¹ N'omusota gwabbaire mukalabakalaba okusinga ensolo gyonagyona egy'omu nsiko, gye yakolere Mukama Katonda. Ne gukoba Omukali nti Atyo bwe yatumwire Katonda nti Temulyanga ku misaale gyonagyona egy'omu lusuku? ² Omukali n'akoba omusota nti Ebibala by'emisaale egy'omu lusuku tulya; ³ Wabula ebibala by'omuti oguli wakati mu lusuku, Katonda yatumwire nti Temugulyangaku waire okugukwatangaku muleke okufa. ⁴ Omusota ne gukoba Omukali nti Okufa temulifa. ⁵ Kubanga Katonda amaite nti olunaku lwe muligulyaku imwe, amaiso ganyu lwe galizibuka, mweena mulibba nga Katonda okumanyanga obusa n'obubbiibi. ⁶ Omukali bwe yaboine ng'omusaale musa okulya, era nga gusanyusa amaiso n'omusaale nga gwa kwegombebwa, okuleeta amagezi, n'anoga ku bibala byagwo n'alya, n'awa era no ku musaiza we yeena n'alya. ⁷ Amaiso gaabwe bombiri ne gazibuka ne beetegeera nga babbaire bwereere; ne batunga amakoola g'emisaale ne beekolera eby'okuvaala. ⁸ Ne bawulira eidoboozi lya Mukama Katonda ng'atambula mu lusuku mu kiseera eky'empewo: omusaiza no mukali we ne beegisa mu maiso ga Mukama Katonda wakati mu misaale egy'omu lusuku. ⁹ Mukama Katonda n'ayeta omusaiza n'amukoba: nti Oli waina? ¹⁰ N'atumula nti, Mpuliire eidoboozi lyo mu lusuku, n'entya, kubanga mbaire bwereere; ne negisa. ¹¹ N'atumula nti Yani eyakukobeire nti obbaire bwereere? Oliire ku musaale gwe nakulagiire obutagulyangaku? ¹² Omusaiza n'atumula nti Omukali, gwe wampaire okubbanga nanze niiye ampaire ku musaale, ne ndya. ¹³ Mukama Katonda n'akoba omukali nti Kiki kino ky'akolere? Omukali n'atumula nti Omusota gunsenderesendere, ne ndya. ¹⁴ Mukama Katonda n'akoba omusota nti, Kubanga okolere kino, okolimiirwe iwe okusinga ensolo egy'omu nyumba gyonagyona, n'okusinga buli nsolo ey'omu nsiko; watambulyanga kida, waalyanga nfuufu enaku gyonagyona egy'obulamu bwo: ¹⁵ Nzeena obulabe nabuteekanga wakati wo n'omukali, era ne wakati w'eizaire lyo n'eizaire ly'omukali: (eizaire ly'omukali) lirikubetenta omutwe, weena oliribetenta ekisinziiro. ¹⁶ N'akoba omukali nti Okwongera nakwongerangaku obulumi bwo n'okubbanga kwo ekida; mu bulumi mw'ewazaaliranga abaana; n'okwegomba kwo kwabbanga eri musaiza wo, yeena yakufuganga. ¹⁷ N'akoba Adamu nti Kubanga owuliire eidoboozi lyo mukali wo, n'olya ku musaale gwe nakulagiire nga ntumula nti Togulyangaku: ensi ekolimiirwe ku lulwo; mu kutegana mw'ewatoolanga ebyokulya enaku gy'onagyona egy'obulamu bwo; ¹⁸ amawa n'amatovu g'eyakuzaaliranga; weena waalyanga omwido ogw'omu nimiro. ¹⁹ Mu ntuuyo egy'omu maiso go mw'ewaliiranga emere, okutuusya lw'oliira mu itakali; kubanga omwo mwe watooleibwe; kubanga oli nfuufu iwe, no mu nfuufu mw'oliira. ²⁰ Omusaiza n'atuuma mukali we eriina lye Kaawa; kubanga ono niiye maaye w'abo bonabona abalamu. ²¹ Mukama Katonda n'akolera Adamu no mukazi we ebivaalo by'amawu, n'abavaalisya. ²² Mukama Katonda n'atumula nti Bona, omuntu afuukire ng'omumu ku ife, okumanyanga obusa n'obubbiibi; atyanu, aleke okugolola omukono gwe okunoga ku muti ogw'obulamu, okulya okuwangaalanga emirembe n'emirembe; ²³ Mukama Katonda Kyeyaviire amutoola mu lusuku Adeni, alimenga eitakali mwe yatoleibwe. ²⁴ Atyo n'abbinga omuntu; n'airyamu ebuvaisana mu lusuku Adeni bakerubi, era n'ekitala ekimyansya ekikyukakyuka okukuumanga engira ey'omusaale ogw'obulamu.