¹ 1 Kyekiviire kitugwanira okusinga einu okulowoozerya dala ebyawuliirwe, kabbekasinge twaba ne tubivaaku. ² Kuba oba ng'ekigambo ekyatumwirwe bamalayika kyanyweire, na buli kyonoono n'obutawulira byaweebwanga empeera ey'ensonga; ³ ife tuliwona tutya bwe tulireka obulokozi obukulu obwenkana awo? obwo obwasookere okwogerwa Mukama waisu, kaisi ne bututegeerezebwa dala abaabuwuliire; ⁴ era Katonda ng'ategeerezia wamu nabo mu bubonero ne mu by'amagero era ne mu by'amaani ebitali bimu era ne mu birabo eby'Omwoyo Omutukuvu, nga bwe yatakanga Yenka. ⁵ Kubanga bamalayika ti niibo be yafugirye ensi eyaba okubbaawo, gye tutumulaku. ⁶ Naye waliwo ekifo omumu we yategeerezeirye, ng'atumula nti Omuntu kiki, iwe okumwijukira? Oba omwana w'omuntu, iwe okumwijukira? ⁷ Wamukolere okubulaku katono okubba nga bamalayika; Wamuteekereku engule ey'ekitiibwa n'eitendo, N'omufugya emirimu egy'emikono gyo: ⁸ Wateekere ebintu byonabyona wansi w'ebigere bye. Kubanga mu kuteeka ebintu byonabyona wansi we teyatoireku kintu obutakiteeka wansi we. Naye atyanu tukaali kubona bintu byonabyona nga biteekeibwe wansi we. ⁹ Naye tulingilira oyo eyakoleibwe okubulaku akatono okubba nga bamalayika, niiye Yesu, olw'okubonaabona okw'okufa ng'ateekebwaku engule ey'ekitiibwa n'eitendo, olw'ekisa kya Katonda kaisi alege ku kufa ku lwa buli muntu. ¹⁰ Kubanga kyamusaaniire oyo ebintu byonabyona bwe biri ku bubwe era eyabikozeserye byonabyona, ng'aleeta abaana abangi mu kitiibwa, okutuukiriya omukulu w'obulokozi bwabwe olw'ebibonoobono. ¹¹ Kubanga oyo atukuza era n'abo abatukuzibwa b'omumu bonabona: kyava aleka okukwatibwa ensoni okubeetanga ab'oluganda, ¹² ng'atumula nti Ndikobera bagande bange eriina lyo, Ndikwemba wakati mu ikuŋŋaaniro. ¹³ Era ate nti Nze naamwesiganga oyo. Era ate nti Bona nze n'abaana Katonda be yampaire. ¹⁴ Kale kubanga abaana bagaita omusaayi n'omubiri, era naye mwene atyo yagaitiire ebyo; olw'okufa kaisi azikirirye oyo eyabbaire n'amaani ag'okufa, niiye Setaani; ¹⁵ era kaisi abawe eidembe abo bonabona abali mu bwidu obulamu bwabwe bwonabwona olw'entiisia y'okufa. ¹⁶ Kubanga mazima bamalayika ti b'ayamba, naye ayamba izaire lya Ibulayimu. ¹⁷ Kyekyaviire kimugwanira mu byonabyona okufaananyizibwa bagande, kaisi abbenga kabona asinga obukulu ow'ekisa omwesigwa mu bigambo ebiri eri Katonda, olw'okutangirira ebibbiibi by'abantu. ¹⁸ Kubanga olw'okubonyaabonyezebwa iye mweene ng'akemebwa, kyava asobola okubayamba abo abakemebwa.