¹ Omugugu ogw'ekigambo kya Mukama eri Isiraeri ekyaiziire mu Malaki. ² Nabatakire, bw'atumula Mukama. Era naye mutumula nti Watutakire otya? Esawu teyabbaire mugande wa Yakobo? bw'atumula Mukama: era yeena namutakire Yakobo; ³ naye Esawu n'amukyawire, ne nfuula ensozi gye okubba amatongo, ne mpa obusika bwe ebibbe eby'omu idungu. ⁴ Kubanga Edomu atumula nti Tukubbiibwe wansi, naye tuliira ne tuzimba ebifo ebyazikire; ati bw'atumula Mukama w'eigye nti Ibo balizimba, naye nze ndyabya: era abantu babeetanga nti Nsalo yo bubbiibi, era nti Bantu Mukama b'anyiigira enaku gyonagyona. ⁵ Era amaiso ganyu galibona, ne mutumula nti Mukama agulumizibwe okusuka ensalo ya Isiraeri. ⁶ Omwana ateekamu ekitiibwa itaaye, n'omwidu mukama we: kale oba nga ndi itawanyu, ekitiibwa kyange kiri waina? era oba nga ndi mukama Itwanyu okutiibwa kwange kuli waina? Mukama w'eigye bw'akoba imwe, Ai bakabona abanyooma eriina lyange. Era mutumula nti Twabbaire tunyoomere tutya eriina lyo? ⁷ Muweerayo ku kyoto kyange omugaati ogwonoonekere. Era mutumula nti Twakwonoonere tutya? Kubanga mutumula nti Emeeza ya Mukama ebulamu ko buntu. ⁸ Era bwe muwaayo enduka y'amaaso okubba saddaaka, nga ti bubbiibi! era bwe muwaayo ewenyera n'endwaire, nga ti bubbiibi! Kale gitonere oyo akutwala; yakusanyukira? oba yaikirirya amaiso go? bw'atumula Mukama w'eigye. ⁹ Kale mbeegayirire musabe ekisa kya Katonda, atukwatirwe ekisa: ebyo byabbairewo ku bwanyu: waliwo ku imwe gw'eyaikiriryaku amaiso ge? bw'atumula Mukama w’eigye. ¹⁰ Mu imwe singa mubairemu n'omu eyandigairewo enjigi, muleke okukuma omusyo ku kyoto kyange obwereere! Timbasanyukira n'akatono, bw'atumula Mukama w'eigye, so tinjikirirye kiweebwayo eri omukono gwanyu. ¹¹ Kubanga okuva eisana gy'eva okutuusia gy'erigwa eriina lyange ikulu mu b'amawanga; era obubaani buweerwayo mu buli kifo eri eriina lyange, n'ekiweebwayo ekirongoofu: kubanga eriina lyange ikulu mu b'amawanga, bw'atumula Mukama w'eigye. ¹² Naye imwe mulivumisia kubanga mutumula nti Emeeza ya Mukama eyonoonekere, n'ebibala byayo, niiyo mere ye, ebulamu ka buntu. ¹³ Era mutumula nti Bona, omulimu guno nga guyingire! era mugisoozerye, bw'atumula Mukama w'eigye; era muleetere ekyo ekyanyagiibwe olw'amaani, n'ekiwenyera, n'ekirwaire; mutyo bwe muleeta ekiweebwayo: nandikiriirye ekyo mu mukono gwanyu? bw'atumula Mukama. ¹⁴ Naye oyo abbeya akolimirwe, alina enume mu kisibo kye, ne yeeyama n'awaayo sadaaka eri Mukama ekintu ekiriko obuleme: kubanga nze ndi kabaka mukulu, bw'atumula Mukama w'eigye, n'eriina lyange lya ntiisia mu b'amawanga.