¹ Awo ekigambo kya Mukama kyaizire eri Yona, omwana wa Amittayi, nga kitumula nti ² Golokoka, oyabe e Nineeve ekibuga ekyo ekinene okirangirire; kubanga obubbiibi bwabwe buniinire butuukire mu maiso gange. ³ Naye Yona n'agolokoka okwirukira e Talusiisi okuva mu maiso ga Mukama; n'aserengeta e Yopa n'abona ekyombo nga kyaba e Talusiisi; awo n'abawa empooza yaakyo n'asaabala omwo okwaba nabo e Talusiisi ave mu maiso ga Mukama. ⁴ Naye Mukama n'asindika empewo enyingi ku nyanza, omuyaga omungi ne gubba ku nyanza ekyombo ne kitaka okumenyeka. ⁵ N'abo abaavuga ne batya ne bakungirira buli muntu katonda we; ne basuula mu nyanza ebintu ebyabbaire mu kyombo bakiwewule. Naye Yona yabbaire ng'aikirele mu kisenge eky'omu kyombo, ng'agalamiire, agonere endoolo. ⁶ Awo omubbinga w'ekyombo n'aiza gy'ali n'amukoba nti Obbaire otya, iwe omugoni? golokoka, osabe Katonda wo, era koizi Katonda yatwijukira tuleke okuzikirira. ⁷ Ne batumula buli muntu no mugande we nti Iza tukubbe akalulu kaisi tutegeere gwe tulangibwa akabbiibi kano okutubbaaku. Awo ne bakubba akalulu, akalulu ne kagwa ku Yona. ⁸ Awo ne bamukoba nti Kale tukobere iwe tulangibwa akabbiibi kano okutubbaaku; omulimu gwo mulimu ki? ova waina? ensi yanyu nsi ki? ekika kyanyu kika ki? ⁹ N'abakoba nti Ndi Mwebbulaniya; ntya Mukama, Katonda ow'omu igulu eyakobere enyanza n'olukalu. ¹⁰ Awo abantu ne batya inu ne bamukoba nti Kino kiki ky'okolere iwe? Kubanga abantu baamanyire nti airukire mu maiso ga Mukama, kubanga yabbaire ng'abakobeire. ¹¹ Awo ne bamukoba nti Twakukola tutya enyanza etuteekere? kubanga enyanza yabbaire ng'eyaba yeeyongera okufuukuuka inu. ¹² N'abakoba nti Munsitule munsuule mu nyanza; kale enyanza yabateekera; kubanga maite nti omuyaga guno omungi gubakwaite okubalanga nze. ¹³ Naye abantu ne bavuga inu okwirayo okugoba eitale; naye ne batasobola; kubanga enyanza yayabire yeeyongera bweyongeri okufuukuuka okubaziyiza. ¹⁴ Kyebaaviire bakungirira Mukama ne batumula nti Tukwegayirire, ai Mukama, tukwegayirire tuleke okuzikirira ku lw'obulamu obw'omuntu ono; so totutewkaku musaayi ogubulaku musango; kubanga iwe, ai Mukama, niiwe okolere ky'otaka. ¹⁵ Awo ne basitula Yona ne bamusuula mu nyanza; awo omuyaga ogwabbaire ku nyanza ne gufa. ¹⁶ Awo abantu ne batya inu Mukama; ne bawaayo sadaaka eri Mukama ne beeyama obweyamu. ¹⁷ Mukama n'ateekateeka ekyenyanza ekinene kimike Yona; Yona n'amala mu kida olw'ekyenyanza enaku isatu emisana n'obwire.