¹ Awo Yesu n'atwalibwa Omwoyo mu idungu okukemebwa Setaani. ² Bwe yamalire okusiiba enaku ana, emisana n'obwire, enjala n'emuluma. ³ Omukemi n'aiza n'amukoba nti Oba oli Mwana wa Katonda, koba amabbale gano gafuuke emere. ⁴ Yeena n'airamu n'akoba nti Kyawandiikibwe nti Omuntu tabbenga mulamu na mere yonka, wabula na buli kigambo ekiva mu munwa gwa Katonda. ⁵ Awo Setaani n'amutwala ku kibuga ekitukuvu n'amuteeka ku kitikiro kya yeekaalu, ⁶ n'amukoba nti Oba oli Mwana wa Katonda, buuka ogwe wansi: kubanga kyawandiikiibe nti Alikulagiririrya bamalayika be: Mu mikono gyabwe balikuwanirira, Oleke okwesitala ekigere kyo ku ibbaale. ⁷ Yesu n'amukoba nti Kyawandiikiibwe ate nti Tokemanga Mukama Katonda wo. ⁸ Ate Setaani n'amutwala ku lusozi oluwanvu einu, n'amulaga ensi gya bakabaka bonabona abali mu nsi, n'ekitiibwa kyagyo; ⁹ n'amukoba nti Ebyo byonabyona naabikuwa bwewavuunama okunsinza. ¹⁰ Awo Yesu n'amukoba nti Vaawo yaba, Setaani: kubanga Kyawandiikiibwe nti Osinzanga Mukama Katonda wo; era omuweerezanga yenka. ¹¹ Awo Setaani n'amuleka; bona, bamalayika ne baiza, ne bamuweereza. ¹² Awo bwe yawuliire nga Yokaana bamuwaireyo, n'airayo e Galiraaya; ¹³ ng'aviire e Nazaaleesi, n'aiza, n'abba e Kaperunawumu, ekiri ku nyanza, mu nsi ya Zebbulooni ne Nafutaali: ¹⁴ ekigambo kituukirire nabbi Isaaya kye yatumwire, ng'akoba nti ¹⁵ Ensi ya Zebbulooni n'ensi ya Nafutaali, Engira y'enyanja, emitala wa Yoludaani, e Galiraaya ey'amawanga. ¹⁶ Abantu ababbaire batyama mu ndikirirya, Babona omusana mungi, N'abo ababbaire batyama mu nsi y'okufa no mu kiwolyo kyakwo, Omusana gwabaikiire. ¹⁷ Yesu n'asookera awo okubuulira n'okukoba nti Mwenenye; kubanga okwakabaka obw'omu gulu kumpi okutuuka. ¹⁸ Bwe yabbaire ng'atambula ku itale ly'enyanza y'e Galiraaya, n'abona ab'oluganda babiri, Simooni gwe bayetere Peetero, no Andereya omugande, nga basuula obutiimba mu nyanza, kubanga babbaire bavubi. ¹⁹ N'abakoba nti Mwize, mubite nanze, nzeena ndibafuula abavubi b'abantu. ²⁰ Amangu ago ne baleka obutiimba, ne babita naye: ²¹ N'atambulaku mu maiso n'abona ab'oluganda babiri abandi, Yakobo omwana wa Zebedaayo, no Yokaana omugande, nga bali mu lyato wamu ni itawabwe Zebidaayo, nga baluka obutiimba bwabwe; n'abeeta. ²² Amangu ago ne baleka awo eryato no itawabwe, ne baaba naye. ²³ Yesu n'abuna Galiraaya yonayona, ng'abegeresya mu makuŋaaniro gaabwe, era ng'abuulira enjiri ey'obwakabaka, era ng'awonya endwaire gyonagyona n'obunafu bwonabwona mu bantu. ²⁴ Ebigambo bye ne bibuna Obusuuli bwonabwona: ne bamuleetera bonabona ababbaire balwaire, ababbaire bakwatiibwe endwaire egitali gimu, n’ebibonyoobonyo, n'ab'emizimu; n'ab'ensimbu, n'ababbaire bakoozimbire; n'abawonya. ²⁵ Ebibiina bingi, nga bava e Galiraaya n’e Dekapoli n'e Yerusaalemi n’e Buyudaaya n'emitala wa Yoludaani ne babita naye.