¹ Kale, ab'oluganda abatukuvu, abalina omugabo mu kwetebwa okw'omu igulu, mulowooze Omutume era Kabona Asinga Obukulu ow'eidiini gwe twatula, Yesu; ² eyabbaire omwesigwa eri oyo eyamulondere, era nga Musa bwe yabbaire omwesigwa mu nyumba ye yonayona. ³ Kubanga oyo asaanyizibwa ekitiibwa ekingi okusinga Musa, ng'azimba enyumba bw'abba n'eitendo eringi okusinga enyumba. ⁴ Kubanga buli nyumba wabbaawo agizimba; naye eyazimbire byonabyona niiye Katonda. ⁵ No Musa yabbaire mwesigwa iye mu nyumba ye yonayona ng'omwidu, olw'okutegeeza ebyabbaire byaba okutumulwa; ⁶ naye Kristo yabbaire mwesigwa iye ng'omwana ku nyumba ye; naife tuli nyumba y'oyo, oba nga twakwatiranga dala obuvumu bwaisu n'okwenyumirizia okw'okusuubira kwaisu nga binyweire okutuusia enkomerero. ⁷ Kale, nga Omwoyo Omutukuvu bw'atumula nti atyanu bwe mwawulira eidoboozi lye, ⁸ Temukakanyalya mwoyo gyanyu, nga mu kusunguwalibwa, nga ku lunaku olw'okukemerwa mu idungu, ⁹ Bazeiza banyu kwe bankemere, nga baaba, Ne babona ebikolwa byange emyaka ana. ¹⁰ Kyenaviire nyiigira emirembe egyo, Ne ntumula nti Bakyama buliijo mu mwoyo gwabwe: Naye abo tebaategeera mangira gange; ¹¹ Nga bwe nalayire mu busungu bwange, Nti Tebaliyingira mu kiwumulo kyange. ¹² Mwekuume, ab'oluganda, omwoyo omubbiibi ogw'obutaikirirya gulekenga okubba mu muntu yenayena ku imwe, olw'okuva ku Katonda omulamu: ¹³ naye mubuuliraganenga buliijo buliijo, okutuusia ekiseera nga kikaali kiriwo ekyetebwa ekya atyanu; omuntu yenayena ku imwe alekenga okukakanyalibwa n'obubbeyi bw'ekibbiibi: ¹⁴ kubanga twafuukiire abaikirirya ekimu mu Kristo, oba nga twakwatibwanga dala okusuubira kwaisu okusookere nga kugumire okutuusia enkomerero: ¹⁵ nga bwe kikaali kitumulwa nti Atyanu bwe mwawulira eidoboozi lye, Temukakanyalya mwoyo gyanyu, nga mu kusunguwazibwa. ¹⁶ Kubanga baani bwe baawulira abaamusunguwala? ti abo bonabona abaava mu Misiri ne Musa? ¹⁷ Era baani be yanyiigiranga emyaka ana? ti abo abaayonoonere, n'emirambo gyabwe ne gigwa mu idungu? ¹⁸ Era baani be yalayiriire obutayingira mu kiwumulo kye, wabula obo abataagonda? ¹⁹ Era tubona nga tebasoboire kuyingira olw'obutaikirirya.