¹ Mu mwaka ogw'okubiri ogwa Daliyo kabaka, mu mwezi ogw'omukaaga, ku lunaku olw'omwezi olw'oluberyeberye, ekigambo kya Mukama ne kiizira mu Kagayi nabbi eri Zerubbaberi mutaane wa Seyalutyeri oweisaza lya Yuda n'eri Yosuwa mutaane wa Yekozadaaki kabona asinga obukulu nga kitumula nti ² Ati bw'atumula Mukama w'eigye nti Abantu bano batumula nti Atyanu ti niikyo ekiseera ife okwiza, ekiseera eky'okuzimbiramu enyumba ya Mukama. ³ Awo ekigambo kya Mukama ne kiizira mu Kagayi nabi nga kitumula nti ⁴ niikyo ekiseera imwe beene okubba mu nyumba gyanyu egibiikiibweku, enyumba eno ng'ebbeerera awo ng'erekeibwewo? ⁵ Kale ati bw'atumula Mukama w'eigye nti Mulowooze amangira ganyu. ⁶ Mwasigire bingi, ne mukungula bitono; mulya naye temwikuta; munywa naye temwikuta bye munywa; muvaala naye wabula asuuwa; n'oyo afuna empeera afuna kugiteeka mu nsawo eyawumukirewumukire. ⁷ Ati bw'atumula Mukama w'eigye nti Mulowooze amangira ganyu. ⁸ Muniine ku lusozi, muleete emisaale, muzimbe enyumba; nzeena ndigisanyukira, era ndigulumizibwa, bw'atumula Mukama. ⁹ Mwasuubiire bingi, kale, bona, ne bibba bitono; era bwe mwabireetere eika, ne mbifuumuula. Lwaki? bw'atumula Mukama w'eigye. Ogw'enyumba yange ebeerera awo ng'erekeibwewo, naimwe mwirukira buli muntu eri enyumba ye. ¹⁰ Kale ku lwanyu eigulu kyeriviire liziyizibwa okuleeta omusulo, n'eitakali liziyizibwa okubala ebibala byalyo. ¹¹ Ne njeta ekyanda okwiza ku nsi no ku nsozi ne ku ŋaanu ne ku mwenge no ku mafuta no ku ebyo eitakali bye libala no ku bantu no ku nsolo no ku mirimu gyonagyona egy'engalo. ¹² Awo Zerubbaberi mutaane wa Seyalutyeri no Yosuwa mutaane wa Yekozadaaki kabona asinga obukulu wamu n'abantu bonabona abafiikirewo ne bagondera eidoboozi lya Mukama Katonda waabwe n'ebigambo bya Kagayi nabbi nga Mukama Katonda waabwe bwe yamutumire; abantu ne batya mu maiso ga Mukama. ¹³ Awo Kagayi omubaka wa Mukama n'akoba abantu ng'ayima mu bubaka bwa Mukama nti Nze ndi wamu naimwe, bw'atumula Mukama. ¹⁴ Awo Mukama n'akubbirirya omwoyo gwa Zerubbaberi omutaane wa Seyalutyeri oweisaza lya Yuda n'omwoyo gwa Yosuwa mutaane wa Yekozadaaki kabona asinga obukulu n'omwoyo gw'abantu bonabona ababbaire bafiikirewo, ne baiza ne bakola omulimu mu nyumba ya Mukama w'eigye Katonda waabwe, ¹⁵ ku lunaku olw'omwezi olw'abiri mu nya, mu mwezi ogw'omukaaga mu mwaka ogw'okubiri ogwa Daliyo kabaka.