¹ Okwikirirya niikyo ekinywezia ebisuubirwa niikyo ekitegeezerya dala ebigambo ebitaboneka. ² Kubanga abakaire baategerezeibwe mu okwo. ³ Olw'okwikikirirya tutegeera ng'ebintu byonabyona byakoleibwe kigambo kya Katonda, era ekiboneka kyekyaviire kireka okukolebwa okuva mu biboneka ⁴ Olw'okwikirirya Abiri yawaire Katonda sadaaka esinga obusa okusinga eya Kayini, eyamutegeezeserye okubba n'obutuukirivu, Katonda bwe yategeerezeirye ku birabo bye: era olw'okwo waire nga yafiire akaali atumula ⁵ Olw'okwikirirya, Enoka yatwaliibwe obutabona kufa; n'ataboneka kubanga Katonda yamutwaire: kubanga bwe yabbaire nga akaali kutwalibwa yategeezeibwe okusumibwa Katonda: ⁶ era awatabba kwikiriya tekisoboka kusimiibwa: kubanga aiza eri Katonda kimugwanira okwikirirya nga Katonda aliwo, era nga niiye omugabi w'empeera eri abo abamusagira. ⁷ Olw'okwikirirya Nuuwa, bwe yalabwirwe Katonda ku bigambo ebyabbaire bikaali kuboneka, n'atya busa nasiba eryato olw'okulokola enyumba ye; kyeyaviire asalira ensi omusango, nafuuka omusika w'obutuukirivu obuli mu kwikirirya. ⁸ Olw'okukkirirya Ibulayimu, bwe yayeteibwe, n'awulira n'okwaba n'ayaba mu kifo kye yabbaire ayaba okuweebwa okubba obusika; n'avaayo nga tamaite gy'ayaba. ⁹ Olw'okwikirirya n'abbanga omugeni mu nsi eyasuubiziibwe, ng'etali yiye, ng'agona mu weema wamu no Isaaka no Yakobo, basika bainaye ab'okusuubizibwa okwo: ¹⁰ kubanga yalindiriire ekibuga kidi ekirina emisingi, Katonda kye yakubbire kye yazimbire. ¹¹ Olw'okukkirirya era no Saala mwene n'aweweibwe amaani okubba ekida waire nga yabbaire abitiriire mu myaka, kubanga oyo eyasuubizirye yamulowoozere nga mwesigwa: ¹² era kyebaaviire bazaalibwa oyo Omumu era eyabbaire ng'afiire, abali ng'emunyenye egy'omu igulu obungi, era ng'omusenyu oguli ku itale ly'enyanza ogutabalika. ¹³ Abo bonabona baafiriire mu kwikirirya, nga tebaweweibwe ebyasuubiziibwe, naye nga babirengerera wala, era nga babisugirya, era nga batyama nga bageni era abatambuli ku nsi. ¹⁴ Kubanga abatumula batyo balaga nga basagira nsi ey'obutaka. ¹⁵ Era singa baijukira ensi edi gye baaviiremu, bandibbaire n'eibbanga okwirayo. ¹⁶ Naye atyanu beegomba ensi esinga obusa, niiyo y'omu igulu; Katonda kyava aleka okukwatibwa ensoni ku lw'abo, okwetebwanga Katonda waabwe: kubanga yabateekeireteekeire ekibuga. ¹⁷ Olw'okwikirirya Ibulayimu; bwe yakemeibwe, n'awaayo Isaaka; era eyaweweibwe ebyasuubiziibwe n'eisanyu yabbaire ayaba kuwaayo omwana we eyazaaliibwe omumu yenka; ¹⁸ eyakoleibwe nti Mu Isaaka eizaire lyo mweryayetebwanga: ¹⁹ bwe yalowoozerye nga Katonda asobola okuzuukizia mu bafu era; era mwe yamuwereirwe mu kifaananyi. ²⁰ Olw'okwikirirya Isaaka yasabiire omukisa Yakobo ne Esawu, era mu bigambo ebyabbaire byaba okwiza. ²¹ Olw'okwikirirya Yakobo, bwe yabbaire ayaba okufa, yasabiire omukisa abaana ba Yusufu bombiri; n'asinza ng'akutamire ku musa gw'omwigo gwe. ²² Olw'okwikirirya Yusufu, bwe yabbaire ng'alikumpi okufa, n'atumula ku kuvaayo kw'abaana ba Isiraeri; n'alagira eby'amagumba ge. ²³ Olw'okwikirirya Musa, bwe yazaaliibwe, abazaire be ne bamugisira emyezi isatu, kubanga baamuboine nga musa; ne batatya kiragiro kya kabaka. ²⁴ Olw'okwikirirya Musa, bwe yakulire, n'agaana okwetebwanga omwana wo muwala wa Falaawo; ²⁵ ng'asinga okutaka okukolebwanga obubbiibi awamu n'abantu ba Katonda okusinga okubbanga n'okwesiima okw'ekibbiibi okuwaawo amangu; ²⁶ ng'alowooza ekivume kya Kristo okubba obugaiga obusinga ebintu by'e Misiri: kubanga yeekalirizire empeera eyo. ²⁷ Olw'okwikirirya n'aleka Misiri, nga tatya busungu bwa kabaka: kubanga yagumiinkirizirie ng'abona oyo ataboneka. ²⁸ Olw'okwikirirya yakolere Okubitaku n'okumansira omusaayi, eyazikirizirye ababeryeberye aleke okubakomaku. ²⁹ Olw'okwikirirya ne babita mu Nyanza Emyufu nga ku lukalu: Abamisiri bwe baagezeryeku okukola batyo ne basaanyizibwawo. ³⁰ Olw'okwikirirya bugwe wa Yeriko n'agwa, nga kimalire okwebbungululirwa enaku musanvu. ³¹ Olw'okwikirirya Lakabu omwenzi oyo teyazikiririire wamu n'abo abataagonda, bwe yasembeirye abakeeti emirembe. ³² Ntumula ki ate? Kubanga eibbanga lyampwaku bwe natumula ku Gidiyooni, Balaki, Samusooni, Yefusa; ku Dawudi ne Samwiri na banabbi: ³³ olw'okwikirirya abo niibo bawangwire obwakabaka, niibo abaakola eby'obutuukirivu, niibo abaafuna ebyasuubiziibwe, niibo abaigaire eminwa gy'empologoma, ³⁴ niibo abaazikizirye amaani g'omusyo, niibo abairukire obwogi bw'ekitala, niibo abaweweibwe amaani okuva mu bunafu, niibo baafuukire abazira mu ntalo, niibo ababbingire eigye ly'ab'amawanga. ³⁵ Abakali ne baweebwa abafu baabwe mu kuzuukira: n'abandi ne bayiganyizibwa, nga tebaikirirya kununulibwa, kaisi baweebwe okuzuukira okusinga obusa: ³⁶ n'abandi ne bakemebwa nga baduulirwa era nga bakubbibwa, era ate nga basibibwa ne bateekebwa mu ikomera: ³⁷ baakubiibwe amabbaale, baasaliibwemu n'emisumeeni, baakemeibwe, baitiibwe n'ekitala: batambulanga nga bavaire amawu g'entama n'ag'embuli; nga babula kantu, nga babonyaabonyezebwa, nga bakolwa obubbiibi ³⁸ (ensi beetaasaanira), nga bakyamira mu malungu no ku nsozi no mu mpuku no mu bwina obw'ensi. ³⁹ N'abo bonabona bwe bamalire okutegeezebwa olw'okwikirirya kwabwe, ne batafuna ekyasuubiziibwe, ⁴⁰ Katonda bwe yatuboneire eira ife ekisinga obusa, ibo baleke okutuukirizibwa ife nga tubulawo.