¹ Mu naku egyo, Yokaana Omubatiza n'aiza ng'abuulirira mu idungu ery'e Buyudaaya, ² ng'akoba nti Mwenenye; kubanga obwakabaka obw'omu igulu buli kumpi okutuuka. ³ Kubanga oyo nabbi Isaaya gwe yatumwireku, ng'akoba nti Edoboozi ly'oyo atumulira waigulu mu idungu nti Mulongoosie oluguudo lwa Mukama, Muluŋamye amangira ge. ⁴ Naye Yokaana oyo yavaalanga engoye egy'ebyoya by'eŋamira, nga yeesibire olukoba olw'eidiba mu nkende; n'emere ye yabbaire nzige no mubisi gw'enjoki egy'omu nsiko. ⁵ Awo ne bava e Yerusaalemi no mu Buyudaaya wonawona, n'ensi yonayona eriraine Yoludaani, ne baiza gy'ali; ⁶ n'ababatiza mu mwiga Yoludaani, nga baatula ebibbiibi byabwe. ⁷ Naye bwe yaboine Abafalisaayo abangi n'Abasadukaayo abangi nga baizirira okubatiza kwe n'abakoba nti imwe abaana b'emisota, yani eyabalabwire okwiruka obusungu obwaba okwiza? ⁸ Mubale ebibala ebisaaniire okwenenya; ⁹ temulowooza kutumula mu myoyo nti Tulina Ibulayimu niiye zeiza waisu: kubanga mbakoba nti Katonda asobola mu mabbaale gano okugafuuliramu Ibulayimu abaana. ¹⁰ Naye atyani empasa eteekeibwe ku kikolo ky'emiti: buli musaale ogutabala bibala bisa gwatemebwa, gunaasuulibwa mu musyo. ¹¹ Nze mbabatiza na maizi olw'okwenenya: naye oyo aiza enyuma wange niiye ansinga amaani, tinsaanira no kukwata ngaito gye: oyo alibabatiza n'Omwoyo Omutukuvu n'omusyo. ¹² Olugali lwe luli mu mukono gwe, naye alirongoosia inu eiguuliro lye; alikuŋaanyirya eŋaanu mu igwanika, naye ebisusunku alibyokya n'omusyo ogutazikira. ¹³ Awo Yesu n'ava e Galiraaya, n'atuuka ku Yoludaani eri Yokaana, amubatize. ¹⁴ Naye Yokaana yabbaire ataka okumugaana, ng'akoba nti Nze neetaaga iwe okumbatiza, weena oiza gye ndi? ¹⁵ Naye Yesu n'airamu n'amugamba nti Ikirirya atyanu: kubanga kitugwanira tutyo okutuukirirya obutuukirivu bwonabwona. Kaisi amwikirirya. ¹⁶ Awo Yesu, bwe yamalire okubatizibwa, amangu ago n'ava mu maizi: bona, eigulu ne limubikukira, n'abona Omwoyo gwa Katonda ng'aika ng'eiyemba, ng'aiza ku iye; ¹⁷ bona, eidoboozi ne riva mu igulu, nga likoba nti Oyo niiye Mwana wange, gwe ntaka, gwe nsanyukira einu.