¹ Kale, mwe bakabona, ekiragiro kino kyanyu. ² Bwe mutaikirirye kuwulira era bwe mutaikirirye kukiteeka ku mwoyo okuwa eriina lyange ekitiibwa, bw'atumula Mukama w'eigye, kale ndiweererya ku imwe ekikolimo ekyo, era ndikolimira emikisa gyanyu: niiwo awo, malire okugikolimira, kubanga temukiteeka ku mwoyo. ³ Bona, ndinenya ensigo ku lwanyu, era ndisiiga obusa ku maiso ganyu,obusa obwa sadaaka gyanyu; naimwe mulitoolebwawo wamu nabwo. ⁴ Awo mulimanya nga nze naweereirye ekiragiro kino gye muli, endagaano yange ebbe no Leevi, bw'atumula Mukama w'eigye. ⁵ Endagaanu yange yabanga naye ey'obulamu n'emirembe; era nabimuwaire ebyo kaisi atye, n'antya n'atekemukira eriina lyange. ⁶ Eiteeka ery'amazima lyabbanga mu munwa gwe, so n'obutali butuukirivu tebwabonejere mu mimwa gye: yatambulanga nanze mu mirembe n'obugolokofu, n'akyusanga bangi okuleka obutali butuukirivu. ⁷ Kubanga emimwa gya kabona gyandinywezerye okumanya, era bandisagiire amateeka mu munwa gwe: kubanga niiye mubaka wa Mukama w'eigye. ⁸ Naye imwe mukyukire mukyamire mu ngira; musitazirye bangi mu mateeka; mwonoonere endagaanu ya Leevi, bw'ayogera Mukama w'eigye. ⁹ Nzeena kyenviire mbafuula abanyoomebwa ababulamu ko buntu mu maiso g'abantu bonabona, nga bwe mutakwata magira gange naye ne muteekayo omwoyo eri amaiso g'abantu mu mateeka. ¹⁰ Fenafena tubula itawaisu mumu? Ti Katonda omumu eyatutondere? tukuusiryekuusirye ki buli muntu mugande we, nga twonoona endagaano ya Bazeiza baisu? ¹¹ Yuda akuusiryekuusirye, era bakola eky'omuzizo mu Isiraeri no mu Yerusaalemi: kubanga Yuda ayonoonere obutukuvu bwa Mukama bw'ataka, era akweire omuwala wa katonda omunaigwanga. ¹² Akola atyo Mukama alimuzikiririrya oyo azuuka n'oyo avugira, okuva mu weema gya Yakobo, n'oyo awaayo ekiweebwayo , eri Mukama w'eigye: ¹³ Era ne kino kyona mukikola: mubiika ekyoto kya Mukama amaziga n'okukunga n'okuweera ebikowe, n'okuteekayo n'atateekayo ate mwoyo eri ekiweebwayo so takikirirya mu mukono gwanyu ng'asiimire. ¹⁴ Kubanga Mukama yababnga mujulizi eri igwe n'eri omukali ow'omu buvubuka bwo, gwe wakuusiryekuusirye, waire nga niiye mwinawo era omukali gwe walagaine naye endagaano. ¹⁵ Era teyakolere mumu? waire ng'alina omwoyo ogwafikirewo? Era yakoleire ki omumu? Yabbaire asagira eizaire eriritya Katonda. Kale mwekuumenga omwoyo gwanyu, so tewabbangawo akuusakuusa omukali ow'omu buvubuka bwe. ¹⁶ Kubanga nkyawa okubbinga abakali, bw'atumula Mukama Katonda wa Isiraeri, n'oyo abiika ekivaalo kye n'ekyeju, bw'atumula Mukama w'eigye: kale mwekuumenga omwoyo gwanyu muleke okukuusakuusanga. ¹⁷ Mwakoowerye Mukama n'ebigambo byanyu. Era naye mutumula nti Twamukoowerye tutya? Kubanga mutumula nti Buli muntu akola obubbiibi abba musa mu maiso ga Mukama, era abasanyukira; oba Katonda mwene musango ali waina?