¹ Yesu yatumwire ebyo; n'ayimusa amiaso ge mu igulu n'akoba nti Itawange, ekiseera kituukire; gulumizia Omwana wo, Omwana wo akugulumizie: ² nga bwe wamuwaire obuyinza ku balina omubiri bonnabona, era bonnabona be wamuwaire, abawe obulamu obutawaawo. ³ Buno niibwo bulamu obutawaawo, okutegeera iwe Katonda omumu ow'amazima, n'oyo gwe watumire, Yesu Kristo. ⁴ Nze nkugulumizirye ku nsi kubanga omulimu gwe wampaire okukola ngumalirirye. ⁵ Ai Itawange, ne Atyanu ngulumizia iwe wamu naiwe mu kitiibwa kidi kye nabbaire nakyo awamu naiwe ng'ensi akaali kubbaawo. ⁶ Mbonekerye eriina lyo abantu be wampaire okubatoola mu nsi: babbaire babo, n'obampa nze; boona bakwaite ekigambo kyo. ⁷ Atyanu bategeire nga byonabyona bye wampaire biva mu niiwe: ⁸ kubanga ebigambo bye wampaire mbibawaire; ne babitwala, ne bategeera mazima nga naviire gy'oli, ne baikirirya nga iwe wantumire ⁹ Nze mbasabira abo; sisabira nsi, wabula bo be wampaire; kubanga babo: ¹⁰ era ebyange byonabyona bibyo, n'ebibyo byange: nzena ngulumizibwa mu bo. ¹¹ Tindi mu nsi ate, naye bano bali mu nsi, nzena ngiza gy'oli. Itawange Omutukuvu, obakuumenga mu liina lyo be wampaire, babbenga bumu, nga ife. ¹² Bwe nabbaire nabo be wampaire nabakuumanga mu liina lyo: era ne mbazibira, tekukotanga muntu ku ibo, wabula omwana w'okugota; ebyawandiikiibwe bituukirire. ¹³ Naye atyanu ngiza gy'oli; na bino mbitumula mu nsi babbe n'eisanyu lyange nga lituukiriire mu ibo. ¹⁴ Mbawaire ekigambo kyo; era ensi yabakyawire, kubanga ti bensi nga nze bwe ntali we nsi. ¹⁵ Tinsaba iwe kubatoola mu nsi, naye obakuumenga mu bubbiibi. ¹⁶ Ti be nsi, nga nze bwe ntali we nsi. ¹⁷ Obatukulye mu mazima: ekigambo kyo niigo mazima, ¹⁸ Nga bwe wantumire mu nsi, nzeena bwe nabatumire mu nsi. ¹⁹ Era nze neetukulya ku bwabwe, boona beene batukuzibwe mu mazima. ²⁰ So timbasabira bano bonka, naye n'abo abanjikirirya olw'ekigambo kyabwe; ²¹ bonnabona babbenga bumu; nga iwe, Itawange, bw'oli mu nze, nzeena mu iwe, era boona babbenga mu ife: ensi eikiriryr nga iwe wantumire. ²² Nzeena ekitiibwa kye wampaire nkibawaire; babbenga bumu, nga ife bwe tuli obumu; ²³ nze mu ibo, weena mu nze, batuukiririre okubba obumu; ensi etegeerenga nga iwe wantumire, n'obataka ibo, nga bwe wantakire nze. ²⁴ Itawange, be wampaire, ntaka, we ndi nze, boona we babba babbenga nanze; babone ekitiibwa kyange kye wampaire: kubanga wanjagala nze ng'ensi ekaali kutondebwa. ²⁵ Kitawange Omutuukirivu ensi teyakitumuliire, naye nze nakutegeire; na bano bategeire nga iwe wantumire; ²⁶ era nabategeezerye eriina lyo era nditegeeza; okutaka kwe wantakire kubbenga mu ibo, nzeena mu ibo.