¹ Mu mwezi ogw'omusanvu ku lunaku olw'omwezi ogwa abiri no lumu ekigambo kya Mukama ne kiizira mu Kagayi nabbi nga kitumula nti ² koba Zerubbaberi mutaane wa Seyalutyeri oweisaza lya Yuda ne Yosuwa mutaane wa Yekozadaaki kabona asinga obukulu n'abantu abafiikirewo ng'otumula nti ³ Yani asigaire mu imwe eyaboine enyumba eno mu kitiibwa kyayo ekyasookere? era mugibona mutya atyanu? temugibona nga ebulamu ko buntu mu maiso ganyu? ⁴ Era naye atyanu bba n'amaani, ai Zerubbaberi, bw'tumula Mukama; era bba n'amaani, ai Yosuwa mutaane wa Yekozadaaki kabona asinga obukulu; era mubbe n'amaani, imwe mwenamwena abantu ab'omu nsi, bw'atumula Mukama, mukole omulimu: kubanga nze ndi wamu naimwe, bw'atumula Mukama w'eigye, ⁵ ng'ekigambo bwe kiri kye nalagaine naimwe bwe mwaviire mu Misiri, omwoyo gwange ne gubba mu imwe: temutya. ⁶ Kubanga ati bw'atumula Mukama w'eigye, nti Ekaali esigaireyo omulundi gumu, ekiseera kitono, ngikaikanie eigulu n'ensi n'enyanza n'olukalu; ⁷ ndikaikania amawanga gonagona, n'ebyo ebyegombebwa amawanga gonagona biriiza, era ndiizulya enyumba eno ekitiibwa, bw'atumula Mukama w'eigye: ⁸ Efeeza yange ne zaabu yange, bw'atumula Mukama w'eigye. ⁹ Ekitiibwa eky'enyumba eno eky'oluvanyuma kirisinga kiri ekyasookere, bw'atumula Mukama w'eigye: era mu kifo kino mwe ndiwa emirembe, bw'atumula Mukama w'eigye. ¹⁰ Ku lunaku olw'amakumi abiri mu nya olw'omwezi olw'omwenda mu mwaka ogw'okubiri ogwa Daliyo ekigambo kya Mukama ne kiizira mu Kagayi nabbi nga kitumula nti ¹¹ Ati bw'atumula Mukama w'eigye nti Buulya bakabona eby'amateeka ng'otumula nti ¹² Omuntu bw'asitulira enyama entukuvu mu kirenge eky'ekivaalo kye, n'akoma ku mere n'ekirenge kye oba mugoyo oba mwenge oba mafuta oba mere yonayona, kiriba kitukuvu? Bakabona ne bairamu ne batumula nti Bbe. ¹³ Awo Kagayi Kaisi n'atumula nti Omuntu atali mulongoofu olw'omulambo bw'abba ng'akomere ku kimu ku ebyo byonabyona, kiribba ekitali kirongoofu? Bakabona ne bairamu ne batumula nti Kiribba ekitali kirongoofu. ¹⁴ Awo Kagayi kaisi nairamu n'atumula nti Abantu bano bwe babbaire batyo, era eigwanga lino bwe liri lityo mu maiso gange, bw'atumula Mukama; era na buli mulimu ogw'emikono gyabwe guli gutyo; n'ekyo kye baweerayo eyo ti kirongoofu. ¹⁵ Kale , mbeegayiriire, mulowooze okuva atyanu n’okwira enyuma, eibbaale nga likaali kuteekebwa ku ibbaale mu yeekaalu ya Mukama: ¹⁶ mu biseera ebyo byonabyona omuntu bwe yaizanga eri entuumu ey'ebipimo amakumi abiri waabbangawo ikumi lyereere: omuntu bwe yaizanga eri eisogolero okusena ebideku ataano, nga mulimu abiri meereere. ¹⁷ Nabakubba n'okugengewala n'obukuku n'omuzira mu mulimu gwonagwona ogw'emikono gyanyu; era naye temwankyukiire, bw'atumula Mukama. ¹⁸ Mulowooze, mbeegayiriire, okuva atyanu n'okwira enyuma, okuva ku lunaku olw'abiri mu nya olw'omwezi ogw'omwenda, okuva ku lunaku lwe baasimba omusingi gwa yeekaalu ya Mukama, mukirowooze. ¹⁹ Ensigo gikaali mu igwanika? niiwo awo, omuzabbibu n'omutiini n'omukomamawanga n'omuzeyituuni gikaali kubala; okuva ku lunaku lwa atyanu ndibawa omukisa. ²⁰ Awo ekigambo kya Mukama ne kiizira Kagayi omulundi ogw'okubiri ku lunaku olw'abiri mu nya olw'omwezi nga kitumula nti ²¹ Tumula no Zerubbaberi oweisaza lya Yuda ng'otumula nti Ndisisiikya eigulu n'ensi; ²² era ndisuula entebe ey'obwakabaka bungi, era ndizikirirya amaani ag'obwakabaka obw'amawanga; era ndisuula amagaali n'abo abagatambuliramu; n'embalaasi n'abo abagyebagala baliikaikanyizibwa buli muntu n'ekitala kya mugande we. ²³ 23 Ku lunaku olwo, bw'atumula Mukama w'eigye, ndikutwala iwe, ai Zerubbaberi omwidu wange, mutaane wa Seyalutyeri, bw'atumula Mukama, ne nkufuula ng'akabonero; kubanga nkulondere, bw'atumula Mukama w'eigye.