¹ Kubanga amateeka bwe galina ekiwolyo eky'ebisa ebyabbaire byaba okwiza, so ti kifaananyi kyeene eky'ebigambo, ne sadaaka egitaijulukuka, gye bawaireyo obutayosia buli mwaka buli mwaka; tebasoboire enaku gyonagyona kutukirirya abo abagisembereire. ² Kubanga tejandirekeibweyo kuweebwayo kubanga abasinza bwe bamalire okunaabibwa dala omulundi ogumu tebandibbaire na kwetegeeraku bibbiibi ate. ³ Naye mu egyo mulimu okwijukilyanga ebibbiibi buli mwaka buli mwaka. ⁴ Kubanga tekisoboka omusaayi gw'ente enume n'embuli okutoolaku ebibbiibi. ⁵ Ng'aiza mu nsi, kyava atumula nti Sadaaka n'ebiweebwayo tiwabitakire, Naye wanteekeireteekeire omubiri; ⁶ Tiwasiimire ebyokyebwa ebiramba n'ebiweebwayo olw'ebibbiibi; ⁷ Kaisi nentumula nti bona ngizire (Mu muzingo gw'ekitabo ekyampandiikiibweku) Okukola by'otaka, ai Katonda. ⁸ Bw'atumula waigulu nti Sadaaka n'ebiweebwayo n'ebyokebwa ebiramba n'ebiweebwayo olw'ebibbiibi tewabitakire so tewabisiimire (ebyo niibyo biweebwayo ng'amateeka bwe gali), ⁹ kaisi n'atumula nti Bona, ngizire okukola by'otaka. Atoolawo eky'oluberyeberye, kaisi anywezie eky'okubiri. ¹⁰ Mu ebyo by'ataka twatukuziibwe olw'okuwaayo omubiri gwa Yesu Kristo omulundi gumu. ¹¹ Na buli kabona ayemerera buli lunaku ng'aweereza ng'awaayo emirundi emingi sadaaaka egitaijulukuka, egitasobola kutoolaku bibbiibi emirembe gyonagyona: ¹² naye oyo bwe yamalire okuwaayo sadaaka eimu olw'ebibbiibi okutuusia mirembe gyonagyona, kaisi n'atyama mu mukono omuliiro ogwa Katonda; ¹³ ng'alindirira Oluvanyuma abalabe be okufuusibwa entebe y'ebigere bye. ¹⁴ Kubanga olw'okuwaayo sadaaka eimu yatuukirizirye okutuusia emirembe gyonagyona abatukuzibwa ¹⁵ Era n'Omwoyo Omutukuvu niiye mujulizi gye tuli: kubanga bw'amala okutumula nti ¹⁶ Eno niiyo endagaano gye ndiragaana nabo Oluvanyuma lw'enaku gidi, bw'atumula Mukama; Nditeeka amateeka gange ku mwoyo gwabwe, Era no ku magezi gaabwe ndigawandiika; kaisi n'atumula nti ¹⁷ N'ebibbiibi byabwe n'obujeemu bwabwe tindibiijukira ate. ¹⁸ Naye awali okutoolebwaku ebyo, tewakaali kuwangayo sadaaka olw'ekibbiibi. ¹⁹ Kale ab'oluganda, bwe tulina obugumu okuyingira mu kifo ekitukuvu olw'omusaayi gwa Yesu, ²⁰ mu ngira gye yatukobeire, enjaaka enamu, ebita mu igigi, niigwo mubiri gwe; ²¹ era bwe tulina kabona omunene afuga enyumba ya Katonda; ²² tusemberenga n'omwoyo ogw'amazima olw'okwikirirya okutuukiriire, emyoyo gyaisu nga mansirwaku okutoolamu omwoyo omubbiibi, n'emibiri gyaisu nga ginaabibwa n'amaizi amasa: ²³ tunywezie okwatulanga eisuubi lyaisu obutasagaasagana; kubanga eyasuubizirye mwesigwa: ²⁴ era tulowoozaganenga fenka na fenka okukubbirizianga okutaka n'ebikolwa ebisa; ²⁵ obutalekanga kukuŋaana wamu, ng'abandi bwe bebitya, naye nga tubuulirira; era nga tweyongeranga okukola ebyo tutyo, nga bwe mubona olunaku ludi nga luli kumpi okutuuka. ²⁶ Kuba bwe tugenderera okwonoona nga tumalire okuweebwa okutegeera amazima, tewasigaireyo ate sadaaka olw'ebibbiibi, ²⁷ wabula okulindirira n'okutya omusango, n'obukambwe obw'omusyo ogwaba okwokya abalabe ²⁸ Anyooma amateeka ga Musa afa awabula kusaasirwa olw'abajulizi ababiri oba basatu: ²⁹ mulowooza mutya, okubonerezebwa oyo kw'alisaanyizibwa kulyenkana waina okusinga okubba okubbiibi eyaniiniriranga dala Omwana wa Katonda, n'alowooza omusaayi gw'endagaanu ogwamutukuzirye obutabba mutukuvu, n'akolera ekyeju Omwoyo ow'ekisa? ³⁰ Kubanga temumaite oyo eyatumwire nti Eigwanga lyange, nze ndiwalana. Era ate nti Mukama alisalira omusango abantu be. ³¹ Kigambo kye ntiisia okugwa mu mikono gya Katonda omulamu. ³² Naye mwijukire enaku egy'eira, bwe mwamalire okwakirwa, gye mwagumiinkiririziryemu okufuba okunene okw'ebibonoobono; ³³ olundi bwe mwafuukire ekiringirirwa olw'ebivumi n'okubona enaku; olundi, bwe mwaikiriirye ekimu n'abo abaakoleirwe ebyo. ³⁴ Kubanga mwasaasiire abasibe, era mwagumiinkirizire n'eisanyu okunyagibwaku ebintu byanyu, nga mutegeera nga mulina mwenka ebintu ebisinga obusa era eby'olubeerera. ³⁵ Kale temusuulanga bugumu bwanyu, obuliku empeera enene. ³⁶ Kubanga mwetaaga okugumiinkiriza, bwe mulimala okukola Katonda by'ataka kaisi muweebwe ekyasuubiziibwe. ³⁷ Kubanga wakaali wasigaireyo akaseera katono inu, Aiza alituuka, so talirwa. ³⁸ Naye omutuukirivu wange alibba mulamu lwo kwikirirya: Era bw'airayo enyuma, emeeme yange temusanyukira. ³⁹ Naye ife tetuli bo kwira nyuma mu kuzikirira, naye tuli bo kwikirirya olw'okulokola obulamu.