beeta omuzibe w'amaiso, ne bamukoba nti Guma omwoyo; golokoka, akweta. ⁵⁰ Yeena n'asuula olugoye lwe, n'asituka, n'aiza eri Yesu. ⁵¹ Yesu n'amwiramu, n'akoba nti Otaka nkukole ntya? Omuduka w'amaiso n'amukoba nti Labooni, ntaka nzibule n'azibula, n'amusengererya mu ngira. ⁵² Awo Yesu n'amukoba nti yaba; okwikirirya kwo kukuwonyerye. Amangu ago n'azibula, n'amusengererya mungira.