¹ Ebyo, mbibakobeire muleke okwesitazibwanga. ² Bababbinganga mu makuŋaaniro; niiwo awo, ekiseera kiza, buli eyabaitanga yalowoozanga ng'aweerezerye Katonda. ³ Ebyo babikolanga, kubanga Itawange tebamutegeera waire nze. ⁴ Naye ebyo mbibakobeire, era ekiseera kyabyo bwe kituukanga mwojukire nga nze nabakobeire. N'ebyo okuva ku luberyeberye tinabobakobeire, kubanga nabbaire wamu naimwe. ⁵ Naye atyanu njaba eri odi eyantumire; era wabula ku imwe ambuulya nti Oyaba waina? ⁶ Naye kubanga mbakobeire ebyo, emyoyo gyanyu gizwire enaku. ⁷ Naye nze mbakoba amazima; kibasaanira imwe nze okwaba; kubanga nze bwe ntalyaba, Omubeezi talibaizira; naye bwe ndyaba ndimutuma gye muli. ⁸ Iye bw'aliiza, alirumirirya ensi olw'ekibbiibi, n'olw'obutuukirivu, n'olw'omusango; ⁹ olw'ekibbiibi, kubanga tebanjikirirye nze; ¹⁰ olw'obutuukirivu, kubanga njaba eri Itawange, so mweena temukaali mumbona ate; ¹¹ olw'omusango, kubanga omukulu w'ensi enu asaliirwe omusango. ¹² Nkaali nina bingi okubakobera, naye temusobola kubigumiinkiriza atyanu. ¹³ Naye bw'aliiza oyo Omwoyo ow'amazima, yabaluŋamyanga mu mazima gonagona: kubanga taatumulenga ku bubwe yenka; naye byonabyona byeyawuliranga by'eytumulanga: iye yabakoberanga ebibyaba okwiza. ¹⁴ Oyo yangulumizanga nze: kubanga yatoolanga ku byange n'abakobera imwe. ¹⁵ Byonabyona Itawange by'ali nabyo niibyo byange: kyenviire nkoba nti yatoolanga ku byange n'akobera imwe. ¹⁶ Esigaire ekiseera kitono, ne mutambona ate; era nate walibbaawo ekiseera kitono, ne mumbona. ¹⁷ Abayigirizwa be abamu kyebaaviire batumula bonka na bonka nti Kiki kino ky'atukoba nti Esigaire ekiseera kitono, ne mutambona; ate walibaawo ekiseera kitono, ne mumbona; era nti Kubanga njaba eri Itawange? ¹⁸ Kyebaaviire bakoba nti Kiki kino ky'akoba nti Ekiseera kitono? Tetumaite ky'akoba. ¹⁹ Yesu n'ategeera nga bataka okumubuulya, n'abakoba nti Mwebuulyagana mwenka olw'ekyo kye mbakobere nti Esigaire ekiseera kitono, ne mutambona, era ate walibbaawo ekiseera kitono ne mumbona? ²⁰ Dala dala mbakoba nti imwe mulikunga mulikubba ebiwoobe, naye ensi erisanyuka: imwe mulinakuwala, naye enaku gyanyu girifuuka isanyu. ²¹ Omukali bw'azaala abona enaku, kubanga ekiseera kye kituukire: naye omwana bw'amala okuzaalibwa nga takaali aijukira kulumwa, olw'eisanyu ery'okuzaala omuntu mu nsi. ²² Kale mweena atyanu munakuwala: naye ndibabona ate, n'emyoyo gyanyu girisanyuka, n'eisanyu lyanyu wabula muntu aliribatoolaku. ²³ Ne ku lunaku ludi temulibbaaku kye munsaba. Dala dala mbakoba nti Buli kye mulisaba Itawange, alikibawa mu liina lyange. ²⁴ Okutuusia atyanu temusabanga kigambo mu liina lyange: musabe, muliweebwa, eisanyu lyayu lituukirire. ²⁵ Ebyo mbibakobeire mu ngero: naye obwire bwaba okwiza, imwe tinditumulira naimwe mu ngero, naye ndibakobera ebya Itawange mu lwatu. ²⁶ Ku lunaku ludi mulisaba mu liina lyange: so timbakoba nti ndibasabira eri Itawange; ²⁷ kubanga Itawange mweene abataka, kubanga muntakire nze, Mwikirirye nga naviire eri Itawange. ²⁸ Naviire eri Itawange, ne ngiza mu nsi: ate ensi ngireka, njaba eri Itawange. ²⁹ Abayigirizwa be ne bamukoba nti Bona, atunu otumula lwatu, totumula lugero. ³⁰ Atyanu tumaite ng'omaite byonabyona, so teweetaaga muntu yenayena okukubuulya; kyetuva twikirirya nga waviire eri Katonda. ³¹ Yesu n'abairamu nti Atyanu mwikirirye? ³² Bona, ekiseera kiza, era kituukire, mwe mwasaansaanira, buli muntu mu bibye, mwandeka nze nzenka: so ti nzenka, kubanga Itawange ali wamu nanze. ³³ Ebyo mbibakobeire, mube n'emirembe mu nze. Mu nsi mulimu enaku: naye mugume; nze mpangwire ensi.